01/08/2025
ໃນລະຫວ່າງວັນທີ 21-25 ກໍລະກົດ 2025 ທີ່ຜ່ານມານີ້, ຄະນະຜູ້ແທນ ກະຊວງເຕັກໂນໂລຊີ ແລະ ການສື່ສານ (ກຕສ) ສປປ ລາວ ຊຶ່ງນຳໂດຍ ທ່ານ ແກ້ວວິສຸກ ໂສລະພົມ, ຮອງລັດຖະມົນຕີ ກຕສ ພ້ອມດ້ວຍຄະນະ ໄດ້ເດີນທາງຢ້ຽມຢາມ ບໍລິສັດເຕັກໂນໂລຊີຊັ້ນນໍາ ຂອງ ສ.ເກົາຫຼີ ທີ່ ນະຄອນຫຼວງ ໂຊນ, ສ.ເກົາຫຼີ.
ຈຸດປະສົງຂອງການເດີນທາງຢ້ຽມຢາມໃນຄັ້ງນີ້ ແມ່ນເພື່ອແນ່ໃສ່ການເພີ່ມທະວີການຮ່ວມມືສອງຝ່າຍ ໃນການຫັນເປັນດິຈິຕອນ, ນະວັດຕະກໍາ ແລະ ການພັດທະນາເຕັກໂນໂລຊີ ພາຍໃຕ້ບົດບັນທຶກຄວາມເຂົ້າໃຈວ່າດ້ວຍການຮ່ວມມື ສຶກສາຄວາມເປັນໄປໄດ້ໃນການພັດທະນາອຸທິຍານດິຈິຕອນ ແລະ ສູນທົດສອບເຕັກໂນໂລຊີດິຈິຕອນ ລະຫວ່າງ ກົມເຕັກໂນໂລຊີດິຈິຕອນ, ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ບໍລິສັດ ລາວຟອບແລບ ຈຳກັດ ຮ່ວມກັບ ບໍລິສັດ RWA Co.,Ltd.
ເນື່ອງໃນໂອກາດເດີນທາງມາຢ້ຽມຢາມໃນຄັ້ງນີ້, ທ່ານ ແກ້ວວີສຸກ ໂສລະພົມ ຮອງລັດຖະມົນຕີ ກຕສ ໄດ້ກ່າວວ່າ: ການຮ່ວມມືດ້ານດິຈິຕອນ ລາວ-ສ.ເກົາຫຼີ ແມ່ນເປັນບາດກ້າວອັນສຳຄັນ ແລະ ເປັນພື້ນຖານທີ່ໝັ້ນຄົງສຳລັບໂຄງການລິເລີ່ມຮ່ວມກັນໃນອະນາຄົດ ແລະ ສະແດງໃຫ້ເຫັນເຖິງຄວາມປາຖະໜາອັນສູງສົ່ງຂອງພວກເຮົາທີ່ຈະຊຸກຍູ້ການຮ່ວມມືພາກປະຕິບັດຕົວຈິງ ແລະ ດຶງດູດການລົງທຶນທາງດ້ານດິຈິຕອນທີ່ມີປະສິດທິພາບ ໃຫ້ແກ່ ສປປ ລາວ. ພ້ອມນັ້ນ, ທ່ານຍັງໄດ້ເນັ້ນໜັກເຖິງຄຳໝັ້ນສັນຍາຂອງລັດຖະບານລາວ ໃນການຊຸກຍູ້ການປະດິດສ້າງດ້ານດິຈິຕອນ ເພື່ອເປັນການຊຸກຍູ້ການເຕີບໂຕດ້ານເສດຖະກິດ ແລະ ການຮ່ວມມືສາກົນ. ໃນຕອນທ້າຍ ທ່ານ ໄດ້ສະແດງຄວາມຂອບໃຈຕໍ່ບັນດາບໍລິສັດຝ່າຍ ສ.ເກົາຫຼີ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຢັ້ງຢືນຄວາມພ້ອມ ທີ່ຈະສືບຕໍ່ສົມທົບກັນຢ່າງແໜ້ນແຟ້ນກັບບັນດາຄູ່ຮ່ວມມືທັງພາກລັດ ແລະ ເອກະຊົນ ຢ່າງຕໍ່ເນື່ອງ.
ໃນການຢ້ຽມຢາມໃນຄັ້ງນີ້, ຄະນະຜູ້ແທນລາວໄດ້ມີການພົບປະລະດັບສູງ ກັບບໍລິສັດເຕັກໂນໂລຊີຊັ້ນນໍາຂອງ ສ.ເກົາຫຼີ ເຊິ່ງລວມມີ ບໍລິສັດ RWA Co.,Ltd, ບໍລິສັດ Seoul Labs, ບໍລິສັດ FOBLGATE ແລະ ບໍລິສັດ Wisestone Co.,Ltd. ການສົນທະນາທີ່ສຸມໃສ່ການພັດທະນາດິຈິຕອນ sandbox, ການພັດທະນາໂຄງການ Lao Digital Park ແລະ ການຮ່ວມມືດ້ານການລົງທຶນທີ່ມີທ່າແຮງໃນຂົງເຂດຕ່າງໆ ເຊັ່ນ: ລະບົບ Fintech, ໂຄງສ້າງພື້ນຖານອັດສະລິຍະ (Smart Infrastructure) ແລະ ລະບົບປັນຍາປະດິດ (AI). ນອກຈາກນັ້ນ, ຍັງມີການພົບປະແລກປ່ຽນວັດທະນະທຳ ແລະ ກິດຈະກຳແລກປ່ຽນເພື່ອແນໃສ່ເພີ່ມທະວີການພົວພັນການຮ່ວມມື ແລະ ຊຸກຍູ້ຄວາມເຂົ້າໃຈເຊິ່ງກັນ ແລະ ກັນລະຫວ່າງສອງປະເທດ.
