ໃນຕອນເຊົ້າຂອງວັນທີ 28 ພະຈິກ 2024 ນີ້, ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະ ໄດ້ສືບຕໍ່ລົງເຄື່ອນໄຫວຊຸກຍູ້ວຽກງານຫັນເປັນດິຈິຕອນ ຢູ່ ແຂວງ ສະຫວັນນະເຂດ ໂດຍໄດ້ຮັບການຕ້ອນຮັບອັນອົບອຸ່ນຂອງ ທ່ານ ບຸນໂຈມ ອຸບົນປະເສີດ, ເລຂາພັກແຂວງ, ເຈົ້າແຂວງສະຫວັນນະເຂດ. ຊຶ່ງໂອກາດດັ່ງກ່າວ ກໍໄດ້ມີການພົບປະເພື່ອແຈ້ງຈຸດປະສົງຂອງການລົງເຄື່ອນໄຫວຊຸກຍູ້ວຽກງານໃນຄັ້ງນີ້ຂອງຄະນະ, ພ້ອມນັ້ນ ທ່ານເຈົ້າແຂວງ ກໍໄດ້ລາຍງານສະພາບລວມການແຜນພັດທະນາເສດຖະກິດ-ສັງຄົມຂອງແຂວງ ຕໍ່ທ່ານລັດຖະມົນຕີ ແລະ ຄະນະຊາບ.

ພາຍຫຼັງສໍາເລັດການພົບປະ, ທັງສອງທ່ານ ກໍໄດ້ເຂົ້າຮ່ວມເປັນຄະນະປະທານໃນກອງປະຊຸມສໍາມະນາກ່ຽວກັບຄວາມຮູ້ພື້ນຖານການຫັນເປັນດິຈິຕອນ ແລະ ເຜີຍແຜ່ດໍາລັດ ວ່າດ້ວຍກອງທຶນພັດທະນາໂທລະຄົມມະນາຄົມ ແລະ ການຫັນເປັນດິຈິຕອນ ໃຫ້ແກ່ພະນັກງານພະແນກການ ແລະ ຂະແໜງການຕ່າງໆ ພາຍໃນ ແຂວງສະຫວັນນະເຂດ ຊຶ່ງໄດ້ດໍາເນີນໃນລະຫວ່າງ ວັນທີ 27-29 ພະຈິກ 2024, ໂດຍມີຜູ້ເຂົ້າຮ່ວມທັງໝົດ 100 ກວ່າທ່ານ ທີ່ມາຈາກພະແນກການ ແລະ ຂະແໜງການຕ່າງໆພາຍໃນແຂວງ. ໃນພິທີ, ຄະນະປະທານໄດ້ມີຄໍາເຫັນເນັ້ນໜັກອັນສອດຄ່ອງກັນ ຕໍ່ວຽກງານຫັນເປັນດິຈິຕອນ ຊຶ່ງເປັນວຽກງານທີ່ຈໍາເປັນໃນການຂັບເຄື່ອນການພັດທະນາເສດຖະກິດ-ສັງຄົມ ຂອງແຂວງ ກໍຄື ປະເທດ. ພ້ອມນັ້ນ, ກໍໄດ້ຊີ້ນໍາໃຫ້ຜູ້ເຂົ້າຮ່ວມສໍາມະນາເອົາໃຈໃສ່ຕິດຕາມຮຽນຮູ້ບົດຮຽນຈາກນັກວິທະຍາກອນ ທີ່ມາຈາກ ກະຊວງເຕັກໂນໂລຊີ ແລະ ການສື່ສານ ເພື່ອສາມາດນໍາເອົາຄວາມຮູ້ດັ່ງກ່າວໄປຖ່າຍທອດໃຫ້ແກ່ພະນັກງານໃນຂະແໜງການຕົນ.

