ເພື່ອເປັນການຕິດຕາມ, ກວດກາ ແລະ ຊຸກຍູ້ວຽກງານກວດກາ ປະຈຳປີ ຢ່າງເປັນປົກກະຕິ ແລະ ອີງຕາມ ຂໍ້ຕົກລົງ ຂອງລັດຖະມົນຕີ ວ່າດ້ວຍການອະນຸມັດ ແຕ່ງຕັ້ງຄະນະລົງເຄື່ອນໄຫວ, ຕິດຕາມ, ກວດກາ ແລະ ຊຸກຍູ້ ວຽກງານກວດກາລັດ ຢຸ່ບັນດາພະແນກເຕັກໂນໂລຊີ ແລະ ການສື່ສານ ແຂວງ ແລະ ນະຄອນຫຼວງວຽງຈັນ ສະບັບເລກທີ 2237/ກຕສ, ລົງວັນທີ 22 ສິງຫາ ປີ 2023. ທ່ານ ປອ. ສັນຕິສຸກ ສິມມາລາວົງ, ຮອງເລຂາຄະນະພັກ, ປະທານກວດກາພັກ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ນໍາພາຄະນະປະກອບມີ ທ່ານ ສະກຸນຄຳ ແກ້ວບຸນຍາສິດ, ຮອງຫົວໜ້າກົມກວດກາ, ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະ ໄດ້ສໍາເລັດການລົງເຄື່ອນໄຫວວຽກງານຕິດຕາມ, ກວດກາ ແລະ ຊຸກຍູ້ວຽກງານກວດກາ ປະຈຳປີ ຢູ່ 02 ແຂວງພາກກາງ ແລະ 04 ແຂວງພາກເໜືອ ຄື: ພະແນກເຕັກໂນໂລຊີ ແລະ ການສື່ສານ ແຂວງບໍລິຄຳໄຊ, ໄຊສົມບູນ, ຊຽງຂວາງ, ຫົວພັນ, ຫຼວງພະບາງ ແລະ ໄຊຍະບູລີ ໃນລະຫວ່າງວັນທີ 29 ຕຸລາ ເຖິງ 11 ພະຈິກ 2024 ທີ່ຜ່ານມານີ້.

ຈຸດປະສົງ ເພື່ອ​ແນໃສ່ເຮັດ​ໃຫ້​​ພະ​ແນກເຕັກໂນໂລຊີ ແລະ ການສື່ສານ ທ້ອງ​ຖິ່ນ ເພີ່ມ​ທະ​ວີ​ວຽກ​ງານ​ຕິດ​ຕາມ, ກວດ​ກາ​ ຂອງ​ຕົນ​ຢ່າງ​ເປັນ​ປົກ​ກະ​ຕິ ​ພ້ອມທັງຕິດຕາມການຈັດຕັ້ງຜັນຂະຫຍາຍ ແຜນການຫັນເປັນດິຈິຕອນ ຂອງຂະແໜງເຕັກໂນໂລຊີ ແລະ ການສື່ສານ ໃຫ້ດຳເນີນໄປຕາມທິດທາງລວມຂອງລັດຖະບານ; ເພື່ອຕິດຕາມ ສະພາບການເຄື່ອນໄຫວວຽກງານກວດກາລັດ ຢູ່ ພະແນກເຕັກໂນໂລຊີ ແລະ ການສື່ສານ ແຂວງ ແລະ ນະຄອນຫຼວງ ໃນການຈັດຕັ້ງປະຕິບັດພາລະບົດບາດ, ຂອບເຂດສິດ ແລະ ໜ້າທີ່ ວິຊາສະເພາະຂອງຕົນ, ພ້ອມທັງເກັບກຳສະພາບການຄຸ້ມຄອງບໍລິຫານ, ການຈັດຕັ້ງປະຕິບັດການແຈ້ງຊັບສິນ ແລະ ລາຍຮັບ, ການປະຕິບັດແຜນງົບປະມານ ການປະຕິບັດໂຄງການລົງທຶນຂອງລັດ, ການປະຕິບັດກົດໝາຍຂອງລັດ ແລະ ບັນດານິຕິກຳຕ່າງໆ ທີ່ກະຊວງວາງອອກ ແລະ ເພື່ອ​ສົ່ງ​ເສີມ​ດ້ານ​ດີ, ດ້ານຕັ້ງ​ໜ້າ, ຈຳ​ກັດ​ດ້ານ​ອ່ອນ-ຂໍ້​ຄົງ​ຄ້າງ ແລະ ຊອກ​ຫາ​ວິ​ທີ​ການ​ແກ້​ໄຂ​ສະ​ພາບ​ຫ​ຍໍ້​ທໍ້​ທີ່​ອາດຈະ​ເກີດ​ຂຶ້ນ​ກັບ​ການ​ຈັດ​ຕັ້ງ ແລະ ພະ​ນັກ​ງານ-ລັດ​ຖະ​ກອນ ໃຫ້​ທັນ​ເວ​ລາ.

