ກອງປະຊຸມເປີດກວ້າງ ເພື່ອຜ່ານເນື້ອໃນໃສ່ກອງປະຊຸມໃຫຍ່ ແລະ ທາບທາມບຸກຄະລາກອນ ອອກຮັບສະໝັກເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ IX (ຮອບທີ I), ໄດ້ຈັດຂຶ້ນຢ່າງເປັນທາງການ ໃນວັນທີ 25 ກໍລະກົດ 2025, ທີ່ຫ້ອງປະຊຸມ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ (ກຕສ). ໃຫ້ກຽດເຂົ້າຮ່ວມເປັນປະທານໂດຍ ສະຫາຍ  ປອ. ສັນຕິສຸກ ສິມມາລາວົງ,  ຮອງເລຂາຄະນະບໍລິຫານງານພັກກະຊວງ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ມີສະຫາຍຜູ້ຕາງໜ້າຈາກກົມຈັດຕັ້ງ ແລະ ພະນັກງານ, ກົມກວດກາ (ກຕສ), ສະຫາຍ ນາງ ເກສອນ ສຸລິວົງ  ຄະນະບໍລິຫານງານພັກກະຊວງ, ກຳມະການຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງ, ບັນດາຮອງປະທານ, ຄະນະບໍລິຫານງານສະຫະພັນແມ່ຍິງກະຊວງ, ບັນດາຫົວໜ້າ/ຮອງຫົວໜ້າໜ່ວຍຮາກຖານ ພ້ອມດ້ວຍບັນດາສະມາຊິກແມ່ຍິງອ້ອມຂ້າງກະຊວງ ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ແບ່ງອອກເປັນ 2 ພາກ ຄື: 1) ເປັນວາລະທາບທາມ ແລະ ປະກອບຄໍາເຫັນ ຕໍ່ 3 ຮ່າງເອກະສານຄື: (ຮ່າງ) ລາຍງານການເມືອງ, (ຮ່າງ) ແຜນພັດທະນາແມ່ຍິງລາວ ໄລຍະ 5 ປີ (2026-2030) ແລະ (ຮ່າງ) ກົດລະບຽບສະຫະພັນແມ່ຍິງລາວ (ສະບັບປັບປຸງ), ຊຶ່ງໄດ້ສະແດງໃຫ້ເຫັນການຈັດຕັ້ງປະຕິບັດວຽກງານ ຂອງຄະນະບໍລິຫານສູນກາງສະຫະພັນແມ່ຍິງລາວ ໃນໄລຍະ 05 ປີຜ່ານມາ ໂດຍໄດ້ຍົກໃຫ້ເຫັນບັນດາຜົນງານພົ້ນເດັ່ນທີ່ຍາດມາໄດ້, ທັງໄດ້ຕີລາຄາຄືນຈຸດອ່ອນ, ຂໍ້ຄົງຄ້າງ ແລະ ວາງທິດທາງແຜນການ ພ້ອມຄາດໝາຍສູ້ຊົນໃນໄລຍະ 05 ປີຕໍ່ໜ້າ. ພ້ອມນັ້ນ, ບັນດາສະມາຊິກແມ່ຍິງຍັງໄດ້ພ້ອມກັນປະກອບຄຳຄິດຄຳເຫັນໃສ່ເນື້ອໃນຂອງທັງ 3 ເອກະສານ ຢ່າງສ້າງສັນ ແລະ ກົງໄປກົງມາ. 2) ວາລະທາບທາມບຸກຄະລາກອນ ເພື່ອສະໝັກຮັບເລືອກຕັ້ງເປັນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ IX.  ສະຫາຍ ນາງ ສາຍໃຈ ສາຍສໍາພັນ, ກໍາມະການຄະນະບໍລິຫານງານສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບກອງປະຊຸມ ແລະ ຄະນະຄວບຄຸມການປ່ອນບັດ, ຈາກນັ້ນ ສະຫາຍ ນາງ ເກສອນ ສຸລິວົງ, ປະທານສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ໄດ້ກ່າວເປີດກອງປະຊຸມ ແລະ ໄດ້ສຶບຕໍ່ດຳເນີນກອງປະຊຸມຕາມວາລະ. ພ້ອມນີ້, ຫົວໜ້າຄະນະຮັບຜິດຊອບຄວບຄຸມການປ່ອນບັດໄດ້ຜ່ານມາດຖານເງື່ອນໄຂຜູ້ອອກສະໝັກຮັບເລືອກຕັ້ງເຂົ້າໃນ ຄະນະບໍລິຫານງານສູນກາງສະຫະພັນແມ່ຍິງລາວ ສະໄໝ ທີ IX ໂດຍ ສະຫາຍ ນາງ ຍອດ ໄຊທົງເດດ, ຮອງປະທານ ແລະ ປະທານກວດກາ ສະຫະພັນແມ່ຍິງກະຊວງ ເຕັກໂນໂລຊີ ແລະ ການສື່ສານ.

ໂອກາດນີ້, ສະຫາຍ ປອ. ສັນຕິສຸກ ສິມມາລາວົງ ໄດ້ມີຄໍາເຫັນໂອ້ລົມ ແລະ ຊີ້ນຳ ຕໍ່ກອງປະຊຸມທາບທາມ, ຊຶ່ງໄດ້ມີທິດໃຫ້ບັນດາສະມາຊິກແມ່ຍິງຕ້ອງໄດ້ຍົກສູງຄວາມຮັບຜິດຊອບຕໍ່ໜ້າທີ່ການເມືອງໃນການໃຊ້ສິດປະຊາທິປະໄຕຂອງຕົນຢ່າງເຕັມສ່ວນ ສຸມສະຕິປັນຍາເຂົ້າໃນການຄົ້ນຄິດ, ຕຶກຕອງໃຫ້ຖີຖ້ວນ, ຄັດເລືອກໃຫ້ໄດ້ຜູ້ທີ່ມີຄວາມຮູ້, ຄວາມສາມາດ, ມີຄຸນສົມບັດສິນທໍາປະຕິວັດ, ມີປະສົບການ, ມີຄວາມເປັນແບບຢ່າງທີ່ດີ, ໄດ້ຮັບຄວາມເຊື່ອຖື ແລະ ໄວ້ວາງໃຈຈາກສະມາຊິກແມ່ຍິງ. ຈາກນັ້ນ, ສະມາຊິກແມ່ຍິງກໍໄດ້ພ້ອມກັນປ່ອນບັດທາບທາມເອົາບຸກຄະລາກອນຮັບສະໝັກເລືອກຕັ້ງເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ IX (ຮອບທີ I) ສໍາເລັດຕາມຈຸດປະສົງ ແລະ ບັນລຸຕາມຄາດໝາຍທີ່ວາງໄວ້.