ໃນຕອນເຊົ້າ 28 ຕຸລາ 2026, ທີ່ຫ້ອງຮັບແຂກ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ປອ ສັນຕິສຸກ ສິມມາລາວົງ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ລີ່ ຈອງຮະຢອບ (Lee Jeong-hyop), ເອກອັກຄະລັດຖະທູດຜູ້ມີອຳນາດເຕັມ ແຫ່ງສາທາລະນະລັດ ເກົາຫລີ ປະຈຳ ສປປ ລາວ ພ້ອມດ້ວຍຄະນະ, ໃນໂອກາດທີ່ທ່ານໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນເອກອັກຄະລັດຖະທູດ ຜູ້ມີອຳນາດເຕັມ ປະຈຳ ສປປ ລາວ.

ໃນໂອກາດອັນສະຫງ່າລາສີ, ທ່ານລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ຍຸດທະສາດການພົວພັນຮ່ວມມືອັນດີງາມ ລະຫວ່າງສອງປະເທດ ໂດຍສະເພາະແມ່ນການຍົກລະດັບການພົວພັນທາງການທູດຂຶ້ນເປັນ “ຄູ່ຮ່ວມມືຮອບດ້ານ” ໃນປີ 2025 ທີ່ຜ່ານມາ. ເຊິ່ງເປັນຂີດໝາຍປະຫວັດສາດອັນສຳຄັນ ໃນການຊຸກຍູ້ການຮ່ວມມືຮອບດ້ານ ທັງດ້ານການເມືອງ, ເສດຖະກິດ-ການຄ້າ ແລະ ການຫັນເປັນດີຈີຕອນ. ພ້ອມນີ້, ສອງຝ່າຍໄດ້ຕີລາຄາສູງຕໍ່ຜົນສຳເລັດຂອງການຮ່ວມມືໃນໄລຍະຜ່ານມາ ທີ່​ມີ​ຄວາມ​ພົ້ນ​ເດັ່ນ ເປັນຕົ້ນແມ່ນ: ດ້ານນິຕິກຳ ແລະ ເອກະສານຮ່ວມມື: ການລົງນາມບົດບັນທຶກຄວາມເຂົ້າໃຈ (MOU) ຂັ້ນກະຊວງ ແລະ ຂັ້ນກົມ ທີ່ກວມເອົາຂົງເຂດ ໄອຊີທີ (ICT), ລັດຖະບານດີຈີຕອນ ແລະ ວຽກງານລາຍເຊັນເອເລັກໂຕຣນິກ (CA), ໂຄງການຊ່ວຍເຫຼືອທາງການເພື່ອການພັດທະນາ (ODA): ຜົນການຈັດຕັ້ງປະຕິບັດບັນດາໂຄງການສ້າງສູນຮ່ວມມືລັດຖະບານດິຈິຕອນ, ການສ້າງສວນອຸທະຍານເຕັກໂນໂລຊີ ແລະ ໂຄງການສ້າງສູນຝຶກອົບຮົມລັດດິຈິຕອນ ມູນຄ່າກວ່າ 9,9 ລ້ານໂດລາສະຫະລັດ ຮ່ວມກັບ ອົງການ KOICA (2025-2029) ແລະ ການຮ່ວມມືດ້ານເຕັກນິກ ແລະ ນະວັດຕະກຳ: ຜ່ານໂຄງການ KSP, ສະຖາບັນ STEPI ແລະ ການສ້າງຕັ້ງສູນການສຶກສາດິຈິຕອນ ອາຊຽນ-ເກົາຫຼີ (ASEAN-Korea Digital Academy).

ໃນຕອນທ້າຍ, ເພື່ອສືບຕໍ່ເສີມສ້າງສາຍພົວພັນອັນດີງາມດັ່ງກ່າວ ໃຫ້ແຕກດອກອອກຜົນຍິ່ງໆຂຶ້ນ, ທ່ານ ລັດຖະມົນຕີ ໄດ້ສະເໜີໃຫ້ຝ່າຍເກົາຫຼີ ສືບຕໍ່ປະສານສົມທົບໃນການລາຍງານຈຸດປະສົງແຜນການຮ່ວມມື ເພື່ອສຶກສາຄວາມເປັນໄປໄດ້ຂອງໂຄງການຕ່າງໆ, ພ້ອມທັງຊຸກຍູ້ການແລກປ່ຽນບົດຮຽນດ້ານການຄຸ້ມຄອງ, ການວາງນະໂຍບາຍ ແລະ ການພັດທະນາເຕັກໂນໂລຊີປັນຍາປະດິດ (AI) ເຂົ້າໃນວຽກງານບໍລິຫານລັດ ລະຫວ່າງ ສປປ ລາວ ແລະ ສາທາລະນະລັດ ເກົາຫລີ ໃຫ້ ໝັ້ນຄົງເຂັ້ມແຂງຕະຫຼອດໄປ.