ໃນວັນທີ 25 ກໍລະກົດ 2025 ຜ່ານມາ, ຄະນະຈາກສູນອິນຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ (ກຕສ) ນຳໂດຍ ທ່ານ ໄຊສົມຫວັງ ສຸວັນນະວົງ ຮອງຫົວໜ້າສູນອິນເຕີເນັດ ແຫ່ງຊາດ ພ້ອມດ້ວຍຄະນະ ໄດ້ເດີນທາງໄປເຂົ້າຮ່ວມກອງປະຊຸມອິນເຕີເນັດຫວຽດນາມ ປະຈຳປີ 2025, ທີ່ນະຄອນຫຼວງຮ່າໂນຍ, ສສ ຫວຽດນາມ ເພື່ອຖອດຖອນບົດຮຽນ ແລະ ແລກປ່ຽນປະສົບການ ໃນຂົງເຂດການພັດທະນາອິນເຕີເນັດ ຂອງ ສສ ຫວຽດນາມ ແລະ ສາກົນ. ຊຶ່ງມີຜູ້ແທນຈາກບັນດາພາກສ່ວນລັດ, ອົງການ ແລະ ບໍລິສັດຜູ້ໃຫ້ບໍລິການດ້ານອິນເຕີເນັດ ແລະ ດິຈິຕອນ ພາຍໃນ ສສ ຫວຽດນາມ ແລະ ຕ່າງປະເທດ ເຂົ້າຮ່ວມ ຫຼາຍກວ່າ 400 ຄົນ.

ກອງປະຊຸມໄດ້ຈັດຂຶ້ນພາຍໃຕ້ໃນຄຳຂວັນ “ຍຸກແຫ່ງການບຸກລະລຸດ້ວຍການພັດທະນາອຸດສາຫະກຳອິນເຕີເນັດ” ໂດຍການກ່າວເປີດກອງປະຊຸມໂດຍ ທ່ານ ຫງວຽນ ເຈືອງ ຊາງ (Nguyen Troùng Giang) ຮອງຫົວໜ້າສູນອິນເຕີເນັດ, ສສ ຫວຽດນາມ (VNNIC). ຊຶ່ງທ່ານໄດ້ກ່າວວ່າ: ການຈັດກອງປະຊຸມຄັ້ງນີ້, ກໍເພື່ອແນ່ໃສ່ການສ້າງອະນາຄົດຂອງອິນເຕີເນັດໃນຫວຽດນາມ ໂດຍການການນຳໃຊ້ຂໍ້ມູນຢ່າງມີປະສິດທິພາບ ໃນຂອບເຂດຂອງອຸດສາຫະກຳອິນເຕີເນັດ, ຄວາມປອດໄພທາງໄຊເບີ, ການສົ່ງເສີມການຮ່ວມມືລະຫວ່າງຜູ້ຊ່ຽວຊານ ແລະ ການເສີມສ້າງຊຸມຊົນອິນເຕີເນັດໃຫ້ເຂັ້ມແຂງ, ສ້າງໂຄງລ່າງພື້ນຖານອິນເຕີເນັດທີ່ຍືນຍົງ, ທັນສະໄຫມ ແລະ ປອດໄພ. ພ້ອມນີ້, ກອງປະຊຸມ ໄດ້ປຶກສາຫາລຶ ແລະ ນຳສະເໜີ ໃນຫຼາຍຫົວຂໍ້ຄື: ວິ​ທີ​ແກ້​ໄຂ​ສໍາ​ລັບ​ການ​ພັດ​ທະ​ນາອຸດ​ສາ​ຫະ​ກໍາ​ອິນ​ເຕີ​ເນັດ​ - ການ​ເຊື່ອມ​ຕໍ່​ວິ​ທະ​ຍາ​ສາດ ເຕັກ​ໂນ​ໂລ​ຊີ​ນະ​ວັດ​ຕະ​ກໍາ​ ແລະ ​ການ​ຫັນ​ເປັນ​ດິ​ຈິ​ຕອນ​, ບົດບາດຂອງອຸດສາຫະກໍາອິນເຕີເນັດ ໃນທົ່ວຂະແຫນງການ ແລະ ອຸດສາຫະກໍາ, ການສົ່ງເສີມນະວັດຕະກໍາ ໂດຍອີງໃສ່ອຸດສາຫະກໍາອິນເຕີເນັດ, ການກຳນົດມາດຕະຖານ ແລະ ທິດທາງນະໂຍບາຍ ໂດຍກະຊວງວິທະຍາສາດ ແລະ ເຕັກໂນໂລຊີ ສສ ຫວຽດນາມ, ການ​ປະ​ຕິ​ບັດ​ບັນ​ດາ​ສິ່ງ​ທ້າ​ທາຍ​ຂອງ​ວິ​ສາ​ຫະ​ກິດ​ຫວຽດ​ນາມ, ການຮ່ວມມືສາກົນ ແລະ ທ່າອ່ຽງຂອງໂລກ, ວິໄສທັດ ແລະ ຍຸດທະສາດຂອງອຸດສະຫະກຳອິນເຕີເນັດ, ການພັດທະນາພື້ນຖານໂຄງລ່າງອິນເຕີເນັດ ໃນໄລະຍາຕໍ່ໜ້າ, ເລກໝາຍອິນເຕີເນັດ ຮຸ່ນທີ 6 (IPv6) ສໍາລັບອິນເຕີເນັດ ແຫ່ງຊັບພະສິ່ງ (IoT), ການນໍາໃຊ້ອິນເຕີເນັດທີ່ເຊື່ອຖືໄດ້ ແລະ ປອດໄພໃນຍຸກອຸດສາຫະກໍາອິນເຕີເນັດ.

ການເຂົ້າຮ່ວມກອງປະຊຸມອິນເຕີເນັດຫວຽດນາມ ປະຈຳປີ 2025 ນີ້ ເຮັດໃຫ້ຜູ້ແທນເຂົ້າຮ່ວມໄດ້ຮຽນຮູ້ບົດຮຽນ, ທິດທາງ ແລະ ແຜນການພັດທະນາ ອຸດສະຫະກຳອິນເຕີເນັດ ຂອງ ສສ ຫວຽດນາມ ກໍຄື ຂອງສາກົນ ເພື່ອນຳເອົາບົດຮຽນດັ່ງກ່າວ ມາຄົ້ນຄວ້າປັບໃຊ້ໃນການພັດທະນາອິນເຕີເນັດ ຂອງ ສປປ ລາວ ໃນໄລຍະຕໍ່ໄປ. ພ້ອມກັນນັ້ນ, ສູນອິນເຕີເນັດ ກໍ່ຈະໄດ້ກະກຽມເປີດກອງປະຊຸມອິນເຕີເນັດລາວ ປະຈຳປີ 2025 ທີ່ຈະຈັດຂື້ນເປັນຄັ້ງທຳອິດ ໃນມໍ່ໆນີ້ ເພື່ອເປັນເວທີ ໃຫ້ກັບພາກລັດ, ເອກະຊົນ ທີ່ມີບົດບາດໃນການພັດທະນາອິນເຕີເນັດຂອງລາວ ໄດ້ແລກປ່ຽນບົດຮຽນ ກ້າວໄປສູ່ການຮ່ວມມືທີ່ສ້າງຜົນປະໂຫຍດຕໍ່ການພັດທະນາອິນເຕີເນັດຂອງລາວ ໃນອານາຄົດ.

          ພາບ ແລະ ຂ່າວ: ສູນອິນຕີເນັດ ແຫ່ງຊາດ