ໃນວັນທີ 28 ພະຈິກ 2024 ທີ່ ພັດຕະຄານ ດາວຮຸ່ງ ເເຂວງ ສະຫວັນນະເຂດ ໄດ້ຈັດພິທີເປີດໃຫ້ບໍລິການ 5G ຢ່າງເປັນທາງການ ໃຫ້ກຽດເປັນປະທານໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງເຕັກໂນໂລຊີ ເເລະ ການສື່ສານ ແລະ ໃຫ້ກຽດເຂົ້າເປັນປະທານຮ່ວມໂດຍ ທ່ານ ບຸນໂຈມ ອຸບົນປະເສີດ, ກໍາມະການສູນກາງພັກ, ເລຂາຄະນະພັກເເຂວງ, ເຈົ້າເເຂວງສະຫວັນນະເຂດ, ທ່ານ ສຸພົນ ຈັນທະວີໄຊ, ຄະນະບໍລິຫານງານພັກ ກະຊວງເຕັກໂນໂລຊີ ເເລະ ການສື່ສານ, ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ພ້ອມດ້ວຍຄະນະຜູ້ບໍລິຫານ-ພະນັກງານ ບໍລິສັດໃນເຄືອ, ຮ້ານຕົວແທນຈໍາໜ່າຍ, ຄູ່ຮ່ວມທຸລະກິດ ແລະ ບັນດາສື່ມວນຊົນກໍ່ໄດ້ໃຫ້ກຽດເຂົ້າຮ່ວມ.

​ບໍລິສັດ ລາວໂທລະຄົມມະນາຄົມ ມະຫາຊົນ ເປັນເຄືອຂ່າຍທຳອິດ ໃນ ສປປ ລາວ ທີ່ນໍາເຕັກໂນໂລຊີ 5G ເຂົ້າມາໃຫ້ບໍລິການສັງຄົມ ແລະ ປັດຈຸບັນໄດ້ຂະຫຍາຍບໍລິການ 5G ແລະ ເປີດນໍາໃຊ້ເຄືອຂ່າຍ 5G ເປັນທາງການ ຢູ່ແຂວງສະຫວັນນະເຂດ ຈຳນວນ 10 ຈຸດໃນເຂດນະຄອນໄກສອນພົມວິຫານ ນອກຈາກນີ້ໃນອະນາຄົດຍັງມີແຜນຂະຫຍາຍຕາມເຂດທີ່ເຫັນວ່າແທດເໝາະກັບການນຳໃຊ້ 5G, ໃນພິທີໄດ້ໃຫ້ ແພັກເກັດ ດາຕ້າ 5G ສຸດພິເສດ ໃຫ້ແຂກທີ່ເຂົ້າຮ່ວມງານ ແລະ ລູກຄ້ານໍາໃຊ້ບໍລິການ 5G ຢູ່ແຂວງສະຫັວນນະເຂດ ທົດລອງນໍາໃຊ້ໂດຍບໍ່ເສຍຄ່າ, ໃນໂອກາດວັນສໍາຄັນດັ່ງກ່າວ ທ່ານ ລັດຖະປັນຍາ ຂຽວວົງພະຈັນ ຮອງເລຂາຄະນະພັກ, ຮອງຜູ້ອຳນວຍການໃຫຍ່ຂະແໜງເຕັກນິກ ບໍລິສັດ ລາວໂທລະຄົມມະນາຄົມ ມະຫາຊົນ ຂຶ້ນກ່າວຈຸດປະສົງຂອງການເປີດໃຫ້ບໍລິການ 5G ແລະ ໃຫ້ກຽດໃນການກົດປຸ່ມເປີດພິທີຢ່າງເປັນທາງການ ໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງເຕັກໂນໂລຊີ ເເລະ ການສື່ສານ, ທ່ານ ບຸນໂຈມ ອຸບົນປະເສີດ, ກໍາມະການສູນກາງພັກ, ເລຂາຄະນະພັກເເຂວງ, ເຈົ້າເເຂວງໆສະຫວັນນະເຂດ, ທ່ານ ສຸພົນ ຈັນທະວີໄຊ, ຄະນະບໍລິຫານງານພັກກະຊວງ ເຕັກໂນໂລຊີ ເເລະ ການສື່ສານ, ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ. ຊຶ່ງພາຍໃນງານມີຮ້ານວາງສະແດງ ຂອງ ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ, ຄູ່ຮ່ວມທຸລະກິດ, ຕົວແທນຈໍາໜ່າຍ ແລະ ໄດ້ມີກິດຈະກໍາຫຼາກຫຼາຍໃນການສາທິດການນໍາໃຊ້ເຕັກໂນໂລຊີ 5G ບໍ່ວ່າຈະເປັນ ເຕັກໂນໂລຊີສໍາຫຼວດພື້ນທີ່ ໂດຍນໍາໃຊ້ Drone, iFarm solutions, Virtual Reality (ທ່ອງທ່ຽວ, ເກມ), M-Money X, My TPlus, Smart Rewards, ການທົດລອງນໍາໃຊ້ອິນເຕີເນັດຄວາມໄວສູງ 5G ແລະ ອີກຫລາຍບໍລິການທີ່ໄດ້ມີການວາງສະແດງພາຍໃນງານ.

