ຄະນະຜູ້ແທນ ກະຊວງເຕັກໂນໂລຊີ ແລະ ການສື່ສານ ສປປ ລາວ, ນໍາໂດຍ ທ່ານ ໄຊຊະນະ ສິດທິພອນ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ສປປ ລາວ ພ້ອມດ້ວຍຄະນະ ໄດ້ສໍາເລັດການເຂົ້າຮ່ວມງານປະຊູມ ປັນຍາປະດິດໂລກ 2025 ແລະ ກອງປະຊຸມລະດັບສູງ ໃນການຄຸ້ມຄອງປັນຍາປະດິດສາກົນ (2025 World AI Conference and High-Level Meeting On Global AI Governance), ໃນລະຫວ່າງ ວັນທີ 25-28 ກໍລະກົດ 2025, ທີ່ ຊຽງໄຮ້, ສປ ຈີນ ພາຍໃຕ້ຄຳຂວັນ “ຄວາມສາມັກຄີສາກົນໃນຍຸກປັນຍາປະດິດ” (Global Solidarity in the AI Era) ເຊິ່ງມີຜູ້ນຳ ແລະ ແຂກລະດັບສູງຫຼາຍກວ່າ 1,000 ຄົນ ຈາກ 40 ປະເທດ ແລະ ອົງການຈັດຕັ້ງສາກົນ ເຂົ້າຮ່ວມງານຄັ້ງນີ້.

ໃນພິທີເປີດງານປະຊຸມ, ທ່ານ Li Qiang, ນາຍົກລັດຖະມົນຕີ ສປ ຈີນ ໄດ້ໃຫ້ກຽດເຂົ້າຮ່ວມ ແລະ ກ່າວເປີດພິທີ ພ້ອມທັງເນັ້ນໜັກເຖິງຄວາມຈໍາເປັນຂອງການຮ່ວມມືລະດັບໂລກ ເພື່ອຄຸ້ມຄອງປັນຍາປະດິດ ແລະ ຮັບປະກັນວ່າ ເຕັກໂນໂລຊີອັດສະລິຍະ ຈະຖືກພັດທະນາເພື່ອຜົນປະໂຫຍດຂອງທຸກຄົນ. ພ້ອມນັ້ນ, ທ່ານ Antonio Guterres, ເລຂາທິການໃຫຍ່ຂອງອົງການສະຫະປະຊາຊາດ ໄດ້ກ່າວປາໄສຜ່ານທາງວີດີໂອ ໂດຍໄດ້ຮຽກຮ້ອງໃຫ້ທຸກປະເທດໄດ້ມີສ່ວນຮ່ວມ ແລະ ມີການຮ່ວມມືລະດັບສາກົນດ້ານຄວາມປອດໄພຂອງດ້ານປັນຍາປະດິດ. ທ່ານ Kao Kim Hourn, ເລຂາທິການໃຫຍ່ອາຊຽນ ໄດ້ເນັ້ນໜັກເຖິງການມີສ່ວນຮ່ວມດ້ານປັນຍາປະດິດ ແມ່ນເປັນຮາກຖານໃນການຫັນເປັນດິຈິຕອນ ພ້ອມທັງເນັ້ນຍ້ຳເຖິງວິໄສທັດຂອງຄວາມສາມັກຄີ ລະຫວ່າງ ອາຊຽນ ແລະ ຈີນ. ພາຍໃນງານປະຊຸມ ຍັງມີການເປີດໂຕບັນດາໂຄງການລິເລີ່ມທີ່ສໍາຄັນ ເປັນຕົ້ນແມ່ນ ການເປີດໂຕແຜນງານການຄຸ້ມຄອງປັນຍາປະດິດໂລກ, ສູນຄຸ້ມຄອງນະວັດຕະກຳປັນຍາປະດິດໂລກ, ໂຄງການລິເລີ່ມການຮ່ວມມືປັນຍາປະດິດລະບົບເປີດລະດັບສາກົນ, ລະບົບເຕືອນໄພອັນຕະລາຍລ່ວງໜ້າດ້ວຍປັນຍາປະດິດ ແລະ ອື່ນໆ.

ພ້ອມກັນນີ້, ໃນກອງປະຊຸມລະດັບສູງ ໃນການຄຸ້ມຄອງປັນຍາປະດິດສາກົນ, ທ່ານ ຮອງລັດຖະມົນຕີ ກະຊວງເຕັກໂນໂລຊີ ແລະ ການສືສານ ແຫ່ງ ສປປ ລາວ ກໍໄດ້ປະກອບຄຳເຫັນຕໍ່ກອງປະຊຸມ ໂດຍມີບາງຕອນທ່ານໄດ້ກ່າວວ່າ: ໃນໂລກຍຸກໂລກາພິວັດປັດຈຸບັນ, ປັນຍາປະດິດໄດ້ກາຍເປັນກໍາລັງສໍາຄັນທີ່ຊຸກຍູ້ການພັດທະນາໃນທົ່ວໂລກ. ເຖິງວ່າ ສປປ ລາວ ເປັນປະເທດທີ່ກຳລັງພັດທະນາ, ແຕ່ພວກເຮົາກໍຕັ້ງໜ້າເຂົ້າໃນການສຳຫຼວດ ແລະ ນຳໃຊ້ປັນຍາປະດິດຢ່າງຈິງຈັງ. ພວກເຮົາເຂົ້າໃຈວ່າໃນຍຸກເສດຖະກິດດິຈິຕອນ, ການພັດທະນາຂອງເຕັກໂນໂລຊີປັນຍາປະດິດແມ່ນມີຄວາມສຳຄັນຢ່າງຍິ່ງ ຕໍ່ການເພີ່ມຂີດຄວາມສາມາດໃນການແຂ່ງຂັນຂອງປະເທດ ແລະ ຍົກລະດັບຊີວິດການເປັນຢູ່ຂອງປະຊາຊົນ.

