ກົມຈັດຕັ້ງ ແລະ ພະນັກງານ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິທີປາຖະກະຖາວັນສໍາຄັນຂອງພັກຂອງຊາດ ກໍຄື ວັນຜ່າວົງປິດລ້ອມ ຂອງກອງພັນທີສອງ ວິລະຊົນທີ່ທົ່ງໄຫຫີນ ຊຽງຂວາງ ຄົບຮອບ 66 ປີ​(18/05/1959-18/05/2025) ແລະ ວິລະກໍາໂຕນຄຸກຢ່າງມະຫັດສະຈັນ ຂອງບັນດາຜູ້ນໍາ ຂອງພັກ ແລະ ແນວລາວຮັກຊາດ ຄົບຮອບ 65 ປີ ( 24/05/1960-24/05/2025 ) ໃນວັນທີ 03 ພຶດສະພາ 2025​,  ພາຍໃຕ້ການເປັນປະທານຂອງ ສະຫາຍ ບັນດິດ ສຈ. ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຊຶ່ງມີບັນດາຄະນະພັກ-ຄະນະນຳກະຊວງ, ກົມ/ທຽບເທົ່າ, ພ້ອມດ້ວຍສະມາຊິກພັກ-ພະນັກງານ ທົ່ວກະຊວງ ເຂົ້າຮ່ວມ 360 ກວ່າສະຫາຍ.

ຈຸດປະສົງເພື່ອເປັນການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ກະຊວງເຕັກໂນໂລຊີ ແລະ ການສື່ສານ ໄດ້ຮັບຮູ້, ເຊື່ອມຊຶມ ແລະ ກໍາແໜ້ນກ່ຽວກັບບັນດາຜົນງານຂອງຜູ້ນຳພັກ-ລັດ ຜູ້ນຳທີ່ແສນເຄົາລົບຮັກຂອງພວກເຮົາ ໃນການຕໍ່ສູ້ຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່; ທັງເປັນການສຶກສາອົບຮົມ ການຮໍ່າຮຽນເອົາມູນເຊື້ອຮັກຊາດ, ຄວາມສາມັກຄີ, ນ້ຳໃຈຕໍ່ສູ້ກູ້ຊາດບໍ່ຍອມຈຳນົນອັນພິລະອາດຫານ, ນ້ຳໃຈເສຍສະຫຼະອັນສູງສົ່ງຂອງຜູ້ນຳພັກ-ລັດ ທີ່ມີຕໍ່ປະເທດຊາດ ແລະ ເປັນການໂຄສະນາປຸກລະດົມນໍ້າໃຈຮັກຊາດ ຮັກລະບອບໃໝ່, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ ໃຫ້ປາກົດຜົນເປັນຈິງ.

ໃນພິທີດັ່ງກ່າວ ໄດ້ຮັບຊົມການສາຍຮູບເງົາຫວນຄືນຊີວິດການເຄື່ອນໄຫວ ແລະ ຜົນງານທີ່ພົ້ນເດັ່ນຂອງ ຂອງບັນດາສະຫາຍຜູ້ນໍາພັກໃຫ້ແກ່ຜູ້ເຂົ້າຮ່ວມໄດ້ຮັບຊົມ ໂດຍຫຍໍ້ ໄດ້ຍົກໃຫ້​ເຖິງ ​ສະພາບ​ ການ​ຖືກ​ປິດ​ລ້ອມ​ ຂອງ​ກອງ ພັນ​ທີ 2, ການ​ຜ່າ​ວົງ​ປິດ​ລ້ອມ​ຂອງ​ກອງພັນ​ທີ 2 ​ແຕ່ວັນ​ທີ 18/5-2/6/1959, ຄວາມໝາຍ ຄວາມ​ສຳຄັນ ​ແລະ ປັດ​​ໄຈ​ພື້ນຖານ ​ການຜ່າ​ວົງປິດ​ລ້ອມຂອງ​ກອງ​ພັນ​ທີ 2 ​ເຊິ່ງໃນຄໍ່າຄືນວັນທີ 18 ພຶດ ສະພາ 1959 ຄະນະບັນຊາກອງພັນທີ 2 ພາຍໃຕ້ການຊີ້ນໍາ ຂອງສູນກາງພັກ ໄດ້ໃຊ້ກົນອຸບາຍຫຼອກສັດຕູ ​ໂດຍໃຊ້ຄວາມມືດໃນ​ການຖອນທັບໄປທາງທິດ ຕາເວັນຕົກສ່ຽງໃຕ້ ມຸ້ງໜ້າຫາເຂດບ້ານໂຕນນາແຖງໜອງຕິ້ວ ແລ້ວເຂົ້າປ່າໄປຕາມເສັ້ນທາງຫາບ້ານມາຍ ຢ່າງປິດລັບ ​ເຊິ່ງເຊົ້າຂອງວັນທີ 19 ພຶດສະພາ ປີ 1959 ສັດຕູບຸກເຂົ້າ ປົດອາວຸດ ກອງພັນທີ 2 ແຕ່ພວກເຂົາຕົກສະເງີ້ ເພາະຢູ່ໃນຄ້າຍ ມີແຕ່ຄວາມມິດງຽບ ແລະ ວ່າງເປົ່າ, ພວກສັດຕູເຈັບແຄ້ນແໜ້ນໃຈ ແລະ ໄດ້ຮີບຮ້ອນ ໃຫ້ທຸກກໍາລັງໄລ່ຕາມ ຫວັງດັບສູນກອງພັນທີ 2 ແຕ່ບໍ່ສາມາດຕິດຕາມໄດ້ທັນ. ໃນການເຄື່ອນທັບ 10 ກວ່າວັນ ກອງພັນທີ 2 ໄດ້ສູ້ຮົບກັບສັດຕູທັງນ້ອຍ ແລະ ໃຫຍ່ 10 ຄັ້ງ, ສຸດທ້າຍກອງພັນທີ 2 ພ້ອມກັບ 91 ຄອບຄົວ ໄດ້ຜ່າວົງປິດລ້ອມທີ່ໜາແໜ້ນຂອງສັດຕູ ໄປສູ່ເຂດທີ່ໝັ້ນຂອງການປະຕິວັດດ້ວຍຄວາມປອດໄພ.

