ໃນຕອນເຊົ້າ ຂອງວັນທີ 01 ສິງຫາ 2025, ໜ່ວຍພັກຮາກຖານສູນອິນເຕີເນັດແຫ່ງຊາດ, ໜ່ວຍພັກຮາກຖານສູນບໍລິຫານລັດດິຈິຕອນ ແລະ ໜ່ວຍພັກຮາກຖານກົມໄປສະນີ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິທີຮັບເອົາສະມາຊິກພັກສຳຮອງຂື້ນເປັນສະມາຊິກພັກສົມບູນ ຂອງພັກປະຊາຊົນປະຕິວັດລາວ, ທີ່ ຫ້ອງປະຊຸມຂອງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ຕຶກ F).  ໃຫ້ກຽດເປັນປະທານໂດຍ ສະຫາຍ ແກ້ວວິສຸກ ໂສລະພົມ, ຄະນະປະຈໍາພັກກະຊວງ, ຮອງລັດຖະມົນຕີ ກຕສ, ມີບັນດາສະຫາຍເລຂາ, ຮອງເລຂາ ບັນດາຄະນະພັກຮາກຖານ, ໜ່ວຍພັກຮາກຖານກົມ/ທຽບເທົ່າ ພ້ອມດ້ວຍສະມາຊິກພັກ ຂອງທັງ 03 ໜ່ວຍພັກ ເຂົ້າຮ່ວມຈໍານວນ 50 ກວ່າສະຫາຍ.

ໃນພິທີດັ່ງກ່າວ ສະຫາຍເລຂາ, ຮອງເລຂາ ໜ່ວຍພັກທັງ 03 ພາກສ່ວນ ໄດ້ຂຶ້ນຜ່ານ ມະຕິຕົກລົງ ຂອງ ຄະນະປະຈຳພັກ ກະຊວງເຕັກໂນໂລຊີ ແລະ ການສື່ສານ ວ່າດ້ວຍການອະນຸມັດເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ ຂອງໜ່ວຍພັກຮາກຖານສູນອິນເຕີເນັດແຫ່ງຊາດ ຈຳນວນ 04 ສະຫາຍ, ຍິງ 01 ສະຫາຍ, ໜ່ວຍພັກຮາກຖານສູນບໍລິຫານລັດດິຈິຕອນ ຈຳນວນ 02 ສະຫາຍ ແລະ ໜ່ວຍພັກຮາກຖານກົມໄປສະນີ ຈຳນວນ 01 ສະຫາຍ.

ໂອກາດດຽວກັນນີ້, ສະຫາຍປະທານ ຍັງໄດ້ໃຫ້ກຽດມອບມະຕິຕົກລົງ ພ້ອມທັງໂອ້ລົມ ແລະ ກ່າວສະແດງຄວາມຍິນດີ, ຍ້ອງຍໍຊົມເຊີຍ ຕໍ່ສະຫາຍສະມາຊິກພັກສົມບູນໃໝ່ ທີ່ໄດ້ມີຄວາມຫ້າວຫັ້ນໃນການຈັດຕັ້ງປະຕິບັດໜ້າທີ່ວຽກງານ, ຜ່ານຜ່າອຸປະສັກຕ່າງໆຈົນສາມາດເຂົ້າເປັນສະມາຊິກພັກສົມບູນໃນຄັ້ງນີ້. ພ້ອມນັ້ນ ສະຫາຍຍັງໄດ້ເນັ້ນໜັກໃຫ້ສະມາຊິກພັກສົມບູນໃໝ່ ແລະ ບັນດາສະມາຊິກພັກທັງໝົດ ຈົ່ງສືບຕໍ່ຝຶກຝົນຫຼໍ່ຫຼອມຕົນເອງ, ຮັກສາມູນເຊື້ອຄຸນສົມບັດສິນທຳປະຕິວັດ, ເອົາໃຈໃສ່ການພັດທະນາຕົນເອງ, ຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະ, ທິດສະດີການເມືອງ ເພື່ອສາມາດຕອບສະໜອງ ໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ມີແບບແຜນວິທີເຮັດວຽກ, ເຕົ້າໂຮມຄວາມສາມັກຄີເປັນແບບຢ່າງນໍາໜ້າແກ່ມະຫາຊົນໃນທຸກຂະບວນການ ພ້ອມທັງສຸມໃສ່ສະຕິປັນຍາເຫື່ອແຮງເຂົ້າໃນການຈັດຕັ້ງປະຕິບັດວຽກງານທີ່ຂັ້ນເທິງມອບ   ໝາຍໃຫ້ ເວົ້າລວມ ເວົ້າສະເພາະ ກໍຄືວຽກງານຂະແໜງເຕັກໂນໂລຊີ ແລະ ການສື່ສານ ເພື່ອປະກອບເຂົ້າໃນການສ້າງສາ ແລະ ພັດທະນາປະເທດຊາດເຮົາໃຫ້ນັບມື້ນັບຈະເລີນກ້າວໜ້າຂຶ້ນເລື້່ອຍໆ.

ຂ່າວ: ສູນບໍລິຫານລັດດິຈິຕອນ.