​            ແຕ່ເຖິງຢ່າງໃດກໍຕາມ, ເຖິງວ່າ ປັນຍາປະດິດ ຈະມອບໂອກາດອັນໃຫຍ່ຫຼວງ, ແຕ່ມັນກໍຍັງມີຄວາມສ່ຽງ ແລະ ສິ່ງທ້າທາຍຫຼາຍຢ່າງ ເຊັ່ນ: ຄວາມປອດໄພຂອງຂໍ້ມູນ, ການປົກປ້ອງຄວາມເປັນສ່ວນຕົວ, ຄວາມລໍາອຽງໃນຂັ້ນຕອນວິທີ ແລະ ອື່ນໆ. ດັ່ງນັ້ນ, ການສ້າງຄວາມດຸ່ນດ່ຽງລະຫວ່າງ ການພັດທະນາ ແລະ ຄວາມປອດໄພຂອງ ປັນຍາປະດິດ ຈຶ່ງມີຄວາມຈໍາເປັນທີ່ເລັ່ງດ່ວນ ທີ່​ບໍ່​ພຽງ​ແຕ່ຮຽກຮ້ອງຄວາມ​ພະຍາຍາມຈາກ​ປະເທດໃດໜຶ່ງ, ແຕ່ຍັງຮຽກຮ້ອງການຮ່ວມມືໃນທົ່ວໂລກ. ສປປ ລາວ ສະໜັບສະໜູນຄວາມພະຍາຍາມໃນການຮ່ວມກັນຂອງທຸກປະເທດ ເພື່ອສ້າງຂອບການຄຸ້ມຄອງປັນຍາປະດິດລະດັບໂລກ ທີ່ສາກົນໃຫ້ການຍອມຮັບຢ່າງກວ້າງຂວາງ ພາຍໃຕ້​ຫຼັກການຖືເອົາມະນຸດເປັນໃຈກາງ, ​ເປີດ​ກວ້າງ, ສະເໝີພາບ ​ແລະ ​ຍຸຕິ​ທຳ, ​ໂດຍ​ຜ່ານ​ການ​ສົນທະນາ, ​ຮ່ວມ​ມື ແລະ ສ້າງ​ລະບຽບ​ການ​ປົກຄອງ​ທີ່​ສອດຄ່ອງ​ກັບ​ເງື່ອນ​ໄຂ​ ​ແລະ ຜົນ​ປະ​ໂຫຍ​ດຂອງ​ແຕ່ລະ​ປະ​ເທດ, ເພື່ອໃຫ້ຮັບປະກັນວ່າ ປັນຍາປະດິດ ຈະເປັນປະໂຫຍດຢ່າງເຕັມທີ່ຕໍ່ມະນຸດຊາດ. ພ້ອມທັງໄດ້ກ່າວ​ຊົມ​ເຊີຍ ​ໂຄງການ​ລິ​ເລີ່ມລະດັບ​ໂລກກ່ຽວ​ກັບ​ການ​ຄຸ້ມ​ຄອງ ປັນຍາປະດິດ ທີ່​ປະ​ກາດໃຊ້​ໂດຍ ​ທ່ານ ສີຈິ້ນຜິງ, ປະ​ທານ​ປະ​ເທດ​ຈີນ​ ແລະ​ ຊົມ​ເຊີຍ​ຄວາມ​ພະ​ຍາ​ຍາມ​ຂອງ​ຈີນ​ ໃນ​ການສົ່ງເສີມ​ສິດ​ຂອງ​ປະ​ເທດ​ທີ່ກຳລັງ​ພັດ​ທະ​ນາ​ ໃຫ້ມີສ່ວນຮ່ວມໃນ​ການ​ຄຸ້ມ​ຄອງປັນຍາປະດິດລະດັບໂລກ. 

ໃນໄລຍະງານປະຊຸມດັ່ງກ່າວ, ຄະນະຜູ້ແທນ ສປປ ລາວ ຍັງໄດ້ເຂົ້າຮ່ວມກອງປະຊຸມຍ່ອຍຫົວຂໍ້ຕ່າງໆ ເພື່ອສົນທະນາແລກປ່ຽນບົດຮຽນການຄຸ້ມຄອງ ແລະ ນຳໃຊ້ເປັນຍາປະດິດ ເພື່ອເປັນແນວທາງໃນການພັດທະນາ ແລະ ນຳໃຊ້ເຕັກໂນໂລຊີປັນຍາປະດິດເຂົ້າໃນຂົງເຂດຕ່າງໆ.