ກົມຈັດຕັ້ງ ແລະ ພະນັກງານ, ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມເຜີຍແຜ່ວຽກງານປະກັນສັງຄົມ ຂຶ້ນໃນວັນທີ 31 ກໍລະກົດ 2025, ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ຕຶກF) ໂດຍການເປັນປະທານ ຂອງ ທ່ານ ມະໂນທອງ ວົງລໍຄຳ, ຫົວໜ້າກົມຈັດຕັ້ງ ແລະ ພະນັກງານ, ຊຶ່ງມີບັນດາຫົວໜ້າກົມ/ທຽບເທົ່າ, ຫົວໜ້າພະແນກ, ຮອງພະແນກ ແລະ ພະນັກງານວິຊາການພາຍໃນກະຊວງ ເຂົ້າຮ່ວມ 100 ກວ່າທ່ານ.

ຈຸດປະສົງ ແມ່ນເພື່ອເຜີຍແຜ່ວຽກງານປະກັນສັງຄົມໃຫ້ແກ່ພະນັກງານພາຍໃນ ກະຊວງເຕັກໂນໂລຊີ ແລະ ການສື່ສານ ຮັບຮູ້ ແລະ ເຂົ້າໃຈຢ່າງເປັນເອກະພາບ ກ່ຽວກັບສິດ ແລະ ຜົນປະໂຫຍດຕ່າງໆ ທີ່ປະກັນສັງຄົມໃຫ້ການຄຸ້ມຄອງຜູ້ປະກັນຕົນ.

ໃນກອງປະຊຸມ, ຜູ້ຕ່າງໜ້າຈາກ ອົງການປະກັນສັງຄົມແຫ່ງຊາດ ໄດ້ເຜີຍແຜ່ ແລະ ນໍາສະ
 ເໜີລະບົບປະກັນສັງຄົມ ພາຍໃຕ້ກົດໝາຍ ວ່າດ້ວຍການປະກັນສັງຄົມ ສະບັບເລກທີ 54/ສພຊ (ສະບັບປັບປຸງ), ຄວາມເປັນມາອົງການປະກັນສັງຄົມແຫ່ງຊາດ, ຂອບເຂດການນຳໃຊ້ກົດໝາຍ, ການຂຶ້ນທະບຽນເປັນສະມາຊິກໃນການເລືອກໂຮງໝໍ 01 ແຫ່ງ, ການຈັດສັນກອງທຶນປະສັງຄົມແຫ່ງຊາດ ເຊັ່ນ: ປິ່ນປົວສຸຂະພາບ, ອຸປະຕິເຫດແຮງງານ, ອຸດໜູນອອກລູກຂອງພະນັກງານລັດຖະກອນເພດຍິງ, ອຸດໜູນປ່ວຍການ, ອຸດໜູນເສຍກໍາລັງແຮງງານ, ອຸດໜູນເບິ່ງແຍງຜູ້ເສຍອົງຄະ, ເງິນອຸດໜູນເປັນເງິນເດືອນ, ອຸດໜູນບຳນານ, ອຸດໜູນບຳເນັດເທື່ອດຽວ, ອຸດໜູນຜູ້ເສຍຊີວິດ, ອຸດໜູນສະມາຊິຄອບຄົວ ແລະ ອື່ນໆ ໃນການໂອກາດດຽວກັນນັ້ນໃນກອງປະຊຸມຍັງໄດ້ຖາມ-ຕອບ ແລະ ປະກອບຄວາມຄິດເຫັນຢ່າງຟົດຟື້ນ.

ຂ່າວ ແລະ ຮູບ: ພຸດດາວອນ ພາສຸວັນ.