ພິທີປະກາດການແຕ່ງຕັ້ງຂັ້ນຮອງລັດຖະມົນຕີ ແລະ ຂັ້ນພະແນກ ພາຍໃນ ກຕສ

25/11/2022

ພິທີປະກາດການແຕ່ງຕັ້ງຂັ້ນຮອງລັດຖະມົນຕີ ແລະ ຂັ້ນພະແນກ ພາຍໃນ ກຕສ

          ໃນຕອນເຊົ້າຂອງວັນທີ 24 ພະຈິກ 2022 ນີ້, ທີ່ຫ້ອງປະຊຸມ ກົມເຕັກໂນໂລຊີ ແລະ ນະວັດຕະກໍາ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ມີພິທີປະກາດການແຕ່ງຕັ້ງ ພາຍໃນກະຊວງ ຂຶ້ນ. ໃຫ້ກຽດເຂົ້າຮ່ວມເປັນທານ ໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກຕສ ມີທ່ານຮອງລັດຖະມົນຕີ, ບັນດາຄະນະກົມ/ທຽບເທົ່າ, ຄະນະພະແນກ/ທຽບເທົ່າ ແລະ ສະມາຊິກພັກສົມບູນ/ສໍາຮອງ ເຂົ້າຮ່ວມ.

          ໃນພິທີ ທ່ານ ສຸລິຍາ ພົມມີສິດ ຮອງຫົວຫນ້າກົມຄຸ້ມຄອງພະນັກງານ, ຕາງຈາກຄະນະຈັດຕັ້ງສູນກາງພັກ ໄດ້ຜ່ານດໍາລັດ ຂອງນາຍົກລັດຖະມົນຕີ ວ່າດ້ວຍ ການແຕ່ງຕັ້ງຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ສະບັບເລກທີ: 257/ນຍ, ລົງວັນທີ 16 ພະຈິກ 2022 ແຕ່ງຕັ້ງ ທ່ານ ແກ້ວວິສຸກ ໂສລະພົມ ເປັນຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ຄໍາພູ ດວງຖະໜອມ ຫົວໜ້າກົມຈັດຕັ້ງ ແລະ ພະນັກງານ, ກຕສ ໄດ້ຜ່ານຂໍ້ຕົກລົງວ່າດ້ວຍ ການຍົກຍ້າຍພະນັກງານຂັ້ນຫົວໜ້າກົມ ກຕສ ສະບັບເລກທີ 3409/ກຕສ, ລົງວັນທີ 23 ພະຈິກ 2022 ເຫັນດີຍົກຍ້າຍ ທ່ານ ມີນາໄຊ ພິລາວົງ ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ ມາເປັນ ຫົວໜ້າສູນອິນເຕີເນັດແຫ່ງຊາດ ແລະ ຂໍ້ຕົກລົງວ່າດ້ວຍການແຕ່ງຕັ້ງພະນັກງານຂັ້ນຮອງຫົວໜ້າກົມເປັນຜູ້ຮັກສາການຫົວໜ້າສູນ, ສະບັບເລກທີ: 3410/ກຕສ, ລົງວັນທີ 23 ພະຈິກ 2022 ແຕ່ງຕັ້ງ ທ່ານ ນາງ ເກສອນ ສຸລິວົງ ຮອງຫົວໜ້າກົມໄປສະນີ ເປັນຜູ້ຮັກສາການຫົວໜ້າສູນສົ່ງເສີມ ແລະ ຖ່າຍຖອດເຕັກໂນໂລຊີ, ກຕສ, ພ້ອມນີ້, ຍັງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງພະນັກງານຂັ້ນຫົວໜ້າພະແນກ ແລະ ຮອງຫົວໜ້າພະແນກ ຂອງ ກະຊວງ, ສະບັບເລກທີ 3408/ກຕສ ລົງວັນທີ 23 ພະຈິກ 2022 ເພື່ອສືບຕໍ່ຈັດຕັ້ງປະຕິບັດຊີ້ນໍາ-ນໍາພາວຽກງານ, ແຜນຍຸດທະສາດຂອງ ກຕສ ໃຫ້ໄດ້ຮັບຜົນສໍາເລັດ.

