ໃນລະຫວ່າງວັນທີ 11-15 ພະຈິກ 2024 ທີ່ຜ່ານມາ, ອົງການດັດສົມໂທລະຄົມມະນາຄົມ, ກະຊວງເຕັກໂນໂລຊີ ແລະ ການສື່ສານ ໄດ້ເດີນທາງໄປທີ່ປະເທດຍີ່ປຸ່ນ ເພື່ອເຂົ້າຮ່ວມລາຍງານການຈັດຕັ້ງປະຕິບັດໂຄງການທີ່ໄດ້ຮັບການຄັດເລືອກ ຈາກ ອົງການ ໂທລະຄົມມະນາຄົມ ອາຊີ-ປາຊີຟິກ (APT) (APT) ພາຍໃຕ້ຫົວຂໍ້“implementation of Quality Inspection Center for mobile broadband network in Lao PDR”(ໂຄງການຈັດສ້າງ ສູນກວດກາຄູນນະພາບການບໍລີການເຄືອຂ່າຍໂທລະສັບມືຖື ໃນ ສປປ ລາວ) ຮ່ວມກັບອົງການ KDDI foundation ທີ່ ໂຕກຽວ, ຢາມາງຸຈິ ແລະ ຟຸກຸໂອະກະ, ປະເທດຍີ່ປຸ່ນ, ນໍາໂດຍ ທ່ານ ສຸດໃຈ ລໍລອນສີ, ຫົວໜ້າ ອົງການດັດສົມໂທລະຄົມມະນາຄົມ ແລະ ທ່ານ ປອ. ນ. ສຸດາລິນ ຄວງວິຈິດ, ຮອງຫົວໜ້າພະແນກ ໄດ້ນຳພາ ພະນັກງານວິຊາການ ພາຍໃນອົງການດັດສົມໂທລະຄົມມະນາຄົມ ຈຳນວນ 4 ທ່ານ ເຂົ້າຮ່ວມ.

ອົງການດັດສົມໂທລະຄົມມະນາຄົມ ແລະ ອົງການ KDDI foundation ໄດ້ຮ່ວມ ສະຫຼຸບຜົນການຈັດຕັ້ງໃນໄລຍະຜ່ານມາ ແລະ ປຶກສາຫາລື ກ່ຽວກັບແຜນການຈັດຕັ້ງປະຕິບັດໃນຕໍ່ໜ້າທີ່ສູນກາງ ຂອງ KDDI foundation, ແລະ ລາຍງານວຽກດັ່ງກ່າວ ຕໍ່ ທ່ານ ຮານາຮາຣະ ຄັດຊຶິໂຕຊິ (Mr. Hanahara Katsutoshi), ປະທານ ຂອງ KDDI Foundation.

ຫຼັງຈາກນັ້ນ ຄະນະ ຍັງໄດ້ເດີນທາງໄປເຂົ້າພົບ ທ່ານ ອິຊິດະ ເອອິຈິ (Mr. Ishida Eiji)  ຫົວຫນ້າກົມຜູ້ຮັບຜິດຊອບວຽກຮ່ວມມືສາກົນ (Director of international digital infrastructure promotion division, Global Strategy Bureau) ກະຊວງພາຍໃນ ແລະ ການສື່ສານ ປະເທດ ຍີ່ປຸ່ນ ພ້ອມທັງເປັນຄະນະຮັບຜິດຊອບ ຂອງ ອົງການ APT ເພື່ອລາຍງານຜົນ ແລະ ແຜນການຈັດຕັ້ງປະຕິບັດໂຄງການດັ່ງກ່າວ. ທ່ານ ອິຊິດະ ເອອິຈິ ໄດ້ໃຫ້ຄຳແນະນຳຄະນະ ຈາກອົງການດັດສົມໂທລະຄົມ ເພື່ອສືບຕໍ່ໃຫ້ໂຄງການດັ່ງກ່າວຍືນຍົງຕໍ່ໄປ.

ນອກຈາກນັ້ນ, ຄະນະທັງໝົດ ໄດ້ໄປແລກປ່ຽນຖອດຖອນບົດຮຽນ ກ່ຽວກັບ ວຽກງານການຮັບມື ແລະ ປ້ອງກັນຄວາມເສຍຫາຍທີ່ເກີດຈາກເຫດການໄພພິບັດທາງທຳມະຊາດ ໂດຍນຳໃຊ້ລະບົບເຕັກໂນໂລຊີການແຈ້ງເຕືອນເຫດໄພພິບັດລ່ວງໜ້າຜ່ານອຸປະກອນສື່ສານໂທລະຄົມ, ທີ່ສະຖາບັນເຕັກໂນໂລຊີ ແລະ ການສື່ສານແຫ່ງຊາດຂອງຍີ່ປຸ່ນ ແລະ ໄປແລກປ່ຽນບົດຮຽນກ່ຽວກັບການນຳໃຊ້ລະບົບເຕັກໂນໂລຊີທັນສະໄໝໃນການຄູ້ມຄອງຈັດການ ການຂົນສົ່ງອຸປະກອນເອເລັກໂຕຣນິກ ແລະ ອູປະກອນສື່ສານຕ່າງໆ ຢູ່ທີ່ສູນກາງການຂົນສົ່ງຂອງ ເຄືອຂ່າຍ KDDI ທີ່ ໂຕກຽວ ປະເທດຍີ່ປຸ່ນ. ຫຼັງຈາກນັ້ນ, ຄະນະ ທັງໝົດໄດ້ເດີນທາງ ໄປແລກປ່ຽນ ແລະ ຖອດຖອນບົດຮຽນ ກ່ຽວກັບການຄຸ້ມຄອງ ແລະ ການນຳໃຊ້ໃນວຽກງານການສື່ສານ ຜ່ານດາວທຽມ ທີ່ສູນດຽວທຽມ ແລະ ບົດຮຽນກ່ຽວກັບການຮັບມືກ່ອນ ແລະ ຫຼັງເກີດເຫດໄພພິບັດ, ການວາງແຜນການເຂົ້າຊ່ວຍເຫຼືອພາຍຫຼັງເກີດເຫດໄພພິບັດທາງທຳມະຊາດ, ເພື່ອໃຫ້ຜູ້ປະສົບໄພສາມາດນຳໃຊ້ເຄືອຂ່າຍໂທລະຄົມ ແລະ ອິນເຕີເນັດໃນການຕິດຕໍ່ສື່ສານ ທີ່ເຄືອຂ່າຍ KDDI ຢູ່ແຂວງ ຢາມາງຸຈິ ແລະ ຟຸກຸໂອະກະ ທາງ ພາກໃຕ້ ຂອງ ປະເທດຍີ່ປຸ່ນ.

ຂ່າວ ແລະ ພາບ: ອົງການດັດສົມໂທລະຄົມ