ໃນຕອນເຊົ້າຂອງວັນທີ 04 ທັນວາ 2024, ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກະຊວງເຕັກໂນໂລຊີ ແລະ ການສື່ສານ (ຄກມດ ກຕສ) ໄດ້ເປີດຂະບວນການລະນຶກວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ 2024 ພາຍໃຕ້ຫົວຂໍ້:“ກ້າວໄປສູ່ 30 ປີ ແຫ່ງການຈັດຕັ້ງປະຕິບັດຖະແຫຼງການ ແລະ ແຜນປະຕິບັດງານປັກກິ່ງ: ຮ່ວມກັນເພື່ອຢຸດການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ໂດຍການເຂົ້າຮ່ວມເປັນປະທານ ແລະ ກ່າວມີຄຳເຫັນ ຂອງ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ, ປະທານຄະນະກໍາມາທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກຕສ, ໃນກອງປະຊຸມສຳມະນາດັ່ງກ່າວຍັງມີບັນດາທ່ານຜູ້ຕາງໜ້າຈາກບັນດາກະຊວງ, ຄະນະກົມ/ທຽບເທົ່າ, ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກະຊວງເຕັກໂນໂລຊີ ແລະ ການສື່ສານ ແລະ ນັກສຶກສາສະຖາບັນເຕັກໂນໂລຊີການສື່ສານຂໍ້ມູນຂ່າວສານ ເຂົ້າຮ່ວມ ຈໍານວນ 300 ກວ່າທ່ານ.

ຈຸດປະສົງເພື່ອໂຄສະນາປູກຈິດສຳນຶກ, ສົ່ງເສີມຄວາມຮັບຮູ້ ແລະ ຄວາມເຂົ້າໃຈໃຫ້ພະນັກງານ-ລັດຖະກອນ ກະຊວງເຕັກໂນໂລຊີ ແລະ ການສື່ສານ, ທັດສະນະຄະຕິ ແລະ ພຶດຕິກໍາທີ່ສະໜັບສະໜູນການເລືອກປະຕິບັດ ແລະ ການໃຊ້ຄວາມຮຸນແຮງຕໍ່ແມ່ຍິງ ທັງເພື່ອຈັດຕັ້ງຜັນຂະຫຍາຍແຜນດໍາເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ 05 ປີ ຄັ້ງທີ IX (2021-2025) ແລະ ແຜນດໍາເນີນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ 05 ປີ ຄັ້ງທີ II (2021-2025) ທີ່ຕິດພັນກັບພາລະບົດບາດຂອງ ກະຊວງເຕັກໂນໂລຊີ ແລະ ການສື່ສານ.

ໂອກາດດັ່ງກ່າວ, ທ່ານ ປອ. ສັນຕິສຸກ ສິມມາລາວົງ ໄດ້ກ່າວວ່າ: ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ເປັນບັນຫາທີ່ເກີດຂຶ້ນດົນນານມາແລ້ວ ໃນທົ່ວໂລກ. ປັດຈຸບັນ ກໍເປັນປາກົດການຫຍໍ້ທໍ້ອັນໜຶ່ງໃນສັງຄົມ ແລະ ສົ່ງຜົນກະທົບທາງລົບຕໍ່ການພັດທະນາເສດຖະກິດ-ສັງຄົມ ເວົ້າລວມ, ເວົ້າສະເພາະ ແມ່ນກະທົບຕໍ່ຮ່າງກາຍ, ຊີວິດຈິດໃຈ,  ຕະຫຼອດເຖິງຊັບສິນຂອງ ແມ່ຍິງ ແລະ ເດັກຍິງ. ໜຶ່ງໃນນັ້ນກໍແມ່ນຄວາມຮຸນແຮງຜ່ານທາງດິຈິຕອນທີ່ມີຜົນກະທົບອັນໃຫຍ່ຫຼວງຕໍ່ຜູ້ຖືກເຄາະຮ້າຍ ຫຼື ຜູ້ລອດຊີວິດ.

ຂະບວນການດັ່ງກ່າວໄດ້ຈັດເວທີເສວະນາ ໃນຫົວຂໍ້:“Stop Cyber Bullying”ເຊັ່ນ: ວິທີການຮັບມື ແລະ ແກ້ໄຂ, ກໍລະນີສຶກສາຜົນກະທົບຈາກການເຢາະເຢີ້ຍ, ການໃສ່ຮ້າຍປ້າຍສີຜ່ານສື່ດິຈິຕອນ, ອຸປະສັກ, ສິ່ງທ້າທາຍທີ່ພົບເຫັນໃນປັດຈຸບັນ, ສະຖິຕິຂອງໄພຄຸກຄາມຜ່ານສື່ດິຈິຕອນ ແລະ ອື່ນໆ ໂດຍການເຂົ້າຮ່ວມເປັນວິທະຍາກອນຈາກ ກະຊວງປ້ອງກັນຄວາມສະຫງົບ (ກົມໃຫຍ່ສັນຕິບານ), ສູນກາງສະຫະພັນແມ່ຍິງລາວ (ສູນໃຫ້ຄຳປຶກສາແມ່ຍິງ ແລະ ເດັກນ້ອຍ), ສູນສົ່ງເສີມ ແລະ ຖ່າຍທອດເຕັກໂນໂລຊີ, ກົມຄວາມປອດໄພໄຊເບີ ແລະ ນັກສຶກສາຈາກສະຖາບັນເຕັກໂນໂລຊີການສື່ສານຂໍ້ມູນຂ່າວສານ. ພ້ອມດຽວກັນນີ້, ຜູ້ເຂົ້າຮ່ວມຍັງໄດ້ປະກອບຄຳຄິດເຫັນ, ຄໍາປຶກສາຫາລື, ສົນທະນາແລກປ່ຽນ ແລະ ວາງແຜນຮ່ວມກັນໃນຕໍ່ໜ້າໃນການແກ້ໄຂບັນຫາດັ່ງກ່າວ ເພື່ອສ້າງໃຫ້ພະນັກງານ-ລັດຖະກອນ ລວມທັງສັງຄົມມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງຫຼາຍຂຶ້ນຕື່ມຕໍ່ກັບຂໍ້ມູນຂ່າວສານໃນການໃຊ້ຄວາມຮຸນແຮງຕໍ່ແມ່ຍິງ, ປັບປ່ຽນທັດສະນະຄະຕິ ແລະ ການປະພຶດແບບຈິນຕະນາການເກົ່າ ຮັບຮູ້ວ່າຄວາມຮຸນແຮງຕໍ່ແມ່ຍິງ ແລະ ເດັກຍິງ ແມ່ນເປັນການລະເມີດສິດທິມະນຸດ ກ້າວໄປສູ່ທັດສະນະຄະຕິເຄົາລົບ ແລະ ນັບຖືກຽດສັກສີຂອງແມ່ຍິງ.

ຂ່າວ: ພະແນກຄວາມກ້າວໜ້າຂອງແມ່ຍິງ, ແມ່ ແລະ ເດັກ