ພາຍຫຼັງສຳເລັດການລົງເຄື່ອນໄຫວ ຕິດຕາມ, ກວດກາ ແລະ ຊຸກຍູ້ວຽກງານກວດກາ ເຮັດ​ໃຫ້​ພະ​ນັກ​ງານ-ລັດ​ຖະ​ກອນ ຂອງບັນດາ​ພະ​ແນກເຕັກໂນໂລຊີ ແລະ ການສື່ສານ ແຂວງ ມີ​ຄວາມ​ເຂົ້​າ​ໃຈ, ເຫັນ​ໄດ້​ຄວາມ​ສຳ​ຄັນ​ຂອງວຽກ​ງານກວດ​ກາ ບໍ່​ຢ້ານ​ການກວດ​ກາ, ຮັກ​ສາ​ໄດ້​ຄວາມ​ສາ​ມັກ​ຄີ ແລະ ຕື່ນ​ຕົວ​ເປັນ​ເຈົ້າ​ການ​ປະ​ຕິ​ບັດ​ໜ້າ​ທີ່​ວຽກ​ງານ​ຂອງ​ຕົນ​ດ້ວຍ​ຄວາມ​ຮັບ​ຜິດ​ຊອບ​ສູງ ແລະ ມີ​ຄວາມ​ໂປ່ງ​ໃສ; ສາມາດຮັບຮູ້ ແລະ ເກັບກຳສະພາບ ການຈັດຕັ້ງປະຕິບັດ ວຽກງານກວດກາຂອງຕົນ ພ້ອມທັງຕີລາຄາປະເມີນຜົນການຈັດຕັ້ງປະຕິບັດແຜນການໃນໄລຍະຜ່ານມາ; ເຮັດໃຫ້ການຈັດຕັ້ງປະຕິບັດວຽກງານກວດກາລັດ ແລະ ຜູ້ເຮັດວຽກງານກວດກາ ຂອງພະແນກ ມີຄວາມເຂັ້ມແຂງ ແລະ ໄດ້ຮັບປະສິດທິພາບ ປະສິດທິຜົນ ສາມາດເຫັນໄດ້ດ້ານດີ, ດ້ານຕັ້ງໜ້າ ທີ່ຈະໄດ້ຊຸກຍູ້ສົ່ງເສີມ ແລະ ດ້ານອ່ອນຂໍ້ຄົງຄ້າງເພື່ອປັບປຸງແກ້ໄຂ ແລະ ສາມາດເກັບກຳບັນຫາ, ຂໍ້ສະເໜີຕ່າງໆ ແລະ ທິດທາງ ແຜນການຂອງພະແນກ ເພື່ອເປັນຂໍ້ມູນໃນການກຳນົດແຜນວຽກງານກວດກາ ກໍຄື ແຜນພັດທະນາ 05 ປີຄັ້ງທີ III (2021-2025) ຂອງຂະແໜງເຕັກໂນໂລຊີ ແລະ ການສື່ສານ.

ພາບ ແລະ ຂ່າວ: ກົມກວດກາ