ສະຖາບັນຄົ້ນຄວ້ານຳໃຊ້ເຕັກໂນໂລຊີອັດສະລິຍະ, ກະຊວງເຕັກໂນໂລຊີ ແລະ ການສື່ສານ ຈັດຝຶກອົບຮົມການພັດທະນາຫຼັກສູດ ແລະ ຝຶກເພື່ອເປັນຄູຝຶກ ໃນຫົວຂໍ້ “ຄວາມຮູ້ພື້ນຖານກ່ຽວກັບອິນເຕີເນັດແຫ່ງຊັບພະສິ່ງ”ຫຼື Internet of Things (IoT). ຊຸດຝຶກອົບຮົມດັ່ງກ່າວໄດ້ຈັດຂຶ້ນໃນຕອນເຊົ້າຂອງວັນທີ 20 ພະຈິກ 2024, ທີ່ຫ້ອງປະຊຸມຂອງ ກະຊວງເຕັກໂນໂລຊີ ແລະ ການສື່ສານ (ເຂດຫຼັກ 3, ຕຶກ F), ໃຫ້ກຽດເປັນປະທານກ່າວເປີດໂດຍ ທ່ານ ປະລິຕະ ແສງຈັນທຣ໌, ຮອງຫົວໜ້າສະຖາບັນຄົ້ນຄວ້ານຳໃຊ້ເຕັກໂນໂລຊີອັດສະລິຍະ, ຊຶ່ງມີນັກວິທະຍາກອນ ແລະ ນັກສຳມະນາກອນ ຈາກບັນດາກົມ/ທຽບເທົ່າ ພາຍໃນກະຊວງ ແລະ ຫ້ອງການເມືອງ ສີສັດຕະນາກ ເຂົ້າຮ່ວມ ຈຳນວນ 50 ກວ່າທ່ານ.

ຈຸດປະສົງຂອງການຈັດຝຶກອົບຮົມໃນຄັ້ງນີ້ ແມ່ນເພື່ອຍົກລະດັບຄວາມຮູ້ຄວາມສາມາດດ້ານ IoT ໃຫ້ກັບນັກຮຽນ, ນັກສຶກສາ ແລະ ພະນັກງານ ຂົງເຂດວຽກງານເຕັກໂນໂລຊີ ແລະ ການສື່ສານ ທັງສູນກາງ ແລະ ທ້ອງຖິ່ນ ເພື່ອສ້າງຄວາມເຂັ້ມແຂງທາງດ້ານວິຊາການ. ໃນປັດຈຸບັນ, ເນື່ອງຈາກວຽກງານ IoT ເປັນວຽກບູລິມະສິດໃນການຂັບເຄື່ອນການຫັນເປັນດິຈິຕອນໃນທຸກຂະແໜງການ ຊຶ່ງເນື້ອໃນຂອງການຝຶກອົບຮົມໃນຄັ້ງນີ້ໄດ້ມີນັກວິທະຍາກອນຈາກພາຍໃນ ແລະ ອາຈານຈາກພາກວິຊາວິສະວະກຳເອເລັກໂຕຼນິກ ແລະ ໂທລະຄົມມະນາຄົມ ຜູ້ທີ່ມີບົດຮຽນ ແລະ ປະສົບການ ທາງດ້ານສະພາບລວມຂອງຂໍ້ມູນຂ່າວສານເຄືອຂ່າຍ, ພື້ນຖານລະບົບ IoT, ການຄວບຄຸມອຸປະກອນ ແລະ ປະຕິບັດຕົວຈິງ ເພື່ອມາຖ່າຍທອດຄວາມຮູ້ ຄວາມເຂົ້າໃຈກ່ຽວກັບວຽກງານ IoT ໃຫ້ແກ່ນັກສຳມະນາກອນ, ເປັນຕົ້ນແບບໃຫ້ແກ່ການພັດທະນາ ແລະ ນຳໃຊ້ເຕັກໂນໂລຊີເຕັກໂນໂລຊີ IoT ເຂົ້າໃນວິຊາຊີບ. ໃນການຝຶກອົບຮົມ ຜູ້ເຂົ້າຮ່ວມຈະໄດ້ເອົາໃຈໃສສຶກສາຮຽນຮູ້ທັງພາກທິດສະດີ ແລະ ທົດລອງຕົວຈິງ ພ້ອມທັງເປີດໂອກາດໃຫ້ມີການຖາມ-ຕອບ ເເລກປ່ຽນຄວາມຮູ້ເຊິ່ງກັນ ແລະ ກັນ. ຊຸດຝຶກອົບຮົມຄັ້ງນີ້ຈະໄດ້ດໍາເນີນໄປເປັນເວລາ 03 ວັນຈຶ່ງຈະສໍາເລັດ.

ຂ່າວ: ສະຖາບັນຄົ້ນຄວ້ານໍາໃຊ້ເຕັກໂນໂລຊີອັດສະລິຍະ

ພາບ: ພຸດດາວອນ ພາສຸວັນ