ໃນຕອນເຊົ້າວັນທີ 27 ຕຸລາ 2025, ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ເເລະ ການສື່ສານ (ກຕສ) ສປປ ລາວ ໄດ້ເຂົ້າຮ່ວມງານສັບປະດາດິຈິຕອນສາກົນຫວຽດນາມ ປີ 2025 ແລະ ກອງປະຊຸມໂຕະມົນລະດັບລັດຖະມົນຕີ ກ່ຽວກັບ ການຄຸ້ມຄອງປັນຍາປະດິດ, ໂດຍການເປັນປະທານ ຂອງ ທ່ານ ຫງວຽນ ​ແມ້ງ ​ຮຸ່ງ, ລັດຖະມົນຕີ​ ກະຊວງ​ວິທະຍາສາດ ​ແລະ ​ເຕັກ​ໂນ​ໂລ​ຊີ ສສ ຫວຽດນາມ, ຊຶ່ງໄດ້ຈັດຂຶ້ນທີ່ ແຂວງ ນິງບິ່ງ,​ ສສ ຫວຽດນາມ, ມີຜູ້ເຂົ້າຮ່ວມປະມານ 300 ກວ່າທ່ານ.

ງານສັບປະດາດິຈິຕອນສາກົນຫວຽດນາມ (VIDW) ໄດ້ຈັດຂຶ້ນຄັ້ງທຳອິດໃນປີ 2019 ແລະ ນັບຕັ້ງແຕ່ນັ້ນມາໄດ້ເຕີບໃຫຍ່ຂະຫຍາຍຕົວກາຍເປັນງານປະຈຳປີທີ່ມີຊື່ສຽງໃນພາກພື້ນ. ໃນປີ 2025, ງານດັ່ງກ່າວໄດ້ຮັບການເປັນເຈົ້າພາບໂດຍ ກະຊວງວິທະຍາສາດ ແລະ ເຕັກໂນໂລຊີ (MST) ຂອງ ສສ ຫວຽດນາມ, ໂດຍມີການນຳເອົາຜູ້ນຳລັດຖະບານ, ອົງການຈັດຕັ້ງສາກົນ, ຜູ້ຊ່ຽວຊານ ແລະ ວິສາຫະກິດເຕັກໂນໂລຊີຊັ້ນນຳມາຮ່ວມກັນ. ຈຸດປະສົງເພື່ອສົ່ງເສີມການຮ່ວມມືສາກົນໃນຂົງເຂດສຳຄັນ ເຊັ່ນ: ປັນຍາປະດິດ (AI), 5G, ພື້ນຖານໂຄງລ່າງດິຈິຕອນ, ການຫັນປ່ຽນດິຈິຕອນ, ກຳລັງແຮງງານດິຈິຕອນ, ວິສາຫະກິດດິຈິຕອນ ແລະ ຍັງເປັນເວທີປາໄສລະດັບສູງສຳລັບການແລກປ່ຽນທິດທາງນະໂຍບາຍ, ຍຸດທະສາດ ແລະ ການປະຕິບັດທີ່ດີທີ່ສຸດ, ພ້ອມທັງເປັນຕົວກະຕຸ້ນໃຫ້ແກ່ນະວັດຕະກຳ, ການຄ້າເຕັກໂນໂລຊີ ແລະ ການພັດທະນາລະບົບນິເວດດິຈິຕອນທີ່ຍືນຍົງ.

ກອງປະຊຸມໂຕະມົນລະດັບລັດຖະມົນຕີ ກ່ຽວກັບ ການຄຸ້ມຄອງປັນຍາປະດິດ ມີຜູ້ເຂົ້າຮ່ວມຈາກບັນດາປະເທດອາຊຽນ, ອົງການຈັດຕັ້ງສາກົນ ແລະ ພາກສ່ວນຕ່າງໆ ເຊັ່ນ: ປະເທດກຳປູເຈຍ, ໂມຊຳບິກ, ສາທາລະນະລັດບູຣຸນດີ, ເລຂາທິການໃຫຍ່ຂອງອົງການໂທລະຄົມມະນາຄົມອາຊີ-ປາຊີຟິກ (APT), ຜູ້ອຳນວຍການຝ່າຍນະໂຍບາຍ ແລະ ສະຕິປັນຍາດິຈິຕອນ, ອົງການຮ່ວມມືດິຈິຕອນ (DCO), ຜູ້ຕາງໜ້າອົງການ UNESCO ປະຈຳຫວຽດນາມ, ຫົວໜ້າຝ່າຍສາຍພົວພັນລັດຖະບານ ແລະ ນະໂຍບາຍສາທາລະນະ, Google ປະຈຳອາຊີ-ປາຊີຟິກ ປະຈຳຫວຽດນາມ; ຫ້ອງການພາກພື້ນອາຊີ-ປາຊີຟິກ ຂອງສະຫະພາບໂທລະຄົມມະນາຄົມສາກົນ (ITU), ອົງການສົ່ງເສີມອຸດສາຫະກຳເຕັກໂນໂລຊີຂໍ້ມູນຂ່າວສານແຫ່ງຊາດ (NIPA) ສາທາລະນະລັດ ເກົາຫຼີ, ເອກອັກຄະລັດຖະທູດຕ່າງໆ ປະຈໍາ ຫວຽດນາມ ແລະ ພາກສ່ວນຕ່າງໆເຂົ້າຮ່ວມ.

ພ້ອມກັນນັ້ນ, ຄະນະຜູ້ແທນ ຂອງ ສປປ ລາວ ນຳໂດຍ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ເເລະ ການສື່ສານ ກໍໄດ້ເຂົ້າຮ່ວມກອງປະຊຸມພົບປະສອງຝ່າຍ ເຊິ່ງໃຫ້ກຽດຕ້ອນຮັບໂດຍ ທ່ານ ຫງວຽນ ​ແມ້ງ​ ຮຸ່ງ, ລັດຖະມົນຕີ​ ກະຊວງ​ວິທະຍາສາດ ​ແລະ ​ເຕັກ​ໂນ​ໂລ​ຊີ ສສ ຫວຽດນາມ ພ້ອມດ້ວຍຄະນະ ເພື່ອປຶກສາຫາລື ແລະ ທົບທວນຄືນ ພ້ອມທັງວາງທິດທາງແຜນການການຮ່ວມມືໃນຕໍ່ໜ້າ.

ຕອນບ່າຍຂອງວັນດຽວກັນ, ຄະນະຜູ້ແທນ ສປປ ລາວ ກໍໄດ້ເຂົ້າຮ່ວມກອງປະຊຸມພົບປະສອງຝ່າຍ ກັບ ທ່ານ ຊຸນ ວັດ, ຮອງລັດຖະມົນຕີ ກະຊວງ ກະຊວງໄປສະນີ ແລະ ໂທລະຄົມມະນາຄົມ ຣາຊະອານາຈັກກຳປູເຈຍ ເພື່ອປຶກສາຫາລືທົບທວນຄືນການຮ່ວມມືມາ ແລະ ກຳນົດທິດທາງ ການຮ່ວມມືໃນອະນາຄົດ ໂດຍສະເພາະວຽການການຮ່ວມມືທາງດ້ານຊັບພະຍາກອນຮ່ວມກັນ.