ໂດຍອີງຕາມການລາຍງານໃນກອງປະຊຸມພົບປະການນໍາ ແລະ ກອງປະຊຸມຮ່ວມກັບຄະນະກໍາມະການຫັນເປັນດິຈິຕອນຂັ້ນແຂວງ (ຄຫດຂ), ຄະນະກໍາມະການຄຸ້ມຄອງອິນເຕີເນັດຂັ້ນ ແຂວງ (ຄຄອຂ) ຂອງ ແຂວງສະຫວັນນະເຂດ ຊຶ່ງໄດ້ຈັດຂຶ້ນໃນຕອນບ່າຍຂອງວັນທີ 28 ພະຈິກ ​2024 ຜ່ານມາ, ທີ່ຫ້ອງປະຊຸມຂອງ ຫ້ອງວ່າການ ແຂວງ ສະຫວັນນະເຂດ, ໂດຍໃຫ້ກຽດເຂົ້າຮ່ວມເປັນຄະນະປະທານຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຮອງປະທານຜູ້ປະຈໍາຄະນະກໍາມະການລະດັບຊາດ ເພື່ອການຫັນເປັນດິຈິຕອນ, ຮອງປະທານຜູ້ປະຈໍາການຄະນະກໍາມະການຄຸ້ມຄອງອິນເຕີເນັດແຫ່ງຊາດ ແລະ ທ່ານ ບຸນໂຈມ ອຸບົນປະເສີດ, ກຳມະການສູນກາງພັກ, ເລຂາພັກແຂວງ, ເຈົ້າແຂວງ ສະຫວັນນະເຂດ, ມີຫົວໜ້າຫ້ອງການ, ຫົວໜ້າອົງການດັດສົມໂທລະຄົມມະນາຄົມ, ຮອງຫົວໜ້າສູນບໍລິຫານລັດດິຈິຕອນ ຈາກ ກະຊວງເຕັກໂນໂລຊີ ແລະ ການສື່ສານ, ມີ ຄະນະກໍາມະການຫັນເປັນດິຈິຕອນ, ຄະນະກໍາມະການຄຸ້ມຄອງອິນເຕີເນັດຂັ້ນ ແຂວງ ສະຫວັນນະເຂດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ ຈໍານວນ 30 ກວ່າທ່ານ.

