ກົມເຕັກໂນໂລຊີດິຈິຕອນ ສະຫຼຸບ, ຖອດຖອນບົດຮຽນ ໂຄງການສະໜັບສະໜູນສ້າງສວນອຸທິຍານດິຈິຕອນ ຢູ່ ສປປ ລາວ ແລະ ຝຶກອົບຮົມຊ່ຽວຊານໄອທີAnchor

05/12/2024

ກົມເຕັກໂນໂລຊີດິຈິຕອນ ສະຫຼຸບ, ຖອດຖອນບົດຮຽນ ໂຄງການສະໜັບສະໜູນສ້າງສວນອຸທິຍານດິຈິຕອນ ຢູ່ ສປປ ລາວ ແລະ ຝຶກອົບຮົມຊ່ຽວຊານໄອທີAnchor

ກົມເຕັກໂນໂລຊີດິຈິຕອນ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມໂຄງການສະໜັບສະໜູນສ້າງສວນອຸທິຍານດິຈິຕອນ ຢູ່ ສປປ ລາວ ແລະ ຝຶກອົບຮົມຊ່ຽວຊານໄອທີ ຂຶ້ນໃນວັນທີ 04 ທັນວາ 2024 ຜ່ານມາ, ທີ່ຫ້ອງປະຊຸມໃຫຍ່ ຊັ້ນ 4 ຕຶກສູນເຕັກໂນໂລຊີການສື່ສານຂໍ້ມູນຂ່າວສານ. ໂດຍການເປັນປະທານກ່າວເປີດຂອງ ທ່ານ ໄຊລືຊາ ອິນສີຊຽງໃໝ່, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ມີບັນດາຄະນະກົມ/ທຽບເທົ່າ, ຜູ້ຊ່ຽວຊານ, ກະຊວງອ້ອມຂ້າງ, ຂັ້ນວິຊາການ ເຂົ້າຮ່ວມ ຈຳນວນ 40 ກວ່າທ່ານ.

