ງານສັບປະດາດິຈິຕ໋ອນ (Digital Week) ປະຈໍາປີ 2022 ຈະຈັດຂຶ້ນໃນທ້າຍປີນີ້ ທີ່ນະຄອນຫຼວງວຽງຈັນ

03/11/2022

ງານສັບປະດາດິຈິຕ໋ອນ (Digital Week) ປະຈໍາປີ 2022 ຈະຈັດຂຶ້ນໃນທ້າຍປີນີ້ ທີ່ນະຄອນຫຼວງວຽງຈັນ

         ໃນຕອນບ່າຍຂອງວັນທີ 02 ພະຈິກ 2022, ທີ່ກະຊວງເຕັກໂນໂລຊີ ແລະ ການສື່ສານ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ໃຫ້ກຽດກ່າວຖະແຫຼງຂ່າວ ກ່ຽວກັບການຈັດງານສັບປະດາດິຈິຕ໋ອນ (Digital Week) ປະຈໍາປີ 2022 ຢູ່ທີ່ ນະຄອນຫຼວງວຽງຈັນ ພາຍໃຕ້ຄໍາຂວັນ: “ການຮ່ວມມືທົ່ວສັງຄົມ ເພື່ອຫັນເປັນດິຈິຕ໋ອນ” ຫຼື “Collaboration across Lao Digital Transformation” ຢູ່ໃນທ້າຍເດືອນທັນວາ 2022 ນີ້.

         ງານສັບປະດາດິຈິຕ໋ອນ (Digital Week) ປະຈໍາປີ 2022 ຈັດຂຶ້ນ ເພື່ອຜັນຂະຫຍາຍແຜນພັດທະນາເຕັກໂນໂລຊີ ແລະ ການສື່ສານ 5 ປີຄັ້ງທີ III (2021-2025) ຂອງກະຊວງເຕັກໂນໂລຊີ ແລະ ການສື່ສານ ໃນການຫັນເປັນອຸດສາຫະກໍາທັນສະໄໝ ແລະ ພັດທະນາເສດຖະກິດດິຈິຕ໋ອນ ຂອງ ສປປລາວ, ເພື່ອສົ່ງເສີມການນໍາໃຊ້ ເຕັກໂນໂລຊີນະວັດຕະກຳ, ເຕັກໂນໂລຊີຂໍ້ມູນຂ່າວສານ (ICT), ໂທລະຄົມມະນາຄົມ ແລະ ດິຈິຕ໋ອນທີ່ທັນສະໄໝ ເຂົ້າໃນທຸກຂະແໜງການພັດທະນາເສດຖະກິດ-ສັງຄົມ ແຕ່ສູນກາງລົງຮອດທ້ອງຖິ່ນ ແລະ ເພື່ອຊຸກຍູ້ຂະບວນການຜະລິດສິນຄ້າ, ການບໍລິການ ໃຫ້ກາຍເປັນຜະລິດຕະພັນທີ່ມີຄວາມຫຼາກຫຼາຍສ້າງມູນຄ່າເພີ່ມ, ສາມາດແຂ່ງຂັນໃນຕະຫຼາດພາຍໃນ ແລະ ຕ່າງປະເທດ, ເພື່ອຄັດເລືອກຜະລິດຕະພັນໄອຊີທີ ແລະ ດິຈິຕ໋ອນ ຂອງ ສປປ ລາວ ເຂົ້າແຂ່ງຂັນໃນລະດັບເວທີພາກພື້ນອາຊຽນ ແລະ ສາກົນ.

        ໃນງານຄັ້ງນີ້ຈະມີຫຼາຍກິດຈະກໍາຈັດຂຶ້ນພ້ອມກັນຢ່າງເປັນຂະບວນຟົດຟື້ນ ເປັນງານມະຫະກຳເຕັກໂນໂລຊີ ແລະ ການສື່ສານ ຊຶ່ງຈະປະກອບມີ: ງານວາງສະແດງ ກ່ຽວກັບເຕັກໂນໂລຊີການສື່ສານຂໍ້ມູນຂ່າວສານ, ໂທລະຄົມມະນາຄົມ ແລະ ນະວັດຕະກຳ ແລະ ຜົນງານການຄົ້ນຄ້ວາ ແລະ ຜະລິດຕະພັນຈາກຫົວຄິດປະດິດສ້າງ ຂອງທຸລະກິດ startup ຈາກພາຍໃນ ແລະ ຕ່າງປະເທດ ຈຳນວນ 100 ກວ່າ ຮ້ານວາງສະແດງ (booth), ແລະ Post Mart;

