ໜ່ວຍງານຕ້ານການຫຼອກລວງທາງອອນລາຍ, ຄະນະກໍາມະການຄຸ້ມຄອງອິນເຕີເນັດແຫ່ງຊາດ (ຄຄອຊ) ໄດ້ຈັດກອງປະຊຸມປຶກສາຫາລື ແຜນດໍາເນີນງານ ໜ່ວຍງານຕ້ານການຫຼອກລວງ ທາງອອນລາຍ ຂຶ້ນໃນເດືອນ ຕຸລາ ທີ່ຜ່ານມາ, ໂດຍມີຕາງໜ້າບັນດາກົມ ພາຍໃນ ກະຊວງເຕັກໂນໂລຊີ ແລະ ການສື່ສານ, ກະຊວງປ້ອງກັນຄວາມສະຫງົບ, ທະນາຄານ ແຫ່ງ ສປປ ລາວ, ບັນດາບໍລິສັດ ໂທລະຄົມມະນາຄົມ, ບັນດາທະນາຄານທຸລະກິດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.    

ພາຍຫຼັງໄດ້ຮັບການສ້າງຕັ້ງ ໜ່ວຍງານຕ້ານການຫຼອກລວງທາງອອນລາຍ (ໜ່ວຍງານ 015/ຄຄອຊ) ກໍໄດ້ດໍາເນີນການປະຊຸມຄັ້ງປະຖົມມະລຶກຂຶ້ນໃນທ້າຍເດືອນ ສິງຫາ ຜ່ານມາ ແລະ ໄດ້ຈັດກອງປະຊຸມວິຊາການ ຈໍານວນ 04 ຄັ້ງ ເພື່ອກວດກາ, ຕິດຕາມ ແລະ ແກ້ໄຂ້ບັນຫາການຕົວະຍົວະຫຼອກລວງທາງອອນລາຍ ເປັນຕົ້ນແມ່ນ ໄດ້ດໍາເນີນການປິດເບີໂທທີ່ຕ້ອງສົງໃສ ໃນການນໍາໃຊ້ໄປຕົວະຍົວະຫຼອກລວງ, ໄດ້ດໍາເນີນການປິດບັນດາເວັບໄຊທີ່ກະທໍາຜິດຕໍ່ລະບຽບກົດໝາຍ ຂອງ ສປປ ລາວ, ໄດ້ດໍາເນີນການແກ້ໄຂບັນຫາການນໍາໃຊ້ຄື້ນສັນຍານດາວທຽມທີ່ຜິດຕໍ່ລະບຽບກົດໝາຍ ຂອງ ສປປ ລາວ ແລະ ປິດບັນຊີທີ່ໄປໃຊ້ບໍ່ຖືກຕ້ອງເປັນທາງຜ່ານຈົນກ້າວໄປເຖິງການແກ້ໄຂບາງກໍລະນີ.

:

ໃນກອງປະຊຸມຄັ້ງນີ້ ໄດ້ເນັ້ນຍໍ້າໃຫ້ແຕ່ລະພາກສ່ວນ ປະສານສົມທົບລະອຽດກ່ຽວກັບການເປີດສູນຮັບແຈ້ງເຫດ ໂດຍສະເພາະ ດ້ານນິຕິກໍາ, ພາລະບົດບາດ, ສູນສາຍດ່ວນຮັບແຈ້ງເຫດ, ຂອດປະສານງານຮັບຮອງຂໍ້ມູນຮ່ວມກັນໃນການຈັດຕັ້ງປະຕິບັດ ແລະ ນິຕິກໍາ ອື່ນໆທີ່ປິ່ນອ້ອມ ເພື່ອໃຫ້ສາມາດຈັດຕັ້ງປະຕິບັດວຽກງານດັ່ງກ່າວໃຫ້ທັນກັບສະພາບການ. ພ້ອມນີ້, ທຸກພາກສ່ວນເຫັນດີໃນການສຶບຕໍ່ກວດກາ, ຕິດຕາມ ແລະ ໂຄສະນາເຜີຍແຜ່ໃຫ້ຄວາມຮູ້ແກ່ປະຊາຊົນ ເພື່ອສ້າງພູມຄຸ້ມກັນຕໍ່ການຕົວະຍົວະຫຼອກລວງຜ່ານທາງອອນລາຍ.

ຂ່າວ ແລະ ພາບ: ຫ້ອງການກອງເລຂາ ຄຄອຊ