ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມວຽກງານ ເຕັກໂນໂລຊີ ແລະ ການສື່ສານ ໃນໄລຍະປີ 2021-2025 ຂຶ້ນໃນຕອນບ່າຍຂອງວັນທີ 02 ເມສາ 2025, ທີ່ຫໍປະຊຸມແຫ່ງຊາດ ໂດຍການເປັນປະທານຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຮອງລັດຖະມົນຕີ, ບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ-ຮອງຫົວໜ້າ ພະແນກເຕັກໂນໂລຊີ ແລະ ການສື່ສານ ທົ່ວປະເທດ ແລະ ພະນັກງານຫຼັກແຫຼ່ງເຂົ້າຮ່ວມ.

ໃນກອງປະຊຸມຄັ້ງນີ້, ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ລາຍງານກ່ຽວກັບ ການຈັດຕັ້ງປະຕິບັດແຜນພັດທະນາເຕັກໂນໂລຊີ ແລະ ການສື່ສານ ໄລຍະ 2021-2025 ຊຶ່ງໄດ້ຍົກໃຫ້ເຫັນ ຜົນສໍາເລັດ, ຂໍ້ຄົງຄ້າງ ແລະ ວິທີແກ້ໄຂ ໂດຍສະເພາະແມ່ນການຈັດຕັ້ງປະຕິບັດ 2 ວາລະແຫ່ງຊາດ ທີ່ຕິດພັນກັບຂະແໜງເຕັກໂນໂລຊີ ແລະ ການສື່ສານ ຄື: ວາລະແຫ່ງຊາດວ່າດ້ວຍການແກ້ໄຂບັນຫາເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ. ພ້ອມດຽວກັນ, ກໍໄດ້ວາງທິດທາງແຜນພັດທະນາ ຂະແໜງເຕັກໂນໂລຊີ ແລະ ການສື່ສານ ໃນໄລຍະ 2026-2030 ຊຶ່ງຈະເລັ່ງໃສ່ການສົ່ງເສີມ ແລະ ນໍາໃຊ້ ໂທລະຄົມມະນາຄົມ, ເຕັກໂນໂລຊີການສື່ສານຂໍ້ມູນຂ່າວສານ ທີ່ທັນສະໄໝ, ມີຄວາມປອດໄພສູງ ເຂົ້າໃນທຸກຂະແໜງການ ເສດຖະກິດ-ສັງຄົມ ແຕ່ສູນກາງລົງຮອດທ້ອງຖິ່ນ; ນຳໃຊ້ຜົນສຳເລັດຂອງການຄົ້ນຄວ້າ ແລະ ຖ່າຍທອດເຕັກໂນໂລຊີ ແລະ ນະວັດຕະກຳ ເພື່ອຍູ້ແຮງຂະບວນການຜະລິດສິນຄ້າ, ການບໍລິການໃຫ້ກາຍເປັນຜະລິດຕະພັນທີ່ມີຄວາມຫຼາກຫຼາຍ ສາມາດສ້າງມູນຄ່າເພີ່ມ ແລະ ມີຄວາມອາດສາມາດໃນການແຂ່ງຂັນ; ແລະ ພັດທະນາຊັບພະຍາກອນມະນຸດທາງດ້ານດິຈິຕອນ ໃຫ້ມີຄຸນນະພາບສູງ. ໂດຍຈະສືບຕໍ່ສຸ່ມໃສ່ 4 ວຽກບູລິມະສິດສໍາຄັນ ຄື: (1) ສ້າງລັດດດິຈິຕອນ;  (2) ພັດທະນາລະບົບການຊໍາລະສະສາງດິຈິຕອນ;  (3) ຊຸກຍູ້ສົ່ງເສີມສະຕາດອັບ (Start-up)  ຫຼື ທຸລະກິດນຳໃຊ້ນະວັດຕະກຳໃໝ່ ແລະ ພັດທະນາລະບົບນິເວດ ດິຈິຕອນ (Ecosystem) ແລະ (4) ພັດທະນາບຸກຄະລາກອນ ດິຈິຕອນ ຄ່ຽງຄູ່ກັບການສ້າງລາຍຮັບເຂົົ້າງົບປະມານລັດເພື່ອເປັນການປະກອບສ່ວນສຳຄັນຕໍ່ການພັດທະນາເສດຖະກິດ-ສັງຄົມ.

ກອງປະຊຸມຍັງໄດ້ຮັບຟັງການລາຍງານສະພາບລວມ ແລະ ຂໍ້ສະເໜີ ຈາກພະແນກເຕັກໂນໂລຊີ ແລະ ການສື່ສານ ແຂວງ/ນະຄອນຫຼວງ ພ້ອມທັງຄົ້ນຄວ້າແລກປ່ຽນ ແລະ ປຶກສາຫາວິທີທາງແກ້ໄຂໃນຕໍ່ໜ້າ.

ກອງປະຊຸມດັ່ງກ່າວ ແມ່ນໜຶ່ງໃນກິດຈະກໍາຂອງງານສັບປະດາດິຈິຕອນ 2025.