         ກອງປະຊຸມສຳມະນາກ່ຽວກັບເຕັກໂນໂລຊີຍຸກໃໝ່, ເສດຖະກິດດິຈິຕ໋ອນ, ຄວາມປອດໄພທາງໄຊເບີ, ການຄ້າອອນລາຍ, ການບໍລິຫານລັດແບບທັນສະໄໝ, ການພັດທະນາອຸດສາຫະກຳ 4.0, ເຕັກໂນໂລຊີອັດສະລິຍະ, ແລະ ເຕັກໂນໂລຊີ 5G; ເວທີໃນການພົບປະ (Networking) ສົນທະນາປຶກສາຫາລື ແລະ ແລກປ່ຽນກັນ ທາງດ້ານການຄົ້ນຄວ້າ ແລະ ການລົງທຶນ ທາງດ້ານເຕັກໂນໂລຊີ ແລະ ການສື່ສານ ລະຫວ່າງພາກລັດ, ເອກະຊົນ, ສະຖາບັນຄົ້ນຄວ້າ, ມະຫາວິທະຍາໄລ, ນັກພັດທະນາ, ນັກຊ່ຽວຊານ, ແລະ ຜູ້ປະກອບການ ທັງພາຍໃນ ແລະ ຕ່າງປະເທດ; ແລະ ກິດຈະກໍາການແຂ່ງຂັນ Lao ICT Awards 2022, ການແຂ່ງຂັນຄວາມປອດໄພທາງໄຊເບີ, Start-up , Hackathon, ນະວັດຕະກໍາ Innovation Awards.

         ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ກ່າວຕື່ມວ່າ: ງານສັບປະດາດິຈິຕ໋ອນ 2022 ຈະຈັດຂຶ້ນເປັນຄັ້ງທໍາອິດ ຢູ່ ສປປ ລາວ ຊຶ່ງຈະເປັນເຫດການປະຫວັດສາດ ທີ່ສໍາຄັນ ໃນການຮ່ວມມື ແລະ ດຶງດູດການລົງທຶນ ເຂົ້າໃນການພັດທະນາ ແລະ ປະກອບສ່ວນໃນການພັດທະນາພື້ນຖານໂຄງລ່າງ, ຊ່ວຍ ສົ່ງເສີມ ແລະ ເຜີຍແຜ່ ການນໍາໃຊ້ຜົນການຄົ້ນຄວ້າວິທະຍາສາດ, ເຕັກໂນໂລຊີຂໍ້ມູນຂ່າວສານ, ນະວັດຕະກຳ, ອຸດສາຫະກໍາການຜະລິດ, ການບໍລິການທີ່ຕິດພັນກັບການພັດທະນາ ຊັບພະຍາກອນມະນຸດ ດ້ານເຕັກໂນໂລຊີ ແລະ ການສື່ສານ. ທ່ານໄດ້ຮຽນຮ້ອງ ແລະ ເຊີນຊວນບັນດາກະຊວງ, ຂະແໜງການພາກລັດ, ສະຖາບັນຄົ້ນຄວ້າ, ສະຖາບັນການສຶກສາ, ມະຫາວິທະຍາໄລ, ພາກທຸລະກິດ ເອກະຊົນ ແລະ ຜູ້ປະກອບການ ດ້ານໄອຊີທີ ແລະ ດິຈິຕອນ ທັງພາຍໃນ ແລະ ຕ່າງປະເທດ ເຂົ້າຮ່ວມໃນງານດັ່ງກ່າວ ເພື່ອສະແດງຜົນງານຂອງຕົນ ຢ່າງຟົດຟື້ນ.

          ງານສັບປະດາດິຈິຕ໋ອນ ຄັ້ງນີ້ ຄະນະຮັບຜິດຊອບການຈັດງານໄດ້ວາງຮູບແບບຜູ້ຮ່ວມອຸປະຖໍາ 4 ປະເພດ: 1) Diamond, 2) Platinum, 3) Gold ແລະ 4) Silver ແຕ່ລະປະເພດຈະໄດ້ຮັບຮ້ານວາງສະແດງ, ສິ່ງອໍານວຍຄວາມສະດວກ, ສື່ໂຄສະນາ, ມີ Logo ໃນແຜນປ້າຍຂອງງານ ແລະ ສິດທິພິເສດອີກຫຼາກຫຼາຍໃນງານ. ນອກນັ້ນ, ບັນດາບໍລິສັດ ແລະ ຫ້າງຮ້ານຕ່າງໆ ຍັງສາມາດເຊົ່າຮ້ານວາງສະແດງ (Booth) ເພື່ອສະແດງສິນຄ້າ ຫຼື ຜະລິດຕະພັນຂອງຕົນໃນງານໄດ້ ສຳຫຼັບພາກລັດແມ່ນຈະໄດ້ສິດໃນການໃຊ້ຮ້ານວາງສະແດງຢ່າງບໍ່ໄດ້ຈ່າຍຄ່າ.

            ຜູ້ທີສົນໃຈ ເຂົ້າຮ່ວມສະໜັບສະໜູນ ສາມາດຕິດຕໍ່: ກະຊວງເຕັກໂນໂລຊີ ແລະ ການສື່ສານ, ຫ້ອງການກະຊວງ ເບີໂທລະສັບ: 021215877.

 

 

ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນ ແຫ່ງຊາດ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ຖະແຫຼ່ງການ ສະເຫຼີມສະຫຼອງ ວັນໄປສະນີໂລກ ຄົບຮອບ 149 ປີ
ວີດີໂອແນະນໍາ ການຂຶ້ນທະບຽນເລກໝາຍໂທລະສັບ
ລະ​ບົບ​ຂື້ນ​ທະ​ບຽນ​ປະ​ຊຸມ