ປັດຈຸບັນ ລາວ ໂທລະຄົມ ໄດ້ນໍາໃຊ້ບໍລິການລະບົບ 5G ຢູ່ນະຄອນຫຼວງວຽງຈັນ, ເເຂວງ ບໍ່ເເກ້ວ, ຫຼວງພະບາງ, ຈໍາປາສັກ ເເລະ ສະຫວັນນະເຂດ, ໂດຍກວມເອົາຂົງເຂດຕົວເມືອງ, ສະຖານທີ່ສໍາຄັນ, ແຫຼ່ງທ່ອງທ່ຽວຕ່າງໆ ແລະ ມີແຜນຂະຫຍາຍໄປໃນທົ່ວປະເທດ. ຊຶ່ງດັ່ງທີ່ພວກເຮົາຮູ້ນຳກັນວ່າ ເຕັກໂນໂລຊີ 5G ແມ່ນເຕັກໂນໂລຊີທີ່ທັນສະໄໝ ນໍາຄວາມກ້າວ ໜ້າມາສູ່ສັງຄົມ ແລະນຳໃຊ້ຢ່າງກວ້າງຂວາງໃນທົ່ວໂລກ ເຊັ່ນ: ທາງດ້ານທຸລະກິດ online, E-commerce, ນໍາໃຊ້ປັນຍາປະດິດ AI, IoT, Robotic ເຂົ້າໃນຫຼາຍຂົງເຂດອຸດສາຫະກໍາ, ກະສິກໍາ, ວຽກງານສາທານະສຸກ ຊຶ່ງລ້ວນແລ້ວແຕ່ເປັນການສ້າງເງື່ອນໄຂໃຫ້ສັງຄົມ ແລະ ຜູ້ຊົມໃຊ້ໄດ້ມີວິຖີຊີວິດນັບມື້ນັບສະດວກສະບາຍຂື້ນດ້ວຍຄວາມວ່ອງໄວ, ມີຄວາມປອດໄພສູງ ແລະ ສອດຄ່ອງໃນການຈັດຕັ້ງຜັນຂະຫຍາຍແນວທາງຂອງພັກ, ນະໂຍບາຍຂອງລັດ ກໍຄືວຽກງານຂອງ ກະຊວງເຕັກໂນໂລຊີ ເເລະ ການສື່ສານ ໃນການຫັນເປັນດິຈິຕອນ ຂອງ ສປປ ລາວ ຕາມ 3 ເສົາຄໍ້າຂອງລັດຖະບານ ຄື: ລັດຖະບານດິຈິຕອນ, ສັງຄົມດິຈິຕອນ ແລະ ເສດຖະກິດດິຈິຕອນ, ລາວ ໂທລະຄົມ ກໍເປັນສ່ວນໜຶ່ງໃນການນຳເອົາເຕັກໂນໂລຊີໃໝ່ໆ ເຂົ້າມານຳໃຊ້ເພື່ອຮອງຮັບກັບຄວາມຕ້ອງການຂອງສັງຄົມ ພ້ອມທັງຮັບປະກັນຄຸນນະພາບການໃຫ້ບໍລິການ ເພື່ອສະໜັບສະໜູນວຽກງານແຜນຍຸດທະສາດການສ້າງສາ ແລະ ພັດທະນາປະເທດຊາດ.

ລາວ ໂທລະຄົມ ຍັງສືບຕໍ່ມຸ່ງໝັ້ນໃນການພັດທະນາ ນໍາເອົາເຕັກໂນໂລຊີ ແລະ ນະວັດຕະກໍາໃໝ່ໆ ເຂົ້າມາຮັບໃຊ້ສັງຄົມລາວ ເພື່ອເປັນການປະກອບສ່ວນໃນການສ້າງສາ ແລະ ພັດທະນາປະເທດຊາດ ໃຫ້ມີຄວາມຮຸ່ງເຮືອງສີວິໄລ, ​ທັນສະໄໝໃນຍຸກດິຈິຕອນ ພ້ອມທັງຢູ່ຄຽງຂ້າງກັບສັງຄົມລາວ ດັ່ງຄໍາຂັວນທີ່ວ່າ: ລາວ ໂທລະຄົມ ໂທລະຄົມຂອງຄົນລາວ ເພື່ອສັງຄົມລາວ, We are Family.

ແຫຼ່ງຂໍ້ມູນ: Lao Telecom