 ພ້ອມນີ້, ຍັງໄດ້ຍົກໃຫ້ເຫັນເຖິງສາເຫດການໂຕນຄຸກຢ່າງມະຫັດສະຈັນຂອງບັນດາຜູ້ນໍາໄປສູ່ຖານທີ່ໝັ້ນ ປະຕິວັດຢ່າງປອດໄພ ຍ້ອນການນຳພາອັນສະຫຼາດສ່ອງໃສ ແລະ ປີຊາສາມາດຂອງ ປະທານໄກສອນ ພົມວິຫານ ແລະ ສູນກາງພັກ, ຍ້ອນນໍ້າໃຈຮັກຊາດອັນແຮງກ້າຂອງບັນດາຜູ້ນຳເຮົາ ທີ່ມີຄວາມກ້າຫານ,  ຕັດສິນໃຈຕໍ່ສູ້ຍອມເສຍສະຫຼະມີຄວາມປີຊາສາມາດຂົນຂວາຍ,  ສຶກສາອົບຮົມສາລະວັດທະຫານ, ເຮັດໃຫ້ສັດຕູກາຍເປັນມິດສະຫາຍຮ່ວມຕາຍ.

ຕອນທ້າຍຂອງພິທີ ຍັງໄດ້ເປັນກຽດຮັບຟັງຄໍາເຫັນໂອ້ລົມຂອງ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ຊຶ່ງໄດ້ຍົກໃຫ້ເຫັນທາດແທ້ທີ່ເປັນມູນເຊື້ອອັນພິລະອາດຫານຂອງບັນພະບູລຸດ ພ້ອມທັງໃຫ້ທິດຊີ້ນໍາການນໍາເອົາແບບຢ່າງຄວາມເສຍສະຫຼະຂອງຜູ້ນໍາໃນເມື່ອກ່ອນ ເພື່ອຜັນຂະຫຍາຍສູ່ໜ້າທີ່ວຽກງານທີ່ຕົນຮັບຜິດຊອບ ໃຫ້ມີການພັດທະນາຢ່າງມີປະສິດທິພາບ ແລະ ປະສິດທີ່ຜົນ.

ໂອກາດດຽວກັນ, ໃນພິທີດັ່ງກ່າວ ຍັງໄດ້ປະກາດການແຕ່ງຕັ້ງບົ່ງໂຕ ເລຂາໜ່ວຍພັກ, ຮອງເລຂາໜ່ວຍພັກ ແລະ ປະກາດແຕ່ງຕັ້ງຂັ້ນ ຮັກສາການຮອງຫົວໜ້າຫ້ອງການ, ກົມ, ສູນ ແລະ ສະຖາບັນ ຈໍານວນໜຶ່ງ ເພື່ອຮັບປະກັນໃຫ້ແກ່ການຈັດຕັ້ງປະຕິບັດໜ້າທີ່ວຽກງານໃຫ້ມີຄວາມເຂັ້ມແຂງຂຶ້ນຕື່ມ.

ຂ່າວໂດຍ: ສິນທະນູ ພະຜົນໄຊ

ພາບ: ພຸດດາວອນ ພາສຸວັນ