ບົດປາໄສຕາງໜ້ານັກສຶກສານານາຊາດ ໃນພິທີປິດສົກຮຽນ ຫຼັກສູດກຽມພາສາ ພາຍໃຕ້ໂຄງການຮ່ວມມື ລະຫວ່າງ ກະຊວງເຕັກໂນໂລຊີ ແລະ ການສື່ສານ ແຫ່ງ ສປປ ລາວ ແລະ ມະຫາວິທະຍາໄລຢຸນນານ ສປ ຈີນ

11/06/2026

ຜູ້ກ່າວ: ຈຽງ ເຫວີຍ (姜伟)
ຄະນະ: ຄະນະການສຶກສານານາຊາດ ມະຫາວິທະຍາໄລຢຸນນານ
ສະຖານທີ່: ວິທະຍາເຂດຕົງລູ່
ວັນທີ: 11 ມິຖຸນາ 2026
ລະດັບພາສາ: HSK 5–6
ເວລາກ່າວ: ປະມານ 4–5 ນາທີ

ຄຳສຳຄັນ: ການເຕີບໃຫຍ່, ຄວາມໄວ້ວາງໃຈ, ຄວາມຮັບຜິດຊອບ, ອະນາຄົດ

ຮຽນ ບັນດາທ່ານຄະນະນຳ, ຄູອາຈານທີ່ເຄົາລົບຮັກ ແລະ ເພື່ອນນັກສຶກສາທີ່ຮັກແພງທຸກຄົນ

ສະບາຍດີຕອນບ່າຍ

ມື້ນີ້, ຂ້າພະເຈົ້າຮູ້ສຶກເປັນກຽດຫຼາຍທີ່ໄດ້ມາຢືນຢູ່ທີ່ນີ້ ເພື່ອກ່າວປາໄສໃນນາມຕາງໜ້ານັກສຶກສາກຽມພາສາ.

ຖ້າມີຄົນຖາມຂ້າພະເຈົ້າວ່າ ສິ່ງທີ່ໄດ້ຮັບຫຼາຍທີ່ສຸດຈາກການຮຽນກຽມພາສາໃນໜຶ່ງປີມານີ້ແມ່ນຫຍັງ ຂ້າພະເຈົ້າຄິດວ່າ ຄຳຕອບມີພຽງປະໂຫຍກດຽວຄື “ເລີ່ມຕົ້ນຈາກຄວາມໄວ້ວາງໃຈ.”

ໜຶ່ງປີກ່ອນ, ພວກເຮົາໄດ້ພົກພາເອົາຄວາມໄຝ່ຝັນທີ່ແຕກຕ່າງກັນ ເດີນທາງມາຈາກຫຼາຍປະເທດ ເພື່ອມາຮຽນຢູ່ ມະຫາວິທະຍາໄລຢຸນນານ. ເຖິງວ່າອາຍຸ, ປະສົບການ ແລະ ພື້ນຖານວັດທະນະທຳຂອງພວກເຮົາຈະແຕກຕ່າງກັນ ແຕ່ນັບຕັ້ງແຕ່ມື້ທຳອິດທີ່ກ້າວເຂົ້າມາໃນມະຫາວິທະຍາໄລແຫ່ງນີ້ ພວກເຮົາກໍມີສະຖານະພາບໜຶ່ງຮ່ວມກັນ ຊຶ່ງນັ້ນກໍຄື ນັກສຶກສາກຽມພາສາ.

ສຳລັບຂ້າພະເຈົ້າ, ການທີ່ໄດ້ຮັບການຄັດເລືອກຈາກກະຊວງເຕັກໂນໂລຊີ ແລະ ການສື່ສານ ແຫ່ງ ສປປ ລາວ ໃຫ້ມາຮຽນຢູ່ທີ່ນີ້ ມັນບໍ່ພຽງແຕ່ເປັນກຽດ ແຕ່ຍັງເປັນຄວາມຮັບຜິດຊອບອັນໃຫຍ່ຫຼວງອີກດ້ວຍ. ສິ່ງທີ່ເຮັດໃຫ້ຮູ້ສຶກພູມໃຈຕື່ມອີກ ກໍຄື ພວກເຮົາທັງ 13 ຄົນ ໄດ້ກາຍເປັນນັກສຶກສາກຸ່ມທຳອິດທີ່ໄດ້ມາຮຽນຢູ່ ມະຫາວິທະຍາໄລຢຸນນານ ແລະ ພວກເຮົາຮຸ່ນນີ້ ກໍໄດ້ກາຍເປັນຈຸດເລີ່ມຕົ້ນໜຶ່ງ ຂອງໄລຍະການແລກປ່ຽນ ແລະ ຮ່ວມມືກັນລະຫວ່າງສອງຝ່າຍ.

