ອົງການດັັດສົມໂທລະຄົມມະນາຄົມ (ອດທ), ກະຊວງເຕັກໂນໂລຊີ ແລະ ການສື່ສານ (ກຕສ), ສປປ ລາວ ແລະ ອົງການດັດສົມໂທລະຄົມມະນາຄົມ ສສ ຫວຽດນາມ (VNTA) ໄດ້ສຳເລັດກອງປະຊຸມວິຊາການ ກ່ຽວກັບດ້ານນະໂຍບາຍ, ລະບຽບການ ແລະ ການພັດທະນາຂອງເຕັກໂນໂລຊີໂທລະຄົມມະນາຄົມ ປະຈຳປີ 2025, ໃນວັນທີ 25 ກໍລະກົດ 2025 ຜ່ານລະບົບກອງປະຊຸມທາງໄກ. ໂດຍໃຫ້ກຽດເຂົ້າຮ່ວມ ແລະ ເປັນປະທານ ໂດຍ ທ່ານ ສຸດໃຈ ລໍລອນສີ ຫົວໜ້າອົງການດັດສົມໂທລະຄົມມະນາຄົມ ສປປ ລາວ ແລະ  ທ່ານ ຫງ໋ຽນ ຟອງ ຍ່າ ຮອງຫົວໜ້າອົງການດັດສົມໂທລະຄົມມະນາຄົມ ສສ ຫວຽດນາມ (VNTA) ມີບັນດາຫົວໜ້າພະແນກທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້, ແມ່ນເພື່ອເປັນການຜັນຂະຫຍາຍ ເນື້ອໃນຂອງບົດບັນທຶກຄວາມເຂົ້າໃຈ (MOU) ລະຫວ່າງອົງການດັດສົມໂທລະຄົມມະນາຄົມ ແລະ ອົງການດັດສົມໂທລະຄົມ ສສ ຫວຽດນາມ (VNTA), ສະບັບຄັ້ງວັນທີ 11 ຕຸລາ 2022 ໃຫ້ເກີດຜົນປະໂຫຍດສູງສຸດ.​ ພ້ອມທັງ ປຶກສາຫາລືກັນໃນຫົວຂໍ້ທີ່ສຳຄັນ ແລະ ເປັນບັນຫາພົ້ນເດັ່ນໃນປະຈຸບັນ ເປັນຕົ້ນແມ່ນ: ການແລກປ່ຽນບົດຮຽນກ່ຽວກັບການຫັນເປັນກຸ້ມຕົນເອງ ຂອງອົງການດັດສົມໂທລະຄົມ ສສ ຫວຽດນາມ (VNTA), ແລກປ່ຽນບົດຮຽນກ່ຽວກັບວຽກງານປ້ອງກັນ ແລະ ແກ້ໄຂບັນຫາ ການຕົວຍົວະຫລອກລວງ ທາງອອນລາຍ, ແລກປ່ຽນ ແລະ ປືກສາຫາລືກ່ຽວກັບການແຈ້ງເຕືອນເຫດສຸກເສີນຜ່ານລະບົບໂທລະຄົມມະນາຄົມ. ນອກຈາກຫົວຂໍ້ເຫຼົ່ານັ້ນແລ້ວ, ອົງການດັດສົມໂທລະຄົມມະນາຄົມ ຍັງໄດ້ລາຍງານສະພາບການຄຸ້ມຄອງໂທລະຄົມມະນາຄົມຕໍ່ກອງປະຊຸມຊາບເປັນຕົ້ນແມ່ນ ການຂະຫຍາຍຕານ່າງໂທລະຄົມມະນາຄົມ, ການຂະຫຍາຍສູນຂໍ້ມູນ, ການຂະຫາຍພື້ນຖານໂຄງລ່າງໂດຍສະເພາະສາຍສົ່ງໂທລະຄົມ. ຊື່ງທັງສອງຝ່າຍ ເຫັນດີຈະໄດ້ສືບຕໍ່ປະສານງານ ແລະ ຈັດກອງປະຊຸມຂັ້ນວິຊາການໃນຂັ້ນຕໍ່ໄປເພື່ອສຶກສາ, ຖອດຖອນບົດຮຽນ ແລະ ນຳໃຊ້ເປັນຂໍ້ມູນບ່ອນອີງໃນການສ້າງ, ປັບປຸງ ແລະ ການຄຸ້ມຄອງວຽກງານດັ່ງກ່າວໃນອານາຄົດ.

ພາບ ແລະ ຂ່າວ: ອດທ.