ໃນລະຫວ່າງວັນທີ 25-27 ກໍລະກົດ 2025, ຕາງໜ້າຄະນະກົມ, ຄະນະພະແນກ ແລະ ວິຊາການ ຈາກບັນດາກົມທີ່ກ່ຽວຂ້ອງ ພາຍໃນ ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ເດີນທາງເຂົ້າຮ່ວມງານສັບປະດາ ແລກປ່ຽນການຮ່ວມມືດ້ານການສຶກສາ ຈີນ-ອາຊຽນ ປະຈຳປີ 2025 (2025 China-ASEAN Education Cooperation Exchange Week) ທີ່ກຸ້ຍຢາງ, ສປ.ຈີນ. ນໍາພາຄະນະເຂົ້າຮ່ວມໂດຍ ທ່ານ ປອ. ປະດັບໄຊ ໄຊຍະໂຄດ, ຫົວໜ້າສະຖາບັນ ເຕັກໂນໂລຊີການສື່ສານຂໍ້ມູນຂ່າວສານ ແລະ ທ່ານ ໄຊສົງຄາມ ພານຸວົງ ຫົວໜ້າສະຖາບັນຄົ້ນຄວ້ານຳໃຊ້ເຕັກໂນໂລຊີອັດສະລິຍະ (ກຕສ). ໂດຍໄດ້ຮັບການສະໜັບສະໜູນຈາກຄະນະກຳມະການ ຈັດຕັ້ງປະຕິບັດງານສັບປະດາແລກປ່ຽນການຮ່ວມມືດ້ານການສຶກສາ ຈີນ-ອາຊຽນ, ສະພາການຄ້າ ແລະ ອຸດສາຫະກຳແຫ່ງຊາດລາວ ປະຈຳ ຊົງຊີ້ງ ແລະ ສະມາຄົມສົ່ງເສີມການສຶກສາ ແລະ ຝຶກອົບຮົມຈີນ-ແມ່ນໍ້າຂອງລ້ານຊ້າງ ແລະ ວິທະຍາໄລອາຊີວະສຶກສາເຕັກໂນໂລຊີເອເລັກໂຕຣນິກ ແລະ ຂໍ້ມູນຂ່າວສານ ກຸ້ຍໂຈ ສປ. ຈີນ.

ຈຸດປະສົງຂອງການເປີດງານຄັ້ງນີ້, ແມ່ນເພື່ອຜັນຂະຫຍາຍວຽກງານການເຊື່ອມຈອດລະຫວ່າງ ອຸດສາຫະກຳ ແລະ ການສຶກສາໃນລະດັບພາກພື້ນແມ່ນ້ຳຂອງ - ແມ່ນ້ຳລ້ານຊ້າງ ໃຫ້ມີຄວາມກ້າວໜ້າ. ໃນການເຂົ້າຮ່ວມໃນຄັ້ງນີ້ ຍັງປະກອບ ດ້ວຍກິດຈະກໍາຝຶກອົບຮົມໃຫ້ແກ່ ຄະນະເດີນທາງຈາກກະຊວງເຕັກໂນໂລຊີ ແລະ ການສື່ສານ ຫຼາຍກິດຈະກໍາ.  ໃຫ້ກຽດປະກອບຄໍາເຫັນໃນພິທີເປີດຝຶກອົບຮົມ ໂດຍ ທ່ານ. ໄຊບັນດິດ ຣາຊາພົນ, ປະທານສະມາຄົມສົ່ງເສີມເສດຖະກິດການຄ້າລາວ-ຈີນ, ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ປະຈໍາຊົງຊີ້ງ, ທ່ານ. ປອ. ປະດັບໄຊ ໄຊຍະໂຄດ, ຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ທ່ານ ນ. Lu Yi ຜູ້ອໍານວຍການວິທະຍາໄລອາຊີວະສຶກສາເຕັກໂນໂລຊີເອເລັກໂຕຣນິກ ແລະ ຂໍ້ມູນຂ່າວສານ ກຸ້ຍໂຈ ສປ. ຈີນ ເຊິ່ງແຕ່ລະທ່ານໄດ້ມີຄໍາເຫັນຢ່າງກົງໄປກົງມາໃນການນຳສະເໜີ, ແລກປ່ຽນຜົນງານ ແລະ ປະສົບການ ລວມເຖິງການປະສານຮ່ວມມືດ້ານການສຶກສາ ແລະ ຝຶກອົບຮົມ. ພ້ອມນີ້, ຍັງໄດ້ສະແດງໃຫ້ເຫັນເຖິງມິດຕະພາບ ແລະ ການຮ່ວມມືອັນເລິກເຊິ່ງ ທາງດ້ານການສຶກສາ ລະຫວ່າງ ສປປ ລາວ ແລະ ສປ ຈີນ ໃນຂົງເຂດເຕັກໂນໂລຊີດິຈິຕອນ.