ຫຼັງຈາກທີ່ໄດ້ມາຮຽນຢູ່ທີ່ນີ້ ຂ້າພະເຈົ້າກໍຄ່ອຍໆເຂົ້າໃຈວ່າ ທຸກຄວາມຝັນ ແລະ ເປົ້າໝາຍ ລ້ວນແຕ່ຕ້ອງເລີ່ມຈາກຈຸດພື້ນຖານທີ່ສຸດ ແລະ ສຳລັບນັກສຶກສາຕ່າງຊາດທຸກຄົນແລ້ວ ພາສາຈີນ ກໍຄືຈຸດເລີ່ມຕົ້ນນັ້ນເອງ.

ການຮຽນກຽມພາສາໃນໜຶ່ງປີມານີ້ ບໍ່ແມ່ນເລື່ອງງ່າຍເລີຍ, ອາທິດໜຶ່ງມີຮຽນຫຼາຍສິບຊົ່ວໂມງ, ມີການສອບເສັງ ແລະ ຝຶກເຮັດບົດຝຶກຫັດຢູ່ຕະຫຼອດ. ພວກເຮົາເຄີຍກັງວົນ, ເຄີຍຮູ້ສຶກກົດດັນ ແລະ ບາງຄັ້ງກໍເຄີຍສົງໄສໃນຄວາມສາມາດຂອງຕົວເອງ. ແຕ່ເມື່ອຫຼຽວຄືນຫຼັງ ພວກເຮົາຈຶ່ງເຫັນວ່າ ຕົນເອງຍ່າງມາໄກຂະໜາດນີ້ແລ້ວ.

ຕະຫຼອດໄລຍະເວລາໜຶ່ງປີທີ່ຜ່ານມາ, ມະຫາວິທະຍາໄລແຫ່ງນີ້ບໍ່ໄດ້ໃຫ້ພວກເຮົາພຽງແຕ່ເລື່ອງພາສາເທົ່ານັ້ນ ແຕ່ຍັງສອນໃຫ້ພວກເຮົາຮູ້ຈັກອົດທົນ, ຮູ້ຈັກກຸ້ມຕົນເອງ, ຮູ້ຈັກເຕີບໃຫຍ່ ແລະ ເຮັດໃຫ້ພວກເຮົາເຂົ້າໃຈວ່າ ສິ່ງທີ່ສຳຄັນແທ້ໆໃນຊີວິດ ລ້ວນແຕ່ຕ້ອງໃຊ້ເວລາໃນການສະສົມ.

ນອກຈາກການຮຽນແລ້ວ, ໃນປີນີ້ ພວກເຮົາຍັງໄດ້ພົບພໍ້ກັບຜູ້ຄົນ ແລະ ເລື່ອງລາວດີໆຫຼາຍຢ່າງ. ໂດຍມີເພື່ອນນັກສຶກສາທີ່ເດີນທາງມາຈາກຫຼາຍຮາກຖານ ບໍ່ວ່າຈະເປັນ ປະເທດລາວ, ຫວຽດນາມ, ບັງກະລາເທດ, ມັນດີຟ, ຊິມບັບເວ ແລະ ຈາກອີກຫຼາຍປະເທດ ຊຶ່ງທຸກຄົນໄດ້ມາພົບກັນຢູ່ ມະຫາວິທະຍາໄລຢຸນນານ ກໍຍ້ອນພາສາຈີນ. ພວກເຮົາອາດມີວັດທະນະທຳທີ່ຕ່າງກັນ ແຕ່ພວກເຮົາກໍໄດ້ຮຽນຮູ້ທີ່ຈະເຂົ້າໃຈ, ເຄົາລົບ ແລະ ຍອມຮັບຊຶ່ງກັນແລະກັນ ຢູ່ທີ່ນີ້.

