ກົມຄວາມປອດໄພທາງໄຊເບີ ແລະ ກົມເຕັກໂນໂລຊີດິຈິຕ໋ອນ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກິດຈະກໍາກິລາບານເຕະມິດຕະພາບຂຶ້ນ ໃນຕອນແລງຂອງວັນທີ 4 ກໍລະກົດ 2025, ທີ່ເດີນເຕະບານ ທະນົງອາດ.  ໂດຍໃຫ້ກຽດ ເຂົ້າຮ່ວມຂອງ ທ່ານ ນ. ພິຊິດໄພ ກອກມີລາ, ຮອງຫົວໜ້າກົມຄວາມປອດໄພທາງໄຊເບີ ແລະ ທ່ານ ນ. ສິຣິລັກ ໄຊຍະບຸນຊູ, ຫົວໜ້າກົມເຕັກໂນໂລຊີດິຈິຕ໋ອນ ບັນດາຫົວໜ້າພະແນກ, ຮອງພະແນກ ແລະ ພະນັກງານ ວິຊາການຈາກ 2 ພາກສ່ວນເຂົ້າຮ່ວມຢ່າງພ້ອມພຽງ.

ຈຸດປະສົງຂອງການຈັດກິດຈະກໍາໃນຄັ້ງນີ້, ກໍເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມ ໃຫຍ່ຜູ້ແທນສະມາຊິກພັກຂອງອົງຄະນະພັກ ກະຊວງເຕັກໂນໂລຊີ ແລະ ການສື່ສານ ຄັ້ງທີ III. ທັງນີ້, ກໍ ເພື່ອເປັນການເຕົ້າໂຮມຄວາມສາມັກຄີຮັກແພງລະຫວ່າງອ້າຍ, ເອື້ອຍ, ນ້ອງພະນັກງານທັງສອງກົມ ໃຫ້ແໜ້ນແຟ້ນ ຍິ່ງຂຶ້ນ. ຊຶ່ງກິດຈະກໍາໄດ້ດໍາເນີນໄປດ້ວຍບັນຍາກາດ ທີ່ເຕັມໄປທັງຮອຍຍິ້ມ, ສຽງຫົວ ທັງໄດ້ສ້າງໂອກາດໃນການພົບປະ ແລກປ່ຽນບົດຮຽນເຊິ່ງກັນ ແລະ ກັນອີກດ້ວຍ.