ໃນຕອນເຊົ້າຂອງວັນທີ 05 ທັນວາ 2024, ທີ່ໂຮງແຮມ ລາດຊະວົງ ວັນດາ ວິສຕ້າ, ນະຄອນຫຼວງວຽງຈັນ ໄດ້ຈັດກອງປະຊຸມສຳມະນາການຂັບເຄື່ອນການຫັນເປັນລັດດິຈິຕອນ ແລະ ບໍລິການດິຈິຕອນ ເພື່ອສະໜັບສະໜູນ ເສດຖະກິດດິຈິຕອນ ຂອງ ສປປ ລາວ. ໂດຍການເປັນປະທານຂອງ ທ່ານ ຄຳຜາຍ ອິນທະຣາ, ຮອງຫົວໜ້າສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ, ມີຜູ້ເຂົ້າຮ່ວມຈາກບັນດາກະຊວງ/ອົງການທຽບເທົ່າ ແລະ ພາກສ່ວນທຸລະກິດເຂົ້າຮ່ວມທັງໝົດຈຳນວນ 90 ກວ່າທ່ານ.

ຈຸດປະສົງຂອງກອງປະຊຸມ ແມ່ນເພື່ອເຜີຍແຜ່ວຽກງານການຫັນເປັນລັດຖະບານດິຈິຕອນ, ບັນດາການບໍລິການຕ່າງໆ ຂອງ ພາກລັດ ແລະ ເອກະຊົນ, ລວມທັງພາກທະນາຄານ, ການເງິນ ທີ່ສົ່ງເສີມການພັດທະນາ ເສດຖະກິດດິຕິຕອນ ຂອງ ສປປ ລາວ. ຊຶ່ງໄດ້ມີການນຳສະເໜີບັນດາລະບົບຈາກສູນບໍລິຫານລັດດິຈິຕອນ, ສະມາຄົມໄອຊີທີ ແລະ ດິຈິຕອນຂອງລາວ (LIDA), ບໍລິສັດ ລາວໂທລະຄົມມະນາຄົມ ມະຫາຊົນ, ທະນາຄານແຫ່ງ ສປປ ລາວ ແລະ ບໍລິສັດ MelpApp. ນອກຈາກນັ້ນ, ບັນດາຜູ້ເຂົ້າຮ່ວມຍັງຈະໄດ້ຮັບຟັງ ການນຳສະເໜີ ກ່ຽວກັບລະບົບ Melp App ຊຶ່ງເປັນພລັດຟອມ ລະບົບກອງປະຊຸມທາງໄກ ຄ້າຍຄືກັບລະບົບ Zoom, Microsoft Team ແລະ ອື່ນໆ ທີ່ໄດ້ພັດທະນາຂຶ້ນໂດຍປະເທດອິນເດຍ ຊຶ່ງເປັນປະເທດໜຶ່ງທີ່ມີນັກພັດທະນາລະບົບ (Software Developers)  ທີ່ເກັ່ງກ້າວໜ້າ ແລະ ມີຄວາມສາມາດຫຼາຍທີ່ສຸດໃນໂລກ. ລະບົບ Melp App ເປັນລະບົບທີ່ມີຄວາມຫຼາກຫຼາຍຟັງເຊິນໃນການນໍາໃຊ້ ສາມາດນໍາໃຊ້ເຂົ້າໃນວຽກງານຕົວຈິງ ແລະ ໃນປັດຈຸບັນເລີ່ມມີການນໍາໃຊ້ຢ່າງກວ້າງຂວາງໃນທົ່ວໂລກ. 

ໃນກອງປະຊຸມສຳມະນາຄັ້ງນີ້, ທ່ານ ຄຳຜາຍ ອິນທະຣາ ໄດ້ຍົກໃຫ້ເຫັນເຖິງຄວາມສໍາຄັນຂອງເສດຖະກິດດິຈິຕອນ ໂດຍການນຳໃຊ້ເຕັກໂນໂລຊີ ເພື່ອຊຸກຍູ້ເສດຖະກິດ-ສັງຄົມ ແລະ ສິ່ງແວດລ້ອມ ເພື່ອຮັບປະກັນການພັດທະນາເສດຖະກິດແບບຍືນຍົງ, ປັບປຸງຊີວິດການເປັນຢູ່ດີຂຶ້ນ. ຊຶ່ງການຫັນເປັນດິຈິຕອນ ແມ່ນການຫັນເອົາເຕັກໂນໂລຊີດິຈິຕອນເຂົ້າມານໍາໃຊ້ໃນທຸກຂົງເຂດຂອງການພັດທະນາເສດຖະກິດ-ສັງຄົມ ແລະ ການບໍລິຫານວຽກງານຂອງພັກ-ລັດ ກໍຄືໃນການດຳເນີນທຸລະກິດ ແລະ ໃຊ້ຊີວິດການເປັນຢູ່ຂອງທົ່ວສັງຄົມໃນຂອບເຂດທົ່ວປະເທດ ເພື່ອເຮັດໃຫ້ການຜະລິດ ແລະ ການພົວພັນການຜະລິດ ມີປະສິດຕິພາບ ແລະ ມີຄຸນະພາບໃໝ່ທີ່ດີຂຶ້ນກວ່າເກົ່າ. ທັງເປັນຂະບວນວິວັດທີ່ສໍາຄັນ ຊຶ່ງເປັນທ່າອ່ຽງລວມຂອງໂລກ, ໃນອາຊຽນ ກໍໄດ້ເປັນເອກະພາບກັນວ່າ ການຫັນເປັນດິຈິຕອນ ເປັນບັນຫາທີ່ສໍາຄັນ ແລະ ຮີບດ່ວນ ຂອງບັນດາປະເທດອາຊຽນໃນຍຸກປັດຈຸບັນ. ສະນັ້ນ, ການຫັນເປັນດິຈິຕອນຢູ່ ສປປ ລາວ ຈຶ່ງເປັນພາລະກິດປະຕິວັດທີ່ສຳຄັນ ໃນການຫັນເປັນອຸດສາຫະກຳ ແລະ ທັນສະໄໝ ຕາມແນວທາງປ່ຽນແປງໃໝ່ຂອງພັກ ແລະ ເພື່ອບຸກທະລຸການພັດທະນາເສດຖະກິດ-ສັງຄົມ ຂອງປະເທດເຮົາໃນສະເພາະໜ້າ ແລະ ຍາວນານ.

ໃນໂອກາດນີ້, ບັນດາຜູ້ຕາງໜ້າ ຈາກກະຊວງ-ອົງການລັດ ລວມໄປເຖິງຫົວໜ່ວຍທຸລະກິດ ທີ່ກ່ຽວຂ້ອງກັບວຽກງານດັ່ງກ່າວ ໄດ້ຂຶ້ນການນຳສະເໜີການຂັບເຄື່ອນນະວັດຕະກຳດິຈິຕອນ, ບົດບາດຄວາມກ້າວໜ້າຂອງການເຊື່ອມໂຍງ, ການບໍລິການລະບົບຄລາວ ແລະ ການແກ້ໄຂທາງດ້ານການເງິນແບບດິຈິຕອນ. ພ້ອມນີ້, ຍັງໄດ້ມີການແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນ ເຊິ່ງກັນ ແລະ ກັນ ລະຫວ່າງ ແຂກຜູ້ເຂົ້າຮ່ວມ ກັບ ນັກວິທະຍາກອນ ກ່ຽວກັບບັນດາບົດນຳສະເໜີພາຍໃນກອງປະຊຸມ.