ໃນໂອກາດນີ້, ບຸກຄົນທີ່ຂ້າພະເຈົ້າຢາກຂອບໃຈທີ່ສຸດກໍຄື ຄູອາຈານທຸກທ່ານທີ່ເຄີຍສັ່ງສອນພວກເຮົາ. ຂອບໃຈສຳລັບຄວາມຮູ້, ຂອບໃຈສຳລັບຄວາມອົດທົນ ແລະ ທີ່ສຳຄັນທີ່ສຸດແມ່ນ ຂອບໃຈສຳລັບຄວາມໄວ້ວາງໃຈ ທີ່ພວກທ່ານໄດ້ມອບໃຫ້ແກ່ພວກເຮົາ.

ແນ່ນອນວ່າ ເຖິງເວລາຈະປ່ຽນໄປ ແລະ ນັກສຶກສາຈະປ່ຽນຮຸ່ນໃໝ່ເຂົ້າມາ ແຕ່ການສືບທອດທາງດ້ານການສຶກສານັ້ນ ຈະບໍ່ມີວັນສິ້ນສຸດ.

ມື້ນີ້, ພວກເຮົາກຳລັງຈະຈົບການຮຽນກຽມພາສາ ແລະ ກ້າວໄປສູ່ເສັ້ນທາງການຮຽນຮູ້ໃໝ່ໆ.

ປີນີ້ໄດ້ສອນໃຫ້ຂ້າພະເຈົ້າຮູ້ວ່າ ສິ່ງທີ່ສຳຄັນແທ້ໆ ບໍ່ແມ່ນການທີ່ທຸກຢ່າງຕ້ອງເປັນໄປຕາມແຜນສະເໝີ ແຕ່ແມ່ນການຍຶດໝັ້ນໃນອຸດົມການ ແລະ ຄວາມຮັບຜິດຊອບຂອງຕົນເອງ ທ່າມກາງການປ່ຽນແປງ, ເພາະບາງເປົ້າໝາຍ ເຮົາອາດຈະປ່ຽນເສັ້ນທາງ ແຕ່ຈະບໍ່ມີວັນປ່ຽນທິດທາງເດັດຂາດ.

ໃນອະນາຄົດ, ບາງຄົນອາດຈະກາຍເປັນນັກວິທະຍາສາດ, ບາງຄົນອາດຈະກາຍເປັນອາຈານສອນໃນມະຫາວິທະຍາໄລ, ບາງຄົນອາດຈະກາຍເປັນນັກທຸລະກິດ, ຜູ້ນຳປະເທດ ຫຼື ກາຍເປັນກຳລັງສຳຄັນໃນການຊຸກຍູ້ການພັດທະນາຂອງໂລກ. ແຕ່ບໍ່ວ່າອະນາຄົດພວກເຮົາຈະໄປຢູ່ໃສ ຫຼື ເຮັດວຽກຫຍັງ ພວກເຮົາຈະບໍ່ລືມວ່າ ພວກເຮົາເຄີຍໄດ້ອອກເດີນທາງຈາກມະຫາວິທະຍາໄລຢຸນນານ ຈະບໍ່ລືມຜູ້ທີ່ເຄີຍຊ່ວຍເຫຼືອ ແລະ ເຊື່ອໝັ້ນໃນຕົວພວກເຮົາ ພ້ອມທັງຈະບໍ່ລືມພະລັງແຫ່ງການສຶກສາ ແລະ ໂອກາດ ລວມເຖິງຄວາມໄວ້ວາງໃຈ ທີ່ມິດຕະພາບລາວ-ຈີນ ໄດ້ມອບໃຫ້ພວກເຮົາ.

