ໃນວັນທີ 07 ພຶດສະພາ 2026, ສູນຂໍ້ມູນແຫ່ງຊາດ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມເປີດກວ້າງ  ກ່ຽວກັບການປັບປຸງ ດໍາລັດວ່າດ້ວຍສູນຂໍ້ມູນຂ່າວສານຜ່ານອິນເຕີເນັດ ຂຶ້ນທີ່ຫ້ອງປະຊຸມຊັ້ນ 02, ສູນອິນເຕີເນັດແຫ່ງຊາດ. ໂດຍການເປັນປະທານ ຂອງ ທ່ານ ໄຊຊະນະ ສິດທິພອນ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ມີຫົວໜ້າສູນ, ຮອງສູນ, ຜູ້ຕາງໜ້າຈາກກະຊວງ, ອົງການລັດ/ທຽບເທົ່າກະຊວງ, ອົງການປົກຄອງແຂວງ, ນະຄອນຫຼວງ, ບັນດາຂະແໜງການ ແລະ ຫົວໜ່ວຍທຸລະກິດ ເຂົ້າຮ່ວມທັງໝົດ 60 ທ່ານ ແລະ ພະແນກ ຕສ ແຂວງເຂົ້າຮ່ວມປະຊຸມອອນລາຍ 17 ແຂວງ, ລວມທັງໝົດ 85 ທ່ານ.

ຈຸດປະສົງກອງປະຊຸມໃນຄັ້ງນີ້, ແມ່ນເພື່ອທົບທວນຄືນ ແລະ ປັບປຸງ ດໍາລັດວ່າດ້ວຍສູນຂໍ້ມູນຂ່າວສານຜ່ານອິນເຕີເນັດ ສະບັບເລກທີ 412/ລບ, ລົງວັນທີ 10 ພະຈິກ 2016. ຊຶ່ງດໍາລັດສະບັບດັ່ງກ່າວນີ້ ໄດ້ຖືກສ້າງຂຶ້ນໃນປີ 2016 ເພື່ອວາງພື້ນຖານການຄຸ້ມຄອງສູນຂໍ້ມູນ (Data Center) ໃຫ້ເປັນລະບົບ. ຫຼັງຈາກການຈັດຕັ້ງປະຕິບັດມາເປັນເວລາ 9 ປີ, ເຫັນວ່າມີຄວາມຈໍາເປັນຮີບດ່ວນ ທີ່ຕ້ອງໄດ້ປັບປຸງ ທີ່ປະກອບດ້ວຍຫຼາຍປັດໃຈ ເປັນຕົ້ນ: ການປ່ຽນແປງ ແລະ ການເຕີບໃຫຍ່ຂະຫຍາຍຕົວຂອງເຕັກໂນໂລຊີ ຢ່າງໄວວາ. ຊຶ່ງໃນປີ 2016 ການບໍລິການສ່ວນຫຼາຍແມ່ນອີງໃສ່ໂຄງລ່າງພື້ນຖານທາງກາຍະພາບ. ປັດຈຸບັນ, ເຕັກໂນໂລຊີໄດ້ກ້າວໄປສູ່ຍຸກຂອງ Cloud Computing, Big Data, ແລະ Artificial Intelligence (AI) ດໍາລັດສະບັບເກົ່າ ບໍ່ສາມາດກວມເອົາການບໍລິການໃໝ່ໆເຫຼົ່ານີ້ໄດ້ຢ່າງຄົບຖ້ວນ ແລະ ປອດໄພ, ດ້ານມາດຕະຖານເຕັກນິກ, ກຳນົດປະເພດສູນຂໍ້ມູນ ແລະ  ປະເພດຂອງຂໍ້ມູນ ຍັງບໍ່ຊັດເຈນ, ເຮັດໃຫ້ການພັດທະນາ ສ້າງສູນຂໍ້ມູນຍັງຂາດມາດຕະຖານສາກົນ, ບໍ່ໄດ້ຮັບຄວາມເຊື່ອໝັ້ນຈາກຜູ້ຊົມໃຊ້, ກໍໃຫ້ເກີດຄວາມສ່ຽງໃນການໃຫ້ບໍລິການສູນຂໍ້ມູນ. ສະນັ້ນ, ເພື່ອສ້າງເງື່ອນໄຂທີ່ເອື້ອຍອຳນວຍຄວາມສະດວກ ແນ່ໃສ່ດຶງດູດການລົງທຶນຈາກພາກເອກະຊົນທັງພາຍໃນ ແລະ ຕ່າງປະເທດ ໃນການພັດທະນາ ແລະ ໃຫ້ບໍລິການສູນຂໍ້ມູນ ສາມາດຮອງຮັບການຫັນເປັນດິຈິຕອນ. ໂດຍການປັບປຸງຄັ້ງນີ້ ໄດ້ມີການປັບປຸງຊື່ຂອງກະຊວງ, ພາລະບົດບາດ ແລະ ຂອບເຂດສິດອໍານາດໃຫ້ສອດຄ່ອງກັບໂຄງປະກອບການຈັດຕັ້ງໃໝ່ຂອງ ກະຊວງເຕັກໂນໂລຊີ ແລະ ການສື່ສານ.

ຕອນທ້າຍກອງປະຊຸມ ບັນດາຜູ້ເຂົ້າຮ່ວມໄດ້ມີການຖາມ-ຕອບ ແລະ ແລກປ່ຽນຄວາມຄິດເຫັນຢ່າງຟົດຟື້ນ ສ້າງໃຫ້ມີຜົນສໍາເລັດ ໂດຍການປັບປຸງເນື້ອໃນດໍາລັດ ໃຫ້ມີຄວາມທັນສະໄໝ, ມີຄວາມຢືດຢຸ່ນ ແລະ ສອດຄ່ອງກັບມາດຕະຖານສາກົນ, ສ້າງຄວາມຊັດເຈນຂອງເນື້ອໃນ ໂດຍການກໍານົດນິຍາມ, ຂັ້ນຕອນການອະນຸຍາດ ແລະ ມາດຕະຖານດ້ານຄວາມປອດໄພ (Cybersecurity) ໃຫ້ມີຄວາມຊັດເຈນ ແລະ ເປັນລະບົບຫຼາຍຂຶ້ນ, ເພີ່ມຂໍ້ກໍານົດທີ່ເຂັ້ມງວດໃນການປົກປ້ອງຂໍ້ມູນຜູ້ຊົມໃຊ້ ແລະ ຂໍ້ມູນທີ່ສໍາຄັນຂອງຊາດ.

ຂ່າວ: ສູນຂໍ້ມູນແຫ່ງຊາດ

ພາບ: ທ່ານ ພຸດດາວອນ ພາສຸວັນ