ກະຊວງເຕັກໂນໂລຊີ ແລະ ການສື່ສານ ຈັດພິທີປູກຕົ້ນໄມ້ເນື່ອງໃນໂອກາດວັນເດັກສາກົນ ແລະ ວັນປູກຕົ້ນໄມ້ແຫ່ງຊາດ ຂຶ້ນໃນຕອນເຊົ້າຂອງວັນທີ 02 ມິຖຸນາ 2025, ທີ່ເຂດຫໍພັກ ຂອງ ກະຊວງເຕັກໂນໂລຊີ ແລະ ການສື່ສານ ບ້ານດອນຕິ້ວ, ເມືອງ ໄຊທານີ, ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ຊຶ່ງມີບັນດາຮອງລັດຖະມົນຕີ, ບັນດາຄະນະກົມ/ທຽບເທົ່າ ພ້ອມດ້ວຍພະນັກງານ-ລັດຖະກອນ ພາຍໃນກະຊວງເຂົ້າຮ່ວມຢ່າງພ້ອມພຽງ. ຕົ້ນໄມ້ທີ່ນໍາໄປປູກໃນຄັ້ງນີ້ ປະກອບມີຕົ້ນໄມ້ປະດັບ ແລະ ຕົ້ນໄມ້ໃຫ້ໝາກ ເຊັ່ນ: ຕົ້ນຄູນ, ຕົ້ນໝາກມ່ວງ, ຕົ້ນໝາກລິຈີ່ ແລະ ອື່ນໆ ລວມຈໍານວນ 100 ກວ່າຕົ້ນ.

ໃນຕອນເຊົ້າຂອງວັນດຽວກັນ ຍັງໄດ້ຈັດພິທີສະເຫຼີມສະຫຼອງວັນເດັກສາກົນ 01 ມິຖຸນາ ຄົບຮອບ 100 ປີ ພາຍໃຕ້ຄໍາຂວັນ  “ສ້າງຄວາມເຂັ້ມແຂງໃຫ້ເດັກທຸກຄົນ: ສິດທິເທົ່າທຽມກັນ, ອະນາຄົດທີ່ປອດໄພ” (Empowering Every Child: Equal Rights, Safe Futures), ຊຶ່ງມີ ທ່ານລັດຖະມົນຕີ, ຮອງລັດຖະມົນຕີ, ບັນດາຄະນະກົມ/ທຽບເທົ່າ ພ້ອມດ້ວຍ ລູກຫຼານຂອງພະນັກງານເຂົ້າຮ່ວມ.

ການສະເຫຼີມສະຫຼອງວັນເດັກສາກົນ ແມ່ນສຸດທີ່ມີຄວາມໝາຍ ແລະ ຄວາມສຳຄັນເປັນຢ່າງຍິ່ງ ເນື່ອງຈາກເດັກເປັນອະນາຄົດ, ເປັນດັ່ງເມັດພືດ, ເປັນໜໍ່ແໜງຂອງປະເທດຊາດໃນມື້ໜ້າ ເພື່ອເປັນການປະກອບສ່ວນສົ່ງເສີມການມີສ່ວນຮ່ວມ, ການພັດທະນາ ແລະ ປົກປ້ອງເດັກ ຊຶ່ງງານຄັ້ງນີ້ໄດ້ມີຫຼາກຫຼາຍກິດຈະກໍາ ເຊັ່ນ: ການຮັບຊົມວິດີໂອສານອວຍພອນຂອງ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ເນື່ອງໃນໂອກາດວັນເດັກສາກົນ 01 ມິຖຸນາ 2025, ພ້ອມທັງຈັດກິດຈະກໍາສໍາລັບເດັກທີ່ມາຮ່ວມງານ ເປັນຕົ້ນແມ່ນ ກິດຈະກຳຖາມ-ຕອບຄໍາຖາມ ຄວາມຮູ້ທົ່ວໄປ, ກິດຈະກໍາສະແດງຄວາມສາມາດ ແລະ ພອນສະຫວັນ ເຊັ່ນ: ການເຕັ້ນ, ຮ້ອງເພງ ແລະ ອື່ນໆ ຊຶ່ງເຕັມໄປດ້ວຍບັນຍາກາດຟົດຟື້ນ.