ໃນວັນທີ 11 ມິຖຸນານີ້ ທີ່ ສໍານັກງານໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ຈັດພິທີເຊັນສັນຍາການຮ່ວມມື ໂຄງການຂະຫຍາຍເຄືອຂ່າຍສັນຍານໂທລະຄົມມະນາຄົມຕາມເສັ້ນທາງ ລົດໄຟລາວ-ຈີນ ລະຫວ່າງບໍລິສັດ ລາວ ໂທລະຄົມມະນາຄົມ ມະຫາຊົນ ແລະ ບໍລິສັດ ທາງລົດໄຟ ລາວ-ຈີນ ຈໍາກັດ ຢ່າງເປັນທາງການ. ໃຫ້ກຽດລົງນາມໂດຍ ທ່ານ ລັດຖະປັນຍາ ຂຽວວົງພະຈັນ ຮອງຜູ້ອຳນວຍການໃຫຍ່ ບໍລິສັດ ລາວໂທລະຄົມ ມະນາຄົມ ມະຫາຊົນ ແລະ ທ່ານ ຄາງ ເທນິວ ຮອງຜູ້ອຳນວຍການໃຫຍ່ ບໍລິສັດ ທາງລົດໄຟລາວ-ຈີນ ຈຳກັດໂດຍການໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ແກ້ວວິສຸກ ໂສລະພົມ ຮອງເລຂາຄະນະບໍລິຫານງານພັກ ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ທ່ານ ຫານ ເຢ້ (HAN YE) ເລຂານຸການ ເອກອັກຄະນະລັດຖະທູດຈີນ ຝ່າຍເສດຖະກິດ ແລະ ການຄ້າ ປະຈຳ ສປປ ລາວ, ທ່ານ ສຸພົນ ຈັນທະວີໄຊ ກໍາມະການຄະນະບໍລິຫານງານພັກກະຊວງ ເລຂາຄະນະພັກຮາກຖານ ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ, ທ່ານ ລູ້ ຫາຍໂຈ ຜູ້ອໍານວຍການໃຫຍ່ ບໍລິສັດ ທາງລົດໄຟລາວ-ຈີນ ຈໍາກັດ, ຄະນະກົມຈາກກະຊວງເຕັກໂນໂລຊີ ແລະ ການສື່ສານ, ກະຊວງໂຍທາທິການ ແລະ ຂົນສົ່ງ, ຄະນະຜູ້ບໍລິຫານ ແລະ ພະນັກງານຂອງທັງສອງຝ່າຍ.