ທ່ານ ແສງຈັນ ພະໄຊຍະແສງ, ຮອງຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ ໄດ້ລາຍງານໃຫ້ຊາບວ່າ: ຜ່ານການສໍາມະນາເປັນເວລາ 01 ວັນຜ່ານມາ ແມ່ນໄດ້ຮັບຄວາມເອົາໃຈໃສ່ເປັນຢ່າງດີ ດ້ວຍບັນຍາກາດຟົດຟື້ນ, ມ່ວນຊື່ນ ແລະ ອົບອຸ່ນ ຈາກຜູ້ບັນລະຍາຍ ແລະ ຜູ້ເຂົ້າຮ່ວມ. ຊຶ່ງຫົວຂໍ້ການນຳສະເໜີ ແມ່ນໄດ້ກຳນົດຕາມເອກກະສານຝຶກອົບຮົມຄວາມຮູ້ພື້ນຖານການຫັັນເປັນດິຈິຕອນ ຈໍານວນ 03 ເຫຼັ້ມ ລວມທັງໝົດ 15 ບົດ ຄື: ການປະຕິວັດອຸດສາຫະກໍາ 4.0, ເຕັກໂນໂລຊີ ແລະ ນະວັດຕະກໍາ, ເຕັກໂນໂລຊີຂໍ້ມູນຂ່າວສານ ແລະ ການສື່ສານ, ເຕັກໂນໂລຊີດິຈິຕອນ ແລະ ເຕັກໂນໂລຊີ ອັດສະລິຍະ, ເຕັກໂນໂລຊີ ໂລຈິສຕິກ ແລະ ການໄປສະນີ, ອິນເຕີເນັດ ແລະ ສື່ສັງຄົມອອນລາຍ, ຖານຂໍ້ມູນ (Database) ແລະ ເຕັກໂນໂລຊີກຸ່ມຂໍ້ມູນຜູກພັນ (Blockchain), ຄວາມປອດໄພໄຊເບີ, ຄວາມຮູ້ພື້ນຖານການບໍລິຫານລັດດິຈິຕອນ (Digital Government), ເສດຖະກິດດິຈິຕອນ ແລະ ທຸລະກໍາຊັບສິນດິຈິຕອນ, ສັງຄົມດິຈິຕອນ, ຍຸດທະສາດການຫັນເປັນດິຈິຕອນ ຂອງ ສປປ ລາວ, ການພັດທະນາຊັບພະຍາກອນມະນຸດດ້ານດິຈິຕອນ, ບັນດານິຕິກໍາ ກ່ຽວກັບການຫັນເປັນດິຈິຕອນ ຂອງ ສປປ ລາວ ແລະ ວຽກກວດກາຫັນເປັນດິຈິຕອນ.

ໂອກາດດຽວກັນນີ້, ກໍໄດ້ມີພິທີມອບ-ຮັບອຸປະກອນຄອມພິວເຕີ ຈໍານວນ 04 ຊຸດ ແລະ ປື້ມຄູ່ມືຄວາມຮູ້ພື້ນຖານກ່ຽວກັບການຫັນເປັນດິຈິຕອນ ຈໍານວນ 150 ຫົວ ໃຫ້ແກ່ ພະແນກເຕັກໂນໂລຊີ ແລະ ການສື່ສານ ແຂວງ ສະຫວັນນະເຂດ ເພື່ອນໍາໃຊ້ເຂົ້າໃນການຈັດຕັ້ງປະຕິບັດວຽກງານ ລວມເປັນມູນຄ່າ 83.000.000 ກີບ (ແປດສິບສາມລ້ານກີບ). ຊຶ່ງໃຫ້ກຽດມອບໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ຮັບໂດຍ ທ່ານ ລໍາແກ້ວ ແສງໜູທອງ, ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ ສະຫວັນນະເຂດ ແລະ ໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ບຸນໂຈມ ອຸບົນປະເສີດ, ເລຂາພັກແຂວງ, ເຈົ້າແຂວງສະຫວັນເຂດ.