ໃນຕອນບ່າຍຂອງວັນທີ 05 ກໍລະກົດ 2021 ນີ້, ທີ່ຫ້ອງປະຊຸມຊັ້ນ 6, ກະຊວງສາທາລະນະສຸກ ໄດ້ມີພິທີເປີດ ໂຄງການ “ລາວ ສູ້ສູ້” ຜ່ານໂປຣແກຣມ LaoKYC. ໂດຍການເປັນປະທານຮ່ວມຂອງທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ດຣ. ບຸນແຝງ ພູມາໄລສິດ, ລັດຖະມົນຕີ ກະຊວງສາທາລະນະສຸກ, ມີບັນດາແຂກຖືກເຊີນຈາກຫ້ອງວ່າການສໍານັກງານນາຍົກລັດຖະມົນຕີ, ກະຊວງສາທາລະນະສຸກ, ບັນດາກະຊວງ/ທຽບເທົ່າ ພ້ອມດ້ວຍຄະນະສະເພາະກິດແຫ່ງຊາດ ເຂົ້າຮ່ວມ.

       ທ່ານ ປອ ສັນຕິສຸກ ສິມມາລາວົງ ໄດ້ກ່າວວ່າ: ເພື່ອເປັນການຄວບຄຸ້ມການແຜ່ລະບາດຂອງພະຍາດ Covid-19, ທາງກະຊວງ ເຕັກໂນໂລຊີ ແລະ ການສື່ສານ ຈຶ່ງໄດ້ຮ່ວມມືກັບ ກະຊວງສາທາລະນະສຸກ ແລະ ບໍລິສັດ ເອັສບີເລັບ  856 ຈໍາກັດ ເຊິ່ງເປັນນັກພັດທະນາໂປຣແກຣມ ຄົນລາວ ຊ່ວຍກັນໃນການພັດທະນາເຄື່ອງມື ນີ້ຂຶ້ນມາ ຊຶ່ງພວກເຮົາເອີ້ນການບໍລິການນີ້ວ່າ “ລາວ ສູ້ ສູ້” ໂດຍການນຳໃຊ້ຜ່ານລະບົບໂປຣແກຣມ LaoKYC ທີ່ເປັນການໜູນໃຊ້ເຕັກໂນໂລຊີທີ່ທັນສະໄໝເຂົ້າມາຊ່ວຍ ເພື່ອສ້າງຄວາມແນ່ນອນ, ຊັດເຈນ ແລະ ອຳນວຍຄວາມສະດວກໃຫ້ແກ່ຄະນະແພດໝໍ ໃນການຕິດຕາມການເດີນທາງ ຫຼື ການເຄື່ອນໄຫວຂອງຜູ້ຕິດເຊື້ອ, ຜູ້ມີຄວາມສ່ຽງ ໄດ້ຢ່າງຖືກຕ້ອງ ແລະ ຊັດເຈນ. ໂດຍມີໜ້າທີີ່ ແລະ ອົງປະກອບເຊັ່ນ: (1)iFeel (ອາການຂ້ອຍ):ລາຍງານອາການຂອງຕົນເອງໃນການກັກຕົວຢູ່ບ້ານ ຫຼື ສະຖານທີີ່ກັກຕົວເຊັ່ນ: ລາຍງານອຸນນະພູມຮ່າງກາຍ, ອາການໄຂ້, ໄອ, ເມື່ອຍ, ແລະ ອື່ນໆ, (2)iGo (ໄປໃສ): Check-In ກ່ອນເຂົົ້າສະຖານທີີ່ໃດໜຶ່ງ ໂດຍການສະແກນ QR Code ແລະ ລະບົບສາມາດຕິດຕໍ່ແຈ້ງເຕືອນທ່ານໄດ້ ຖ້າມີຄົນກຸ່ມສ່ຽງໄປສະຖານທີີ່ດັ່ງກ່າວ, (3)Timeline (ການເຄື່ອນໄຫວ): ເບິີ່ງທາມລາຍທ່ານເອງ ແລະ ໃຊ້ລາຍງານແພດໝໍໄດ້, (4)iVac (ສັກວັກຊິນ): ລົງທະບຽນ ແລະ ຈອງຄິວສັກວັກຊິນລ່ວງໜ້າ, (5)iTest (ໄປກວດ): ລົງທະບຽນ ແລະ ຈອງຄິວເຂົົ້າກວດເຊື້ອ ໂຄວິດ -19. ພ້ອມນີ້, ທ່ານຍັງໄດ້ກ່າວຕື່ມວ່າ: ໃນການສະໜອງລະບົບ LaoKYC ນີ້ ແມ່ນມີຄວາມໝາຍ, ຄວາມສຳຄັນ ແລະ ສອດຄ່ອງກັບຄວາມຮຽກຮ້ອງຕ້ອງການຕົວຈິງ ຂອງສະພາບການໃນປະຈຸບັນ ທີ່ມີການແຜ່ເຊື້ອພະຍາດຂອງພະຍາດ ໂຄວິດ-19 ແບບວົງກວ້າງຢູ່ ສປປ ລາວ. ພ້ອມນັ້ນ, ຍັງອໍານວຍຄວາມສະດວກໃນການສັກວັກຊີນ, ໃນການກວດຫາເຊື້ອ ໂຄວິດ-19 ໃຫ້ມີຄວາມເປັນລະບຽບ, ວ່ອງໄວ, ປອດໄພ ຕໍ່ປະຊາຊົນ ແລະ ແພດໝໍທີ່ໃຫ້ບໍລິການທົ່ວປະເທດ.

         ສຳລັບລາຍລະອຽດຂອງການໃຫ້ບໍລິການໂປຮແກຮມ Lao KYC  ທ່ານສາມາດສອບຖາມຂໍ້ມູນ ເພີ່ມຕື່ມໄດ້ທີ່ ເວັບໄຊ www.laokyc.gov.la

         ຂ່າວ: ຫ້ອງການ, ພະແນກເລຂານຸການ-ພິທີການ.