ໃນຕອນເຊົ້າ ວັນທີ 13 ມີນາ 2026, ທີ່ຫ້ອງປະຊຸມຊັ້ນ 2 ສູນອິນເຕີເນັດແຫ່ງຊາດ, ກົມເຕັກໂນໂລຊີ ແລະ ນະວັດຕະກຳ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມ ຄົ້ນຄ້ວາປະກອບຄຳເຫັນໃສ່ (ຮ່າງ) ດຳລັດວ່າດ້ວຍການຄຸ້ມຄອງ ແລະ ນຳໃຊ້ເຕັກໂນໂລຊີ. ໂດຍການເປັນປະທານຂອງ ທ່ານ ໄຊຊະນະ ສິດທິພອນ, ຮອງລັດຖະມົນຕີ ກຕສ, ມີຜູ້ເຂົ້າຮ່ວມຈາກຫ້ອງການ, ກົມ, ສູນ, ​ສະຖາບັນ ແລະ ທຽບເທົ່າ ພາຍໃນ ກຕສ ແລະ ຄະນະຮັບຜີດຊອບພາຍໃນກົມເຕັກໂນໂລຊີ ແລະ ນະວັດຕະກຳ ເຂົ້້າຮ່ວມ ຈຳນວນ 35 ທ່ານ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຜ່ານ (ຮ່າງ) ດຳລັດດ້ວຍການຄຸ້ມຄອງ ແລະ ນຳໃຊ້ເຕັກໂນໂລຊີ ແລະ ຮັບຟັງການປະກອບຄວາມຄິດເຫັນ ບັນດາທ່ານຜູ້ຕາງໜ້າຈາກ ຫ້ອງການ, ກົມ, ສູນ, ​ສະຖາບັນ ແລະ ທຽບເທົ່າ ພາຍໃນ ກຕສ ເພື່ອເຮັດໃຫ້ຮ່າງດຳລັດສະບັບດັ່ງກ່າວ ມີເນື້ອໃນຄົບຖ້ວນ, ສົມບູນກ່ອນທີ່ຈະນຳສະເໜີເປີດກ້ວາງຮ່ວມກັບດາກະຊວງອ້ອມຂ້າງ ແລະ ພາກສ່ວນທຸລະກິດ.

ກອງປະຊຸມ ໄດ້ຮັບຟັງການນໍາສະເໜີຮ່າງດໍາລັດວ່າດ້ວຍການຄຸ້ມຄອງ ແລະ ນໍາໃຊ້ເຕັກໂນໂລຊີ ໂດຍ ທ່ານ ວິໄລສອນ ບຸບຜາລັດ, ຫົວໜ້າກົມເຕັກໂນໂລຊີ ແລະ ນະວັດຕະກໍາ. ພ້ອມນັ້ນ, ກໍໄດ້ຮັບຟັງການປະກອບຄຳເຫັນທາງດ້ານຫຼັກການ ແລະ ເນື້ອໃນ ຂອງຜູ້ເຂົ້າຮ່ວມຢ່າງກົງໄປກົງມາ ຕໍ່ກັບເນື້ອໃນຂອງຮ່າງດຳລັດສະບັບດັ່ງກ່າວ.

ຕອນທ້າຍ ປະທານກອງປະຊຸມໄດ້ມີຄຳເຫັນ ແລະ ທິດຊີ້ນຳ. ໂດຍທ່ານຍົກໃຫ້ເຫັນຄວາມໝາຍສຳຄັນຂອງດຳລັດ. ພ້ອມທັງ ສະເໜີໃຫ້ຄະນະຮັບຜິດຊອບເອົາໃຈໃສ່ສືບຕໍ່ຄົ້ນຄ້ວາປັບປຸງເນື້ອໃນຕາມຄຳເຫັນຂອງຜູ້ເຂົ້າຮ່ວມກອງປະຊຸມ ເພື່ອໃຫ້ມີເນື້ອໃນ ຄົບຖ້ວນ, ສົມບູນ ແລະ ສາມາດນຳໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈິງໄດ້.

ກອງປະຊຸມໄດ້ດໍາເນີນໄປເປັນເວລາເຄີ່ງວັນ ຊື່ງໄດ້ຮັບຜົນສຳເລັດຕາມຄາດໝາຍ ແລະ ປິດລົງໃນເວລາ 12: 00 ໂມງ ໃນວັນດຽວກັນ