ໃນພິທີ ທ່ານ ມະໄລທອງ ກົມມະສິດ ໄດ້ເນັ້ນໜັກໃນການເປີດງານວ່າ: "ຫັດຖະກຳ ບໍ່ແມ່ນພຽງແຕ່ວັດຖຸສິ່ງຂອງ ຫຼື ເຄື່ອງປະດັບທົ່ວໄປ ແຕ່ມັນຄືລົມຫາຍໃຈ ແລະ ຈິດວິນຍານຂອງຄົນລາວ ທີ່ບົ່ງບອກເຖິງວິຖີຊີວິດ ແລະ ພູມປັນຍາອັນລ້ຳຄ່າ. ເຊິ່ງເປັນເອກະລັກສະເພາະຕົວ ທີ່ພວກເຮົາສາມາດເອກອ້າງທະນົງໃຈໄດ້ໃນທຸກເວທີທັງພາຍໃນ ແລະ ຕ່າງປະເທດ. ພ້ອມດຽວກັນນັ້ນ, ຫັດຖະກຳຍັງປຽບສະເໝືອນເສັ້ນເລືອດສຳຄັນ ທີ່ຫຼໍ່ລ້ຽງເສດຖະກິດຖານຮາກ, ສ້າງວຽກເຮັດງານທຳ ແລະ ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນຢ່າງແທ້ຈິງ". ພ້ອມທັງຮຽກຮ້ອງໃຫ້ທົ່ວສັງຄົມ ສືບຕໍ່ເປັນກະບອກສຽງຊຸກຍູ້ປຸກລະດົມໃຫ້ຫັນມາ "ນຸ່ງຜ້າລາວ, ຊົມໃຊ້ເຄື່ອງຫັດຖະກຳລາວ ແລະ ສະໜັບສະໜູນສີມືຄົນລາວ" ເພື່ອຊ່ວຍໃຫ້ຫັດຖະກຳລາວສາມາດຢືນຢັດຢ່າງເຂັ້ມແຂງ ແລະ ກາຍເປັນສິນຄ້າສົ່ງອອກທີ່ສ້າງລາຍຮັບໃຫ້ແກ່ປະເທດຊາດ.

:

ຫຼັງຈາກນັ້ນ, ທ່ານ ມະໄລທອງ ກົມມະສິດ ກໍໄດ້ໃຫ້ກຽດປະກາດເປີດຂະບວນການຍ່າງສະເຫຼີມສະຫຼອງຢ່າງເປັນທາງການ ດ້ວຍບັນຍາກາດທີ່ເຕັມໄປດ້ວຍຮອຍຍິ້ມ, ມິດຕະພາບ ແລະ ຄວາມສາມັກຄີຮັກແພງ.