ທ່ານ ສອນໄຊ ສີພັນດອນ ມີຄໍາເຫັນຕໍ່ກອງປະຊຸມສະຫຼຸບຕີລາຄາຂະບວນການແຂ່ງຂັນ ຮັກຊາດ ແລະ ພັດທະນາ ຂອງ ກຕສ

23/12/2022

ທ່ານ ສອນໄຊ ສີພັນດອນ ມີຄໍາເຫັນຕໍ່ກອງປະຊຸມສະຫຼຸບຕີລາຄາຂະບວນການແຂ່ງຂັນ ຮັກຊາດ ແລະ ພັດທະນາ ຂອງ ກຕສ

           ໃນໂອກາດເຂົ້າຮ່ວມກອງປະຊຸມ ສະຫຼຸບຕີລາຄາຂະບວນການແຂ່ງຂັນ ຮັກຊາດ ແລະ ພັດທະນາ ໄລຍະ 05 ປີ ແລະ ທິດທາງແຜນການ ຮອດປີ 2025 ຂອງ ກະຊວງເຕັກໂນໂລຊີ ແລະ ການສື່ສານ ຄັ້ງວັນທີ 22 ທັນວາ 2022, ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ. ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ການແຂ່ງຂັນ “ຮັກຊາດ ແລະ ພັດທະນາ” ໃນເນື້ອແທ້ ແມ່ນການສ້າງ ແລະ ຍົກລະດັບແນວຄິດ-ວັດທະນະທໍາ ຂອງຄົນລາວ ແລະ ຂອງສັງຄົມລາວ ແນໃສ່ສ້າງໄດ້ຜະລິດຕະພັນໃໝ່, ສ້າງໄດ້ຂະບວນການໃໝ່ທີ່ກ້າວໜ້າ, ບຸກທະລຸໄປສູ່ແບບແຜນທີ່ຕິດພັນກັບຄໍາຂວັນ “ຕົນເພື່ອສັງຄົມ ແລະ ສັງຄົມເພື່ອຕົນ” ຫຼື ທີ່ພວກເຮົາເຄີຍເວົ້າກັນຜ່ານມາວ່າ ຖ້າເຮົາຍຶດໝັ້ນຈິດໃຈ “ແຕ່ລະຄົນ ເພື່ອທຸກຄົນ, ທຸກຄົນ ເພື່ອແຕ່ລະຄົນ” ໝາຍຄວາມວ່າ ຂໍ້ແຂ່ງຂັນຮັກຊາດ ແລະ ພັດທະນາ ແມ່ນຂະບວນການຍູ້ໜູນໃຫ້ແກ່ການຄຸ້ມຄອງສັງຄົມ ຂອງລະບອບປະຊາທິປະໄຕປະຊາຊົນເຮົາ, ມັນແມ່ນການສົມທົບຢ່າງກົມກຽວ ແລະ ກໍ່ໃຫ້ເກີດສາຍພົວພັນອັນສະໜິດແໜ້ນລະຫວ່າງຜົນປະໂຫຍດຂອງສັງຄົມ, ຜົນປະໂຫຍດລວມໝູ່ ແລະ ຜົນປະໂຫຍດ ຂອງສ່ວນບຸກຄົນ, ເຮັດໃຫ້ຜົນປະໂຫຍດເຫຼົ່ານີ້ກາຍເປັນກໍາລັງແຮງຊຸກຍູ້ໃຫ້ແກ່ການ “ແຂ່ງຂັນ” ເພື່ອການພັດທະນາເສດຖະກິດ-ສັງຄົມ ຢູ່ປະເທດເຮົາ ໃຫ້ສືບຕໍ່ຂະຫຍາຍຕົວດ້ວຍຈັງຫວະເຕີບໂຕໄວຂຶ້ນ. ໃນໂອກາດອັນມີຄວາມໝາຍສໍາຄັນດັ່ງກ່າວ ທ່ານຍັງໄດ້ມີບາງຄໍາເຫັນເນັ້ນໜັກຕໍ່ກອງປະຊຸມວ່າ:

        ໜຶ່ງ: ຂໍໃຫ້ຄະນະພັກ, ຄະນະນໍາ ຂອງ ກະຊວງເຕັກໂນໂລຊີ ແລະ ການສື່ສານ ສືບຕໍ່ປຸກລະດົມ ສະມາຊິກພັກ, ພະນັກງານ-ລັດຖະກອນ ແລະ ປະຊາຊົນລາວບັນດາເຜົ່າ, ຊັ້ນຄົນຕ່າງໆໃນທົ່ວປະເທດ ພ້ອມກັນຕັ້ງໜ້າເຂົ້າຮ່ວມໃນຂະບວນການແຂ່ງຂັນ ຮັກຊາດ ແລະ ພັດທະນາ ພາຍໃຕ້ຄໍາຂວັນ “ຍົກສູງຄວາມຮັບຜິດຊອບ ຕໍ່ວຽກງານເຕັກໂນໂລຊີ ແລະ ການສື່ສານ ໃຫ້ກາຍເປັນກໍາລັງແຮງຂັບເຄື່ອນໃນການຫັນເປັນດິຈິຕ໋ອນ ຕາມທິດຫັນເປັນອຸດສາຫະກໍາ ແລະ ທັນສະໄໝ” ທີ່ບັນດາສະຫາຍໄດ້ຈັບມື ຕາມເນື້ອໃນຂໍ້ແຂ່ງຂັນ ໃຫ້ໄດ້ຕາມຄາດໝາຍຄື: ໃຫ້ໄວ, ໃຫ້ດີ, ໃຫ້ຫຼາຍ ແລະ ໃຫ້ຖືຕ້ອງຕາມກົດໝາຍ. ການແຂ່ງຂັນສ້າງຂະບວນການຕ້ອງດໍາເນີນໄປແຕ່ຫົວທີຢ່າງເປັນປົກກະຕິຕໍ່ເນື່ອງ ແລະ ຫຼາຍຮູບ, ຫຼາຍແບບ, ຫຼາຍລະດັບ; ຕັ້ງຜັນຂະຫຍາຍໃຫ້ເຂົ້າສູ່ລວງເລິກກວ່າເກົ່າ ເປັນຕົ້ນແມ່ນ ສ້າງໃຫ້ມີຜະລິດຕະພັນໃໝ່ເກີດຂຶ້ນ, ເສີມຂະຍຫາຍຫົວຄິດປະດິດສ້າງ, ການປະດິດຄິດແຕ່ງໃໝ່ ແລະ ນໍາໃຊ້ນະວັດຕະກໍາໃໝ່ ເຂົ້າສູ່ການຜະລິດ ແລະ ການບໍລິການ ໃຫ້ຫຼາຍ.

          ສອງ: ຄະນະພັກ, ຄະນະນໍາແຕ່ລະຂັ້ນ ລວມເຖິງສະມາຊິກພັກ ແລະ ພະນັກງານ-ລັດຖະກອນ ຕ້ອງສືບຕໍ່ປ່ຽນແປງຕົງເອງຢ່າງບໍ່ຢຸດຢັ້ງ ຕາມຈິດໃຈສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ຕອບສະໜອງຄວາມຮຽກຮ້ອງຕ້ອງການ ໃນການຍົກສູງຄວາມສາມາດ ແລະ ຄຸນນະພາບ ໃນການນໍາພາຂອງພັກ ໃນໄລຍະໃໝ່; ການແຂ່ງຂັນຮັກຊາດ ແລະ ພັດທະນາ ຂໍໃຫ້ເປັນການທົດສອບຄວາມສາມາດໃນການນໍາຂອງຄະນະພັກ ແລະ ຄະນະນໍາແຕ່ລະຂັ້ນໃນໄລຍະໃໝ່.

       ສາມ: ຕ້ອງສ້າງບຸກຄົນ ແລະ ກົມກອງລວມໝູ່ ຕົວແບບດີເດັ່ນ, ນໍາໜ້າ ຈາກນ້ອຍຫາໃຫຍ່, ຈາກດ້ານດຽວກ້າວສູ່ຫຼາຍດ້ານ ແລະ ຂະຫຍາຍອອກໃຫ້ກວ້າງຂວາງ, ມີຄຸນນະພາບ, ຍືນຍົງ ແລະ ຂະຫຍາຍຕົວ; ຕ້ອງໄດ້ຍົກລະດັບຂຶ້ນໃນແຕ່ລະໄລຍະ ເພື່ອສ້າງຕົວແບບການພັດທະນານັ້ນ; ບໍ່ມີອັນໃດທີ່ເກີດຂຶ້ນແລ້ວສົມບູນແບບ ແຕ່ຖ້າເກີດມີໜໍ່ແໜງຕ້ອງຈັບເອົາໜໍ່ແໜງນັ້ນພັດທະນາໄປເພື່ອຄວາມສົມບູນນແບບຈຶ່ງຖືວ່າໄດ້ຜົນ. ດັ່ງນັ້ນ, ທຸກອັນຕ້ອງຜ່ານການທົດລອງ, ທົດສອບ ແລະ ສະຫຼຸບຖອດຖອນບົດຮຽນ, ນໍາໃຊ້ຕໍ່ຍອດ ເພື່ອຂະຫຍາຍອອກໄປໄດ້ກວ້າງຂວາງ ແລະ ກາຍເປັນຂະບວນການໄດ້. ນອກນັ້ນ, ກໍຕ້ອງຕີຖອຍແນວຄິດມັກງ່າຍ, ເບິ່ງແຄບ ຊຸກເຊື່ອງບົດຮຽນທີ່ດີຂອງຕົນໃຫ້ສັງຄົມນໍາໃຊ້ ຫຼື ເວົ້າຢ່າງໜຶ່ງ ກໍແມ່ນແນວຄິດຢ້ານລື່ນ, ຢ້ານເຫຼືອ ເພາະເປັນການທວງດຶງຂະບວນການພັດທະນາ.