ຈຸດປະສົງກອງປະຊຸມໃນຄັ້ງນີ້ ກໍເພື່ອສະຫຼຸບຜົນງານ ແລະ ຖອດຖອນບົດຮຽນ ການຈັດຕັ້ງປະຕິບັດ ໂຄງການສະໜັບສະໜູນສ້າງສວນອຸທິຍານດິຈິຕອນ ຂອງ ສປປ ລາວ ແລະ ຝຶກອົບຮົມຊ່ຽວຊານໄອທີ ໃນໄລຍະ 01 ປີ, ພ້ອມທັງຮ່ວມກັນກໍານົດຄາດໝາຍ ແລະ ແຜນການຈັດຕັ້ງປະຕິບັດໂຄງການໃນປີ 2025 ເພື່ອຮັບປະກັນໃຫ້ການຈັດຕັ້ງປະຕິບັດໂຄງການໃນປີຕໍ່ໄປໄດ້ຮັບຜົນສໍາເລັດອັນຍິ່ງໃຫຍ່ກວ່າປີທີ່ຜ່ານມາ. ໃນທີ່ປະຊຸມ, ທ່ານຮອງລັດຖະມົນຕີ ໄດ້ກ່າວວ່າ: ສປປ ລາວ ກໍາລັງຂຸ້ນຂຽວຜັນຂະຫຍາຍຈັດຕັ້ງປະຕິບັດ ວິໄສທັດການພັດທະນາເສດຖະກິດດິຈິຕອນ ແຫ່ງຊາດ ໄລຍະ 20 ປີ ຮອດປີ 2040, ຍຸດທະສາດການພັດທະນາເສດຖະກິດດິຈິຕອນ ແຫ່ງຊາດ ໄລຍະ 10 ປີ ຮອດປີ 2030 ແລະ ແຜນພັດທະນາເສດຖະກິດດິຈິຕອນແຫ່ງຊາດ ໄລຍະ 5 ປີ ຮອດປີ 2025 ໂດຍໃນປີ 2025 ທີ່ຈະມາເຖິງນີ້ ກໍຈະຮອດວາລະການສະຫຼຸບຕີລາຄາ ແລະ ປະເມີນຜົນການຈັດຕັ້ງປະຕິບັດແຜນພັດທະນາເສດຖະກິດດິຈິຕອນແຫ່ງຊາດ ຊຶ່ງໂຄງການສະໜັບສະໜູນສ້າງສວນອຸທິຍານດິຈິຕອນ ຢູ່ ສປປ ລາວ ແລະ ຝຶກອົບຮົມຊ່ຽວຊານໄອທີ ກໍເປັນໜຶ່ງໃນໂຄງການທີ່ນອນໃນ ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນແຫ່ງຊາດ ແລະ ກໍຖືວ່າ​ເປັນໂຄງການບູລິມະສິດສຳຄັນ ຂອງລັດຖະບານ ພາຍໃຕ້ການຮ່ວມມື ລະຫວ່າງ ກະຊວງເຕັກໂນໂລຊີ ແລະ ການສື່ສານ (MTC) ຂອງ ສປປ ລາວ ແລະ ກະຊວງສົ່ງເສີມທຸລະກິດຂະໜາດນ້ອຍ, ຂະໜາດກາງ ແລະ ທຸລະກິດໃໝ່ ຂອງ ສ. ເກົາຫຼີ (MSS). ໂຄງການດັ່ງກ່າວນີ້ ແມ່ນຕິດພັນກັບຫຼາຍແຜນງານ ແລະ ຕົວຊີ້ວັດຂອງວຽກງານການພັດທະນາເສດຖະກິດດິຈິຕອນແຫ່ງຊາດ ເປັນຕົ້ນແມ່ນ ແຜນງານທີ 6 ວ່າດ້ວຍການພັດທະນາຊັບພະຍາກອນມະນຸດທາງດ້ານດິຈິຕອນ, ແຜນງານທີ 7 ວ່າດ້ວຍການສົ່ງເສີມການດໍາເນີນທຸລະກິດບໍລິການຂອງ MSME ແລະ ສ້າງທຸລະກິດແບບສະຕາດອັບ, ແຜນງານທີ 8 ວ່າດ້ວຍການສົ່ງເສີມການເພີ່ມປະສິດທິພາບການຜະລິດດ້ວຍລະບົບເຕັກໂນໂລຊີດິຈິຕອນ ແລະ ແຜນງານທີ 14 ວ່າດ້ວຍການເປີດກວ້າງການຮ່ວມມືດ້ານດິຈິຕອນກັບຕ່າງປະເທດ ຊຶ່ງເຫັນໄດ້ວ່າໂຄງການດັ່ງກ່າວ ເປັນການຊຸກຍູ້ສົ່ງເສີມການພັດທະນາວຽກງານເຕັກໂນໂລຊີດິຈິຕອນຂອງ ສປປ ລາວ ແລະ ຍັງເປັນໂຄງການທີ່ຈະຊ່ວຍສະໜັບສະໜູນບັນດາຫົວໜ່ວຍທຸລະກິດໄອຊີທີ ຂອງ ສປປ ລາວ ໄດ້ຢ່າງເປັນຮູບປະທໍາ.

ໃນກອງປະຊຸມ ໄດ້ຮັບຟັງການຂຶ້ນນຳສະເໜີພາບລວມຄວາມຄືບໜ້າຂອງໂຄງການ ແລະ ສະເໜີແຜນປີ 2025 ໂດຍ ທ່ານ ປະສິດທິເດດ ຫຼວງວິໄລ, ຫົວໜ້າສູນຂໍ້ມູນດິຈິຕອນ ແລະ ຕ່າງໜ້າຈາກອົງການສະມາຄົມ ສວນອຸທິຍານເຕັກໂນໂລຊີ ສ. ເກົາຫຼີ (KTPA), ຫຼັງຈາກນັ້ນ ກໍໄດ້ປະກອບຄວາມຄິດເຫັນ ແລະ ແລກປ່ຽນສົນທະນາຕໍ່ການສະເໜີ ດ້ວຍຄວາມຟົດຟື້ນ.

ຂ່າວ: ກົມເຕັກໂນໂລຊີດິຈິຕອນ

 

 

ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນ ແຫ່ງຊາດ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2022
ຖະແຫຼ່ງການ ສະເຫຼີມສະຫຼອງ ວັນໄປສະນີໂລກ ຄົບຮອບ 149 ປີ
ວີດີໂອແນະນໍາ ການຂຶ້ນທະບຽນເລກໝາຍໂທລະສັບ
ລະ​ບົບ​ຂື້ນ​ທະ​ບຽນ​ປະ​ຊຸມ