ໃນໂອກາດລົງເຄື່ອນໄຫວຊຸກຍູ້ວຽກງານຫັນເປັນດິຈິຕອນ ຢູ່ ແຂວງ ສະຫວັນນະເຂດ ຢ່າງເປັນທາງການ, ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ (ກຕສ) ພ້ອມດ້ວຍຄະນະ ໄດ້ສືບຕໍ່ລົງຢ້ຽມຢາມ ແລະ ເຮັດວຽກ ຢູ່ ພະແນກເຕັກໂນໂລຊີ ແລະ ການສື່ສານ ແຂວງ ສະຫວັນນະເຂດ ໃນຕອນເຊົ້າຂອງວັນທີ 28 ພະຈິກ 2024, ໂດຍໄດ້ຮັບການຕ້ອນຮັບຂອງ ທ່ານ ລໍາແກ້ວ ແສງໜູທອງ, ຫົວໜ້າພະແນກເຕັກໂນໂລຊີ ແລະ ການສື່ສານ (ພຕສ) ແຂວງ ສະຫວັນນະເຂດ ພ້ອມດ້ວຍອ້າຍນ້ອງພະນັກງານ-ລັດຖະກອນ ຢ່າງພ້ອມພຽງ.

ໃນກອງປະຊຸມ, ທ່ານຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ ສະຫວັນນະເຂດ ໄດ້ລາຍງານສະພາບລວມ, ຜົນງານທີ່ພົ້ນເດັ່ນ, ຂໍ້ສະດວກ, ຂໍ້ຫຍຸ້ງຍາກ ໃນການເຄື່ອນໄຫວຈັດຕັ້ງປະຕິບັດວຽກງານຂອງພະແນກໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຕໍ່ທ່ານລັດຖະມົນຕີ ແລະ ຄະນະຊາບ, ພ້ອມທັງມີບາງຂໍ້ສະເໜີຈໍານວນໜຶ່ງ ເປັນຕົ້ນແມ່ນ ການຂໍໂກຕາລັດຖະກອນປະກອບເຂົ້າພະແນກຕື່ມ, ການຍົກລະດັບຄວາມຮູ້ໃຫ້ແກ່ບຸກຄະລາກອນ ທັງໄລຍະສັ້ນ-ໄລຍະຍາວ, ຂໍພະນັກງານລົງເຮັດວຽກຮາກຖານຢູ່ພະແນກ ແລະ ບັນຫາອື່ນໆ. ນອກຈາກນັ້ນ, ຍັງໄດ້ຮັບຟັງຄໍາເຫັນຂອງ ທ່ານຫົວໜ້າຫ້ອງການ, ຫົວໜ້າອົງການດັດສົມໂທລະຄົມມະນາຄົມ, ຮອງຫົວໜ້າສູນບໍລິຫານລັດດິຈິຕອນ ຈາກ ກະຊວງເຕັກໂນໂລຊີ ແລະ ການສື່ສານ ຕໍ່ບັນດາໜ້າວຽກທີ່ຕິດພັນ ເພື່ອຮັບປະກັນການຈັດຕັ້ງປະຕິບັດວຽກງານໃຫ້ສອດຄ່ອງກັນລະຫວ່າງ ຂັ້ນສູນກາງ ແລະ ທ້ອງຖິ່ນ.

ຕອນທ້າຍຂອງກອງປະຊຸມ, ທ່ານ ລັດຖະມົນຕີ ກຕສ ກໍໄດ້ສະແດງຄວາມຍ້ອງຍໍຊົມເຊີຍ ແລະ ໃຫ້ກຽດມີຄໍາເຫັນໂອ້ລົມ ເພື່ອເປັນເຂັມຊີ້ທິດເຍືອງທາງໃຫ້ແກ່ພະນັກງານ-ລັດຖະກອນ ພາຍໃນພະແນກດັ່ງກ່າວ ນໍາໄປຈັດຕັ້ງຜັນຂະຫຍາຍເຂົ້າໃນການປະຕິບັດວຽກງານຕົວຈິງໃຫ້ເກີດດອກອອກຜົນ.