ໃນກອງປະຊຸມ, ທ່ານ ລໍາແກ້ວ ແສງໜູທອງ, ຫົວໜ້າພະແນກເຕັກໂນໂລຊີ ແລະ ການສື່ສານ, ຮອງປະທານຜູ້ປະຈໍາການ ຄະນະກໍາມະການຫັນເປັນດິຈິຕອນຂັ້ນແຂວງ, ຮອງປະທານຜູ້ປະຈໍາການ ຄະນະກໍາມະການຄຸ້ມຄອງອິນເຕີເນັດຂັ້ນ ແຂວງ ສະຫວັນນະເຂດ ໄດ້ລາຍງານໃຫ້ຊາບ 02 ໜ້າວຽກໃຫຍ່ ຄື: 01) ວຽກງານການຄຸ້ມຄອງອິນເຕີເນັດ: ແຂວງສະຫວັນນະເຂດ ໄດ້ຊຸກຍູ້ສົ່ງເສີມບັນດາບໍລິສັດຜູ້ໃຫ້ບໍລິການດ້ານໂທລະຄົມມະນາຄົມ ແລະ ອິນເຕີເນັດພາຍໃນແຂວງ ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງສັງຄົມ, ຂະຫຍາຍພື້ນຖານໂຄງລ່າງໃຫ້ກວ້າງຂວາງກວ່າເກົ່າ ຊຶ່ງໃນປັດຈຸບັນເຄື່ອຄ່າຍໂທລະຄົມກວມເອົາ 91,8% ຂອງພື້ນທີ່ບ້ານໃນທົ່ວແຂວງ, ສັນຍານອິນເຕີເນັດ 3G, 4G ກວມເອົາ 70% ຂອງພື້ນທີ່ພາຍໃນແຂວງ; ໄດ້ເຜີຍແຜ່ບັນດານິຕິກໍາຕ່າງໆ ທີ່ພົວພັນເຖິງການຄຸ້ມຄອງອິນເຕີເນັດ ແລະ ການຄຸ້ມຄອງສື່ສັງຄົມອອນລາຍ ໃຫ້ພະນັກງານ, ທະຫານ, ຕໍາຫຼວດ, ນາຍບ້ານ, ຄູອາຈານ ແລະ ນັກຮຽນນັກສຶກສາ ຢູ່ບັນດາເມືອງໄດ້ 11 ຕົວເມືອງ ແລະ ຍັງອີກ 03 ຕົວເມືອງ 01 ນະຄອນ ຊຶ່ງຈະຈັດຕັ້ງປະຕິບັດໃນເດືອນ ທັນວາ 2024 ໃຫ້ສໍາເລັດ; 02) ວຽກງານຫັນເປັນດິຈິຕອນ: ແຂວງສະຫວັນນະເຂດ ໄດ້ມີຄວາມກຽມພ້ອມດ້ານພື້ນຖານຈຳນວນໜຶ່ງໃນການຫັນເປັນດິຈິຕອນ, ໄດ້ເຄື່ອນໄຫວຊຸກຍູ້-ສົ່ງເສີມບັນດາຂະແໜງການ, ເມືອງຕ່າງໆ ໃຫ້ນຳໃຊ້ເຕັກໂນໂລຊີເຂົ້າໃນວຽກງານ ໂດຍໄດ້ຈັດຕັ້ງການຝຶກອົບຮົມການນຳໃຊ້ລະບົບບໍລິຫານພາກລັດ ເຊັ່ນ: G-chat, G-share ແລະ G-Drive ໃຫ້ຫ້ອງວ່າການເມືອງ, ຕິດຕັ້ງອຸປະກອນລະບົບການນຳໃຊ້ກອງປະຊຸມທາງໄກໄດ້ 4 ເມືອງ, ລົງເຜີຍແຜ່ ແລະ ເກັບກໍາຂໍ້ມູນການກຽມຄວາມພ້ອມໃນການຫັນເປັນດິຈິຕອນໄດ້ 4 ເມືອງ, ໄດ້ສໍາເລັດການເກັບກຳຂໍ້ມູນພື້ນຖານໃນການຫັນເປັນດິຈິຕອນ, ຫັນເປັນທັນສະໄໝຢູ່ພະແນກການອ້ອມຂ້າງແຂວງໄດ້ 28 ພາກສ່ວນ, ຂໍ້ມູນຈາກພະນັກງານທັງໝົດ 3.656 ຄົນ ມີພະນັກງານທີ່ຮຽນຈົບສາຂາເຕັກໂນໂລຊີ ຂໍ້ມູນຂ່າວສານ (IT) 15 ຄົນ, ສາຂາວິທະຍາສາດຄອມພິວເຕີ 12 ຄົນ, ສາຂາໂທລະຄົມ 05  ຄົນ, ສາຂາວິສະວະກໍາຄອມພິວເຕີ 01 ຄົນ. ຈາກຂໍ້ມູນດັ່ງກ່າວນີ້ ແຂວງສະຫັວນນະເຂດ ຍັງຂາດພະນັກງານວິຊາການດ້ານ ໄອທີ ເປັນຈຳນວນຫຼາຍ, ສະນັ້ນ ແຂວງສະຫວັນນະເຂດ ກຳລັງຢູ່ໃນໄລຍະກຽມຄວາມພ້ອມດ້ານພື້ນຖານໃຫ້ແກ່ການຫັນເປັນດິຈິຕອນ ແລະ ຫັນເປັນທັນສະໄໝ, ໂດຍສະເພາະແມ່ນການກຽມຄວາມພ້ອມດ້ານພື້ນຖານໂຄງລ່າງ, ວັດຖຸອຸປະກອນທີ່ຈຳເປັນໃນການນຳໃຊ້ ແລະ ກຽມຄວາມພ້ອມທາງດ້ານບຸກຄະລາກອນທີ່ມີຄວາມສາມາດນຳໃຊ້ເຕັກໂນໂລຊີເຂົ້າໃນການເຄື່ອນໄຫວວຽກງານໃນຂະແໜງການຢ່າງມີປະສິດທິພາບ.

ກອງປະຊຸມໄດ້ປຶກສາຫາລືບັນຫາວຽກງານປິ່ນອ້ອມກ່ຽວກັບການຫັນເປັນດິຈິຕອນໃນແຕ່ລະຂະແໜງການຂອງແຂວງ ເຊັ່ນ: ບັນດາລະບົບພື້ນຖານໂຄງລ່າງ, ອຸປະກອນ, ດ້ານການພັດທະນາບຸກຄະລາກອນ, ການບໍລິຫານຈັດການຕ່າງໆ ເປັນຕົ້ນ. ພ້ອມນັ້ນ, ກໍໄດ້ເປັນກຽດຮັບຟັງຄໍາເຫັນໂອ້ລົມຄະນະປະທານ ຊຶ່ງກອງປະຊຸມໄດ້ປິດລົງໃນຕອນແລງຂອງວັນດຽວກັນ.

ພາບ ແລະ ຂ່າວ: ບິນລີ້ ສີສຸລາດ