       ໃນໂອກາດນີ້, ທ່ານ ບັນດິດ ສຈ. ບໍ່ວຽງຄໍາ ວົງດາລາ ໄດ້ໃຫ້ກຽດໂອ້ລົມຕໍ່ພິທີ ຊຶ່ງທ່ານໄດ້ກ່າວສະແດງຄວາມຍິນດີ ແລະ ຍ້ອງຍໍຊົມເຊີຍຜູ້ທີ່ໄດ້ຮັບການແຕ່ງຕັ້ງໃໝ່ ບໍ່ວ່າຈະເປັນຂັ້ນຮອງລັດຖະມົນຕີ, ຂັ້ນຫົວໜ້າສູນ, ຮັກສາການຫົວໜ້າສູນ ແລະ ຂັ້ນພະແນກ/ຮອງພະແນກ ຊຶ່ງລ້ວນແລ້ວແຕ່ເປັນຜູ້ທີ່ໄດ້ຮັບຄວາມໄວ້ວາງໃຈຈາກອ້າຍນ້ອງພະນັກງານ-ສະມາຊິກພັກ. ພ້ອມນັ້ນ, ທ່ານໄດ້ເນັ້ນໜັກໃຫ້ ຜູ້ທີ່ຖືກແຕ່ງຕັ້ງ ຈົ່ງສືບຕໍ່ຂະຫຍາຍມູນເຊື້ອ ຊີ້ນໍາ-ນໍາພາ ຈັດຕັ້ງປະຕິບັດວຽກງານການຫັນເປັນດິຈິຕ໋ອນ ແລະ ການຫັນເປັນທັນສະໄໝ ໃຫ້ປະສົບຜົນສໍາເລັດ ພ້ອມທັງຍົກລະດັບຄວາມຮູ້ຄວາມສາມາດ, ສືບຕໍ່ປັບປຸງການຈັດຕັ້ງໃຫ້ມີຄວາມແຂງແຮງ, ເພີ່ມທະວີໃຫ້ອົງຄະນະພັກມີເຂັ້ມແຂງ, ໂປ່ງໃສ ແລະ ໜັກແໜ້ນ ແລະ ຮຽກຮ້ອງໃຫ້ສືບຕໍ່ເອົາໃຈໃສ່ວຽກງານດ້ານການເມືອງ-ແນວຄິດ, ເອົາໃຈໃສ່ວຽກວິຊາສະເພາະ, ປັບປຸງຕົນເອງ ໃຫ້ໄດ້ຕາມມາດຕະຖານເງື່ອນໄຂ ຂອງການເປັນພະນັກງານ ນໍາພາ-ຄຸ້ມຄອງ, ສືບຕໍ່ເສີມຂະຫຍາຍທ່າແຮງ, ກໍ່ສ້າງຕົນເອງ, ຍົກລະດັບວິຊາສະເພາະ ສ້າງແນວຄິດການເມືອງໃຫ້ໜັກແໜ້ນ ເພື່ອຮັບປະກັນຄວາມຮູ້ຄວາມສາມາດທາງດ້ານວິຊາການ ໃນການຫັນເປັນທັນສະໄໝ ຍຸກອຸດສາຫະກໍາ 4.0. ເນື່ອງຈາກພັກ-ລັດ ໄດ້ມອບພາລະກິດສໍາຄັນໃຫ້ ເພື່ອເປັນແກນກາງໃນການນໍາພາ ຂະແໜງການ ໃນການຫັນເປັນທັນສະໄໝ. ສະນັ້ນ, ຢາກຊີ້ນໍາ-ນໍາພາຂະແໜງການໄດ້ ກໍຕ້ອງລົບລ້າງຄວາມກືກດິຈິຕ໋ອນ ພ້ອມທັງຍົກລະດັບຕົນເອງ ເພື່ອໄປຝຶກອົບຮົມ, ໂຄສະນາເຜີຍແຜ່ ແລະ ປາຖະກະຖາ ໃຫ້ບັນດາກະຊວງ, ຂະແໜງການ ຮອດທ້ອງຖິ່ນ ຮັບຮູ້ກ່ຽວກັບວຽກງານດັ່ງກ່າວ, ພັດທະນາຍົກລະດັບວິຊາພາສາຕ່າງປະເທດ ເພື່ອເຊື່ອມໂຍງກັບສາກົນໄດ້ ສືບຕໍ່ສ້າງໂຕເອງໃນຫຼາຍດ້ານສາມາດຮອງຮັບໜ້າທີ່ການເມືອງ ທີ່ພັກ-ລັດ ມອບໝາຍໃຫ້ ໃຫ້ມີປະສິດທິພາບ ແລະ ປະສິດທິຜົນ ຂຶ້ນເລື້ອຍໆ.

           ພາບ+ຂ່າວ: ເລັກເຊ່ຍ ສຸດທິວົງ

 

ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ III (2021-2025)
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