ຄະນະຜູ້ແທນ ກະຊວງເຕັກໂນໂລຊີ ແລະ ການສື່ສານ ສປປ ລາວ ນໍາໂດຍ ທ່ານ ໄຊລືຊາ ອິນສີຊຽງໃໝ່, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ນຳພາຄະນະເຂົ້າຮ່ວມກອງປະຊຸມສຳມະນາລະດັບສູງ ຂອງ ສະຫະພາບໂທລະຄົມມະນາຄົມສາກົນ (ITU) ແລະ ກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານ (MIIT) ສປ ຈີນ ໃນວັນທີ 8 ພະຈິກ 2024 ຜ່ານມາ, ທີ່ ນະຄອນຊົງຊິງ, ສປ ຈີນ, ໂດຍມີການນຳຂັ້ນສູງ, ບັນດາຊ່ຽວຊານ ຈາກບັນດາປະເທດ ທີ່ເປັນສະມາຊິກຂອງ ITU ແລະ ບັນດາຜູ້ຕາງໜ້າຈາກ ທາງພາກລັດ, ເອກະຊົນ, ອົງການຈັດຕັ້ງສາກົນທີ່ກ່ຽວຂ້ອງ ເຂົ້າຮ່ວມຫຼາຍກວ່າ 500 ທ່ານ.

ກອງປະຊຸມດັ່ງກ່າວ ຈັດຂຶ້ນພາຍໃຕ້ຄຳຂວັນ: “ນະວັດຕະກຳດິຈິຕອນ ເພື່ອການພັດທະນາທີ່ກວມລວມ ແລະ ຍືນຍົງ - Digital Innovation for Inclusive and Sustainable Development”, ຊຶ່ງມີຈຸດປະສົງ ເພື່ອເປັນ ເວທີປຶກສາຫາລືຂອງບັນດາການນຳຂັ້ນສູງຂອງບັນດາປະເທດສະມາຊິກ ITU ແລະ ແລກປ່ຽນຄວາມຄິດເຫັນ ກ່ຽວກັບ ວິໄສທັດ ແລະ ນະໂຍບາຍການຄຸ້ມຄອງ ໃນການພັດທະນາວຽກງານໄອຊີທີ ເພື່ອໃຫ້ບັນລຸຕາມແຜນພັດທະນາ ຢ່າງຍືນຍົງຂອງ ອົງການສະຫະປະຊາຊາດ (UN), ທິດທາງການຄຸ້ມຄອງເຕັກໂນໂລຊີໃນອະນາຄົດ ເປັນຕົ້ນແມ່ນ ວຽກງານ: 6G, ປັນຍາປະດິດ (AI), ກຸ່ມຂໍ້ມູນຜູກພັນ (Blockchain) ແລະ ອື່ນໆ.
ໂອກາດັ່ງກ່າວ, ທ່ານ ໄຊລືຊາ ອິນສີຊຽງໃໝ່, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ ໄດ້ຮັັບກຽດຂຶ້ນກ່າວໃນພິທີເປີດກອງປະຊຸມສຳມະນາ ຊຶ່ງໄດ້ເວົ້າເຖິງສະພາບການພັດທະນາວຽກງານ ໄອຊີທີ (ICT) ຂອງ ສປປ ລາວ ໃນຖານະທີ່ເປັນປະເທດກຳລັງພັດທະນາ ໄດ້ເອົາວຽກງານນະວັດຕະກຳດິຈິຕອນນຳໃຊ້ເຂົ້າໃນການແກ້ໄຂບັນຫາເລັ່ງດ່ວນ ແລະ ບັນດາສິ່ງທ້າທາຍ ໃນວຽກງານການຫັນເປັນດິຈິຕອນ ຂອງ ສປປ ລາວ ບໍ່ວ່າຈະເປັນການເສີມສ້າງຄວາມຫົດຢືດທາງເສດຖະກິດ, ການສ້າງຄວາມສະເໝີພາບທາງດ້ານດິຈິຕອນ ແລະ ກ້າວໄປເຖິງການພັດທະນາວຽກງານໄອຊີທີ ເພື່ອບັນລຸຕາມແຜນພັດທະນາທີ່ຍືນຍົງ. 

ພ້ອມດຽວກັນນັ້ນ, ເພື່ອເປັນການຜັນຂະຫຍາຍວຽກງານການຮ່ວມມືໃນຂອບສອງຝ່າຍ, ຄະນະຜູ້ແທນຝ່າຍລາວ ຍັງໄດ້ມີການພົບປະສອງຝ່າຍ ຮ່ວມກັບ ຄະນະຜູ້ແທນຝ່າຍ ສປ ຈີນ ນຳໂດຍ ທ່ານ Xiong Jijun, ຮອງລັດຖະມົນຕີ ກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານ (MIIT) ສປ ຈີນ ພ້ອມດ້ວຍຄະນະ, ຊຶ່ງໄດ້ມີການປຶກສາຫາລື, ແລກປ່ຽນຄວາມຄິດເຫັນ ໂດຍສະເພາະແມ່ນໝາກຜົນຂອງການຮ່ວມມືໃນໄລຍະຜ່ານມາ ແລະ ແຜນການຮ່ວມມືໃນຕໍ່ໜ້າ ໃນວຽກງານການພັດທະນາຂອງຂະແໜງເຕັກໂນໂລຊີ ແລະ ດິຈິຕອນ. ການພົບປະຄັ້ງນີ້ ຝ່າຍ ສປ ຈີນ ຍິນດີສືບຕໍ່ໃຫ້ການຊ່ວຍເຫຼືອ ກະຊວງເຕັກໂນໂລຊີ ແລະ ການສື່ສານ ສປປ ລາວ ໃນການພັດທະນາບຸກຄະລາກອນໃນວຽກງານ ໄອຊີທີ. 
ໃນຂອບອົງການຈັດຕັ້ງສາກົນ ກໍໄດ້ມີການມີການພົບປະກັບ  ທ່ານ Tomas Lamanauskas, ຮອງເລຂາທິການໃຫຍ່ຂອງ ສະຫະພາບໂທລະຄົມມະນາຄົມສາກົນ (ITU) ຊຶ່ງໄດ້ມີການປຶກສາຫາລືແລກປ່ຽນຂໍ້ມູນໃນ ການຄຸ້ມຄອງວຽກງານໂທລະຄົມມະນາຄົມ, ເຕັກໂນໂລຊີການສື່ສານຂໍ້ມູນຂ່າວສານໃນໄລຍະຜ່ານມາ ແລະ ແລກປ່ຽນ ຄວາມຄິດເຫັນ ກ່ຽວກັບ ບາງບັນຫາທີ່ຕ້ອງການໃຫ້ ITU ຊຸກຍູ້ ແລະ ສົ່ງເສີມ ເພື່ອເປັນການຊ່ວຍເຫຼືອ ສປປ ລາວ ໃນອະນາຄົດ ໂດຍສະເພາະໃນບາງວຽກງານທີ່ເປັນຈຸດສຸມໃນການພັດທະນາ ເປັນຕົ້ນແມ່ນ ວຽກງານການສື່ສານທາງ ອາວະກາດ, ລະບົບການແຈ້ງເຕືອນໄພພິບັດລ່ວງໜ້າ, ຄວາມຍືນຍົງທາງດ້ານອາວະກາດ, ປັນຍາປະດິດ ແລະ ພະລັງງານ ສີຂຽວ.