ໃນຕອນເຊົ້າວັນທີ 16 ກັນຍາ 2025, ກະຊວງ ເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມເຜີຍແຜ່ ​ແນະ​ນຳວິທີການສະໝັກທຶນການສຶກສາ ປະລິນໂທ ແລະ ປະລິນຍາເອກ ສົກປີ 2026-2027 ຂອງໂຄງການທຶນການສຶກສາ ເພື່ອພັດທະນາຊັບພະຍາກອນມະນຸດ ( JDS ) ປະເທດຍີ່ປຸ່ນ ສໍາລັບປີ 2025 ໃຫ້ພະນັກງານບັນດາກົມ/ທຽບເທົ່າ ອ້ອມ​ຂ້າງ​ ກຕສ ເພື່ອ​ໃຫ້ຮັບຮູ້ ແລະ ເຂົ້າໃຈ​ວິ​ທີ ຂັ້ນຕອນໃນການສະໝັກທຶນ​. ໃຫ້ກຽດກ່າວເປີດພິທີໂດຍ ທ່ານ ເຄນທອງ ແພງວົງສາ, ຮອງຫົວ​ໜ້າ​ກົມ​ຈັດ​ຕັ້ງ ແລະ ພະ​ນັກ​ງານ, ກຕສ ​ມີທ່ານ ມູຊິອາເກ ເອຊູໂອ ທີ່ປຶກສາພາຍໃນ ອົງການ JICA ຈາກປະເທດຍີ່ປຸ່ນ ແລະ ທ່ານ ນາງ ຢາມາຊິຕະໂຢຊິເອ, ຫົວໜ້າຫ້ອງການ ອົງການ JICE JDS ປະຈໍາ ສປປ ລາວ ພ້ອມດວ້ຍຄະນະ ມີບັນດາຄະນະກົມ, ຄະນະພະແນກ, ພະນັກງານ-ວິຊາການ ຈາກບັນດາ​ກົມ/ທຽບ​ເທົ່າ ແລະ ນັກສຶກສາຈາກສະຖາບັນເຕັກໂນໂລຊີສື່ສານຂໍ້ມູນຂ່າວສານ ເຂົ້າຮ່ວມ 133 ທ່ານ.

ທ່ານ ເຄນທອງ ແພງວົງສາ ໄດ້ກ່າວວ່າ: ກອງປະຊຸມເຜີຍແຜ່ ​ແນະ​ນຳວິທີການສະໝັກທຶນການສຶກສາ ປະລິນໂທ ແລະ ປະລິນຍາເອກ ສົກປີ 2026-2027 ຂອງໂຄງການທຶນການສຶກສາ ເພື່ອພັດທະນາຊັບພະຍາກອນມະນຸດ (JDS) ປະເທດຍີ່ປຸ່ນ ສໍາລັບປີ 2025 ຈະສາມາດເຮັດໃຫ້ພວກເຮົາໄດ້ຮັບຮູ້ເຖີງລະບຽບຂອງການຝືກອົບຮົມ ແລະ ຄວາມສໍາຄັນຂັ້ນຕອນ-ວິທີການສະໝັກທຶນ(JDS) ເພື່ອເຮັດໃຫ້ພວກເຮົາມີໂອກາດ ແລະ ຊ່ອງຫວ່າງງ່າຍຂຶ້ນໃນການສະໝັກທຶນດັ່ງກ່າວ. ການສະໝັກທຶນການສຶກສາ ແມ່ນວິທີປະກອບແບບຟອມ-ຄໍາຮ້ອງຕ່າງໆທີ່ຖືກຕ້ອງ ເພື່ອຍາດແຍ່ງເອົາທຶນການສືກສາ ບໍ່ວ່າຈະເປັນ ປ.ໂທ, ປ. ເອກ ແລະ ອື່ນໆ ເພື່ອເປັນການພັດທະນາທະນາແຫຼ່ງຄວາມຮູ້ຄວາມສາມາດ ແລະ ລະ​ບຽບ​ການຝຶກ​ອົບ​ຮົມ ຮັບປະກັນໃຫ້ຕົນເອງ ແລະ ວຽກງານທີ່ຕົນຮັບຜິດຊອບ ໃຫ້ມີຄຸນນະພາບຍິ່ງຂຶ້ນ.

ໃຫ້ກຽດເຜີຍແຜ່ວິທີການສະໝັກທຶນການສຶກສາ​ຄັ້ງ​ນີ້ ໂດຍ ທ່ານ ນາງ ອານົງລັກ ທິລະກຸນ ວິທະຍາກອນຈາກ ອົງການ JICE JDS ປະຈຳ ສປປ ລາວ ແລະ ເຜີຍແຜ່ລະບຽບການຝຶກອົບຮົມ ການພັດທະນາພະນັກງານ-ລັດຖະກອນ ຂອງ ຂະແໜງເຕັກໂນໂລຊີ ແລະ ການສື່ສານ ໂດຍ ທ່ານ ວິລະສັກ ໄຊຍະວົງ ຫົວໜ້າພະແນກພັດທະນາບຸກລະຄງກອນ.