ຂ້າພະເຈົ້າເຊື່ອໝັ້ນຫຼາຍຂຶ້ນເລື້ອຍໆວ່າ ການເຕີບໃຫຍ່ຂອງຄົນເຮົາ ເລີ່ມຕົ້ນຈາກຄວາມໄວ້ວາງໃຈທີ່ຜູ້ອື່ນມອບໃຫ້.

ມື້ນີ້, ພວກເຮົາກຳລັງຈະອຳລາວິທະຍາເຂດຕົງລູ່. ເຖິງວ່າເວລາໜຶ່ງປີຂອງການຮຽນກຽມພາສາຈະສັ້ນ ແຕ່ຂ້າພະເຈົ້າຫວັງວ່າ ພວກເຮົາທຸກຄົນຈະຈື່ຈຳວັນເວລາທີ່ເຄີຍສູ້ຊົນມາຮ່ວມກັນ ແລະ ຫວັງເປັນຢ່າງຍິ່ງວ່າ ໃນມື້ໜ້າເວລານັກສຶກສາຮຸ່ນຕໍ່ໄປມາຮຽນຢູ່ທີ່ນີ້ ພວກເຮົາຈະສາມາດສືບຕໍ່ ສົ່ງຕໍ່ຄວາມດຸໝັ່ນ, ຄວາມອົບອຸ່ນ, ຄວາມຮັບຜິດຊອບ ແລະ ຄວາມໄວ້ວາງໃຈນີ້ຕໍ່ໆໄປ.

ມື້ໜຶ່ງອາດຈະມີຄົນຖາມພວກເຮົາວ່າ: “ເຈົ້າມາຮອດຈຸດນີ້ໄດ້ແນວໃດ?”
ແລະ ຄຳຕອບຂອງຂ້າພະເຈົ້າ ກໍຍັງຄົງເປັນຄຳເດີມຄື “ເລີ່ມຕົ້ນຈາກຄວາມໄວ້ວາງໃຈ.”

ສຸດທ້າຍນີ້, ຂໍອະນຸຍາດຕາງໜ້ານັກສຶກສາທຸກຄົນ ສະແດງຄວາມຂອບໃຈຢ່າງຈິງໃຈ ມາຍັງບັນດາທ່ານຄະນະນຳ, ຄູອາຈານ ແລະ ພະນັກງານທຸກທ່ານ ທີ່ເປັນຫ່ວງເປັນໃຍ ແລະ ຊ່ວຍເຫຼືອພວກເຮົາຕະຫຼອດມາ.

ຂອບໃຈມະຫາວິທະຍາໄລຢຸນນານ ທີ່ມອບເວທີໃຫ້ພວກເຮົາໄດ້ເຕີບໃຫຍ່
ຂອບໃຈຄູອາຈານທຸກທ່ານ ສຳລັບການສັ່ງສອນ ແລະ ຄວາມເອົາໃຈໃສ່
ຂອບໃຈໝູ່ເພື່ອນນັກສຶກສາທຸກຄົນ ສຳລັບມິດຕະພາບ ແລະ ການຮ່ວມເດີນທາງໃນຄັ້ງນີ້

ຂໍອວຍພອນໃຫ້ຄູອາຈານທຸກທ່ານ ຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນໜ້າທີ່ການງານ
ຂໍອວຍພອນໃຫ້ເພື່ອນນັກສຶກສາທຸກຄົນ ຈົ່ງກ້າວໜ້າໃນການຮຽນ ແລະ ມີອະນາຄົດທີ່ສົດໃສ
ຂໍອວຍພອນໃຫ້ ມະຫາວິທະຍາໄລຢຸນນານ ແລະ ຄະນະການສຶກສານານາຊາດ ຈົ່ງຈະເລີນກ້າວໜ້າຍິ່ງໆຂຶ້ນໄປ.

ຂ້າພະເຈົ້າ ຈຽງ ເຫວີຍ ຕົວແທນນັກສຶກສາກຽມພາສາ.
ຂໍຂອບໃຈ.

ຕົວແທນນັກສຶກສາກຽມພາສາ: ທ່ານ ຈັນທະຈັກ ຫຼວງລາດ（姜伟）
ວັນທີ: 11 ມິຖຸນາ 2026