ກົມຈັດຕັ້ງ-ພະນັກງານ ໄດ້ຈັດກອງປະຊຸມເຜີຍແຜ່ເຊື່ອມຊຶມ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI ແລະ ພິທີມອບ-ຮັບ ໃບຢັ້ງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2024 ຈັດຂຶ້ນວັນທີ 26 ມິຖຸນາ 2025 ທີ່ສະຖາບັນເຕັກໂນໂລຊີ ການສື່ສານ ຂໍ້ມູນຈ່າວສານ ກະຊວງເຕັກໂນໂລຊີ ແລະ ການສື່ສານ ພາຍໃຕ້ການເປັນປະທານຂອງ ທ່ານ ບັນດິດ ສຈ ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ມີຮອງລັດຖະມົນຕີ ຫ້ອງການ ກົມ ສະຖາບັນ ແລະ ຂະແໜງານການອ້ອມຂ້າງກະຊວງ ເຂົ້າຮ່ວມ 200 ກວ່າສະຫາຍ.

ໃນພິທີ ທ່ານ ມະໂນທອງ ວົງລໍຄໍາ ຮັກສາການຫົວໜ້າກົມຈັດຕັ້ງ ແລະ ພະນັກງານ ກະຊວງເຕັກໂນໂລຊີ ແລະ ການສື່ສານ ໄດ້ຜ່ານດໍາລັດຂອງນາຍົກລັດຖະມົນຕີ ເລກທີ 328/ນຍ ລົງວັນທີ 17 ມິຖຸນາ 2025 ວ່າດ້ວຍການແຕ່ງຕັ້ງ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແຕ່ງຕັ້ງທ່ານ ໄຊຊະນະ ສິດທິພອນ ເປັນຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ພ້ອມນັ້ນ ກໍ່ໄດ້ຜ່ານບົດລາຍງານ ການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຂອງອົງຄະນະພັກກະຊວງ ເຕັກໂນໂລຊີ ແລະ ການສື່ສານ ໃນນັ້ນ ໄດ້ໃຫ້ເຫັນເຖິງສະພາບລວມການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຕີລາຄາສະພາບການໜ່ວຍພັກປອດໃສ ເຂັ້ມແຂງ ໜັກແໜ້ນ ແລະ ຕີລາຄາດ້ານດີ ດ້ານອ່ອນ-ຂໍ້ຄົງຄ້າງ ແລະ ບາງບົດຮຽນຖອດຖອນໄດ້ ຈາກນັ້ນ ຍັງໄດ້ຜ່ານ ມະຕິຕົກລົງ ເລທີ 294/ຄປຈ,ກຕສ ລົງວັນທີ 11 ມິຖຸນາ 2025 ວ່າດ້ວຍການຮັບຮອງໜ່ວຍພັກປອດໃສ ເຂັ້ມໜັກແໜ້ນ ປະຈໍາປີ 2024 ເຊິ່ງໃນຄັ້ງນີ້ ແມ່ນໄດ້ຮັບຮອງເອົາ 12 ໜ່ວຍພັກຮາກຖານທີ່ຂຶ້ນກັບອົງຄະນະພັກກະຊວງ ແລະ 16 ໜ່ວຍພັກທີ່ຂຶ້ນກັບຄະນະພັກຮາກຖານ ໃນນີ້ ຄະນະພັກຮາກຖານ ບໍລິສັດລາວໂທລະຄົມມະນາຄົມ ມະຫານຊົນ ມີ 9 ໜ່ວຍພັກ ຄະນະພັກຮາກ ບໍລິສັດອີທີແອວ ຈໍາກັດ ມີ 7 ໜ່ວຍພັກ.

ໂອກາດດຽວກັນນີ້ ທ່ານ ບັນດິດ ສຈ ບໍ່ວຽງຄໍາ ວົງດາລາ ໄດ້ໃຫ້ກຽດເຜີຍແຜ່ ເຊື່ອມຊຶມ ຜັນຂະຫຍາຍມະຕິ ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI ພ້ອມທັງມີຄໍາເຫັນໂອ້ລົມຕໍ່ກອງປະຊຸມວ່າ: ໃຫ້ບັນດາສະມາຊິກພັກ ພະນັກງານ-ລັດຖະກອນທົ່ວ ກະຊວງເຕັກໂນໂລຊີ ແລະ ການສື່ສານ ເອົາໃຈໃສ່ສຶກສາອົບຮົມການເມືອງ-ແນວຄິດ ມີຄວາມອຸ່ນອ່ຽນ ທຸ່ນທ່ຽງ ເປັນເຈົ້າການເຂົ້າຮ່ວມປະຕິບັດໜ້າທີ່ວຽກງານຕາມທິດຊີ້ນໍາຂອງຂັ້ນເທິງວາງອອກ ຍົກສູງຄວາມຮັບຜິດຊອບຕໍ່ໜ້າທີ່ການເມືອງ ກ້າຄິດ ກ້າເຮັດ ກ້າຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບມອບໝາຍ ເອົາໃຈໃສ່ສືບຕໍ່ປັບປຸງກົງຈັກການຈັດຕັ້ງ ສືບຕໍ່ຄົ້ນຄວ້າກົງຈັກພາຍໃນໃຫ້ມີຄວາມກະທັດຮັດ ສືບຕໍ່ຄົ້ນຄວ້ານະໂຍບາຍຮັບການອຸດໜູນບໍານານ ເພີ່ມທະວີຄວາມສາມັກຄີພາຍໃນຢ່າງແໜ້ນແຟ້ນ ພ້ອມນີ້ ກໍຍັງເນັ້ນໃຫ້ເອົາໃຈໃສ່ວຽກງານອື່ນໆຕື່ມອີກ.

ຈຸດປະສົງໃນການຈັດຕັ້ງເຜີຍແຜ່ເອກະສານສຳຄັນດັ່ງກ່າວ ເພື່ອເຮັດໃຫ້ຄະນະພັກ ຄະນະນໍາກະຊວງ ແລະ ສະມາຊິກພັກ ພະນັກງານ-ລັດຖະກອນ ທົ່ວກະຊວງເຕັກໂນໂລຊີ ແລະ ການສື່ສານ ໄດ້ຮັບຮູ້ເຂົ້າໃຈກ່ຽວກັບກັບເນື້ອໃນຂອງກອງປະຊຸມດັ່ງກ່າວເພື່ອນໍາໄປຈັດຕັ້ງຜັນຂະຫຍາຍເຂົ້າສູ່ໜ້າທີ່ວຽກງານວິຊາສະເພາະຂອງກົມກອງຕົນຮັັບຜິດຊອບໃຫ້ປະກົດຜົນເປັນຈິງ.

ຂ່າວ: ກົມຈັດຕັ້ງ-ພະນັກງານ