ໃນຕອນບ່າຍຂອງວັນທີ 02 ເມສາ 2025, ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ໄດ້ມີພິທີລົງນາມບົດບັນທຶກຄວາມເຂົ້າໃຈ ລະຫວ່າງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (IICT), ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ມະຫາວິທະຍາໄລການຄ້າຕ່າງປະເທດ (FTU) ສສ. ຫວຽດນາມ ເພື່ອ​ແນ​ໃສ່​ເພີ່ມ​ທະວີ​ການ​ຮ່ວມ​ມື​ຮອບດ້ານ ເຊັ່ນ: ການເປີດຫຼັກສູດຮຽນຮ່ວມກັນ ທັງຮູບແບບອອນລາຍ ແລະ ເຊິ່ງໜ້າ, ການແລກປ່ຽນນັກສຶກສາ, ການພັດທະນາບຸກຄະລາກອນພາຍໃຕ້ຫຼັກສູດໄລຍະສັ້ນ ແລະ ໄລຍະຍາວ, ການຮ່ວມມືກັນ​ການ​ພັດທະນາ​ຫຼັກສູດ, ​ການຮ່ວມກັນຄົ້ນຄວ້າວິທະຍາສາດແບບຫຼາກຫຼາຍສາດ (Multi-Disciplinary) ແລະ ຈັດງານເຜີຍແຜ່ຜົນງານວິຊາການ ເປັນຕົ້ນ.

ການລົງນາມບົດບັນທຶກຄວາມເຂົ້າໃຈສະບັບນີ້ສະແດງໃຫ້ເຫັນເຖິງ ໜຶ່ງຂີດໝາຍອັນສຳຄັນໃນການຮັດແໜ້ນສາຍພົວພັນດ້ານການສຶກສາ ລະຫວ່າງ ລາວ ແລະ ຫວຽດນາມ, ບໍ່ພຽງແຕ່ຈະປັບປຸງບັນດາຫຼັກສູດການຮຽນການສອນເທົ່ານັ້ນ ແຕ່ຍັງເປັນການກຽມຄວາມພ້ອມໃຫ້ແກ່ຄົນຮຸ່ນຫຼັງ ເພື່ອກ້າວໄປສູ່ຄວາມທ້າທາຍຂອງໂລກທີ່ນັບມື້ນັບມີການປ່ຽນແປງໃໝ່ທີ່ໄວດ້ວຍເຕັກໂນໂລຊີທີ່ທັນສະໄໝ ເພື່ອໃຫ້ພວກເຂົາເຫຼົ່ານັ້ນມີຄວາມພ້ອມໃນການຍາດແຍ່ງໂອກາດອີກດ້ວຍ. ພ້ອມກັນນັ້ນ, ການລົງນາມຄັ້ງນີ້ ຍັງແມ່ນ​ບາດກ້າວ​ສຳຄັນ ​ເພື່ອ​ແນ​ໃສ່​ສ້າງ​ການ​ເຊື່ອມ​ໂຍງ​ດ້ານ​ວິຊາ​ການ​ໃຫ້​ເຂັ້ມ​ແຂງ, ຊຸກຍູ້​ການ​ພັດທະນາ​ບັນດາ​ນັກ​ວິຊາ​ການ​ໃຫ້ມີຄວາມ​ຊຳນານ​ສູງ​ ຮ່ວມມືກັນປະກອບສ່ວນທາງດ້ານວິຊາການໃຫ້ແກ່ວຽກງານມະຫາພາກ ແລະ ຈຸລະພາກ ຂອງຕົນ ແລະ ພາກພື້ນ. ການລົງນາມດັ່ງກ່າວ ເປັນໜຶ່ງໃນກິດຈະກຳພາຍໃນງານ ສັບປະດາດິຈິຕອນລາວ 2025, ຍັງເປັນການດໍາເນີນຕາມຍຸດທະສາດ ການພັດທະນາບຸກຄະລາກອນ ການກຽມຄວາມພ້ອມສ້າງແຮງງານດ້ານດິຈິຕອນ ຕາມແຜນຍຸດທະສາດການຫັນເປັນດິຈິຕອນ ແລະ ແຜນພັດທະນາ ຂະແໜງ ເຕັກໂນໂລຊີ ແລະ ການສື່ສານ, ເປັນຂະບວນການໜຶ່ງເພື່ອຂໍ່ານັບຮັບຕ້ອນ ກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ III ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ.

ຮ່ວມລົງນາໃນຄັ້ງນີ້, ຕາງໜ້າສະຖາບັນເຕັກໂນໂລຊີການສື່ສານຂໍ້ມູນສານລົງນາມໂດຍ ທ່ານ ປອ. ປະດັບໄຊ ໄຊຍະໂຄດ, ຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ຕາງໜ້າມະຫາວິທະຍາໄລການຄ້າຕ່າງປະເທດ ສສ. ຫວຽດນາມ ໂດຍ ທ່ານ ຮສ. ປອ. ບຸຍ ອັນ ຕ໋ວນ (Bui Anh Tuan), ອະທິການບໍດີ ມະຫາວິທະຍາໄລການຄ້າຕ່າງປະເທດ ສສ. ຫວຽດນາມ. ໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະຜູ້ແທນທັງສອງຝ່າຍ.