ຈຸດປະສົງຂອງການຮ່ວມມືໃນຄັ້ງນີ້ ເພື່ອປັບປຸງການບໍລິການຂໍ້ມູນຂ່າວສານ ແລະ ການສື່ສານໂດຍລວມຕາມເສັ້ນທາງລົດໄຟ ລາວ-ຈີນ ນະຄອນຫຼວງວຽງຈັນ-ຫຼວງພະບາງ ມີຄວາມຍາວທັງໝົດ 224 ກິໂລແມັດ. ບົນພື້ນຖານການຢຶດຖືຫຼັກການ ສົ່ງເສີມຈຸດເດັ່ນຂອງແຕ່ລະຝ່າຍ, ສ້າງພັນທະມິດທີ່ເຂັ້ມແຂງ, ຮ່ວມກັນສ້າງສັນນະວັດຕະກຳ ແລະ ພັດທະນາຮ່ວມກັນ, ທັງສອງຝ່າຍໄດ້ຕົກລົງສ້າງສາຍພົວພັນຮ່ວມມືທາງດ້ານຍຸດທະສາດ ໂດຍມີລາຍລະອຽດດັ່ງນີ້: ບໍລິສັດ ທາງລົດໄຟ ລາວ-ຈີນ ຈໍາກັດຍິນດີໃຫ້ ບໍລິສັດ ລາວ ໂທລະຄົມມະນາຄົມ ມະຫາຊົນ ເຊົ່າຊັບພະຍາກອນໂຄງລ່າງພື້ນຖານໂທລະຄົມມະນາຄົມ ເປັນຕົ້ນແມ່ນ ສະຖານີຮັບ-ສົ່ງສັນຍານມືຖື, ສາຍ Fiber Optic ແລະ ອຸປະກອນທີ່ກ່ຽວຂ້ອງ ເພື່ອສະໜັບສະໜູນ ບໍລິສັດ ລາວ ໂທລະຄົມມະນາຄົມ ມະຫາຊົນ ໃນການຈັດຕັ້ງປະຕິບັດໂຄງການກໍ່ສ້າງ ແລະ ບໍລິ ຫານຈັດການເຄືອຂ່າຍມືຖື 4G ຕາມແລວທາງລົດໄຟ ລາວ-ຈີນ. ທັງນີ້, ກໍເພື່ອແນໃສ່ຕອບສະໜອງຄວາມຕ້ອງການການນຳໃຊ້ຂໍ້ມູນ ແລະ ການບໍລິການອິນເຕີເນັດມືຖືຂອງຜູ້ໂດຍສານ ໃຫ້ມີຄວາມສະດວກວ່ອງໄວ, ທັງເປັນການຍົກລະດັບມາດຕະຖານການບໍລິການ ແລະ ສ້າງປະສົບການການເດີນທາງຕາມເສັ້ນທາງລົດໄຟ ລາວ-ຈີນ ໃຫ້ມີຄວາມສົມບູນແບບຍິ່ງຂຶ້ນ, ພ້ອມດຽວກັນນັ້ນກໍເພື່ອຮ່ວມກັນພັດທະນາແລະ ຂະຫຍາຍເຄືອຂ່າຍສັນຍານສຸມໃສ່ການຕິດຕັ້ງ, ປັບປຸງ ແລະ ຂະຫຍາຍສະຖານີສົ່ງສັນຍານໂທລະຄົມ 4G ໂດຍຕິດຕັ້ງ ສະຖານີສົ່ງ-ຮັບສັນຍານ ແລະ ສາຍ Fiber Optic ຕາມແລວເສັ້ນທາງລົດໄຟ ລາວ-ຈີນ, ລວມທັງພື້ນທີ່ພາຍໃນສະຖານີ ແລະ ບໍລິເວນອ້ອມຂ້າງ ຕັ້ງແຕ່ ສະຖານີນາແຄ (ນະຄອນ ຫຼວງວຽງຈັນ) ຫາ ສະຖານີຫຼວງພະບາງມີຄວາມຍາວທັງໝົດ 224 ກິໂລແມັດ, ໂດຍແບ່ງເປັນ 2 ໄລຍະ ໂດຍໄລຍະທີ 1 ແລະ ທີ 2 ໃຊ້ງົບປະມານການລົງທຶນຫຼາຍກວ່າ 8 ລ້ານໂດລາ, ໄລຍະເວລາການກໍ່ສ້າງ 7 ເດືອນ (ຄາດໝາຍໃຫ້ສຳເລັດໃນ ທ້າຍປີ 2026), ພື້ນທີ່ຄວບຄຸມສັນຍານບໍ່ລວມອຸມົງ ປະມານ 64% ໃນ Phase 1 ທີ່ຈະສໍາເລັດໃນທ້າຍປີ 2026 ສ່ວນ Phase 2 ແມ່ນຈະເລີ່ມໃນຕົ້ນປີ 2027 ພື້ນທີ່ສັນຍານຈະກວມ 90% ຕະຫຼອດເສັ້ນທາງ ນະຄອນຫຼວງວຽງຈັນ - ຫຼວງພະບາງ ແລະ ຄວາມໄວອິນເຕີເນັດ (Speed) ຄວາມໄວໃນການເຂົ້າເຖິງຂອງຜູ້ໃຊ້ຢ່າງໜ້ອຍ>3Mbps.

ບໍລິສັດ ລາວ ໂທລະຄົມມະນາຄົມ ມະຫາຊົນ ຍັງສືບຕໍ່ມຸ່ງໝັ້ນສ້າງສິ່ງອໍານວຍຄວາມສະດວກດ້ານເຄືອຂ່າຍສັນຍານໃຫ້ ຄວບຄຸມທຸກພື້ນທີ່ໃນ ສປປ ລາວ, ຄຽງຄູ່ການພັດທະນາ ນໍາເອົາເຕັກໂນໂລຊີ ແລະ ນະວັດຕະກໍາໃໝ່ໆ ເຂົ້າມາຮັບໃຊ້ສັງຄົມລາວ ເພື່ອເປັນການປະກອບສ່ວນໃນການສ້າງສາ ແລະ ພັດທະນາປະເທດຊາດ ໃຫ້ມີຄວາມຮຸ່ງເຮືອງສີວິໄລ, ທັນສະໄໝໃນຍຸກດີຈີຕອນ ພ້ອມທັງຢູ່ຄຽງຂ້າງກັບສັງຄົມລາວ ດັ່ງຄໍາຂັວນທີ່ວ່າ ລາວ ໂທລະຄົມ ໂທລະຄົມຂອງຄົນລາວ ເພື່ອສັງຄົມລາວ.

(ຂ່າວ: ລາວ ໂທລະຄົມມະນາຄົມ)