         ບົນພື້ນຖານນັ້ນ ພວກສະຫາຍ ຕ້ອງຕັ້ງໜ້າເປັນເຈົ້າການ ແລະ ມີຄວາມຮັບຜິດຊອບສ້າງບັນດາຕົວແບບດີເດັ່ນດ້ານຕ່າງໆ ຢູ່ຂະແໜງການ ເຕັກໂນໂລຊີ ແລະ ການສື່ສານ ແຕ່ສູນກາງລົງຮອດທ້ອງຖິ່ນ-ຮາກຖານ, ທັງຕ້ອງສະຫຼຸບສັງລວມບົດຮຽນ ຈາກຕົວແບບນັ້ນ ໃຫ້ທັນການ, ຖ້າມີຕົວແບບທີ່ດີ ແມ່ນຢາກໃຫ້ວຽກງານເຕັກໂນໂລຊີ ແລະ ການສື່ສານ ເປັນສື່ເຜີຍແຜ່ ຫຼື ລວມທັງເອົາເຂົ້າເປັນຫຼັກຕໍາລາການຮຽນການສອນທີ່ທັນສະໄໝ ເພື່ອຜັນຂະຫຍາຍອອກ, ເຮັດໃຫ້ “ຕົວແບບ” ເຫຼົ່ານັ້ນ ນັບມື້ນັບແຜ່ຂະຫຍາຍສູ່ທຸກຂະແໜງການ, ບໍລິເວນ ແລະ ທົ່ວປະເທດ; ເພື່ອກາຍເປັນບົດຮຽນໃຫ້ພວກເຮົາ ສ້າງຂະບວນການແຂ່ງຂັນຮັກຊາດ ແລະ ພັດທະນາ ໃຫ້ເຂົ້າສູ່ລວງເລິກແທ້.

         ສີ່: ໃຫ້ຖືເອົາການຕິດຕາມ, ຊຸກຍູ້, ກວດກາ ແລະ ຕີລາຄາວຽກດີ, ຄົນເດັ່ນ ທັງຈັດຕັ້ງຍ້ອງຍໍໃຫ້ຖືກຄົນ, ຖືກວຽກ ແລະ ທັນການ ເປັນໜຶ່ງໃນບັນດາມາດຕະການກະຕຸ້ນ ເພື່ອສົ່ງເສີມຂະບວນການ ໃຫ້ຂະຫຍາຍຕົວ ນັບມື້ກວ້າງຂວາງ ແລະ ແຂງແຮງ ເຮັດໃຫ້ກາຍເປັນການປຸກລະດົມຄວາມຟົດຟື້ນ, ຫ້າວຫັນແທ້, ຜູ້ທີ່ມີຫົວຄິດປະດິດສ້າງຢ່າງແຂງແຮງເຜີຍແຜ່ໃຫ້ປະຊາຊົນໄດ້ກວ້າງຂວາງ ແລະ ຮຽນຮູ້ໃນທົ່ວສັງຄົມ ກໍ່ໃຫ້ເປັນຕົວເດັ່ນ ແລະ ຍ້ອງຍໍທັນທີໂລດ.

        ຫ້າ: ບັນດາອົງການຈັດຕັ້ງ ທີ່ຂຶ້ນກັບ ຂະແໜງເຕັກໂນໂລຊີ ແລະ ການສື່ສານ ຕ້ອງໄດ້ສືບຕໍ່ເພີ່ມທະວີ ການນໍາພາຊີ້ນໍາ, ບັນຊາ ແລະ ຕິດຕາມ, ກວດກາ ການຜັນຂະຫຍາຍຂໍ້ແຂ່ງຂັນ ຮັກຊາດ ແລະ ພັດທະນາ ເປັນທັງທິດທາງລວມ ແລະ ທັງເປັນເນື້ອໃນວຽກງານ ຂອງຂົງເຂດ ຫຼື ຂະແໜງການຕົນ ຢ່າງຈະແຈ້ງ, ຖືເປັນຫຼັກການ-ຄວາມຮັບຜິດຊອບຊີ້ນໍາ-ນໍາພາ ໃນການເຄື່ອນໄຫວ ແລະ ປຸກລະດົມຂະບວນການ, ຖືເປັນຄວາມຮັບຜິດຊອບການເມືອງຂອງຕົນ.

          ກອງປະຊຸມຄັ້ງນີ້ ມີ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຮອງລັດຖະມົນຕີ, ມີຄະນະພັກ-ຄະນະນໍາກະຊວງ ພ້ອມດ້ວຍອ້າຍນ້ອງພະນັກງານ-ລັດຖະກອນພາຍໃນກະຊວງເຕັກໂນໂລຊີ ແລະ ການສື່ສານ ເຂົ້າຮ່ວມຢ່າງພ້ອມພຽງ.

 

ວິໄສທັດແຜນພັດທະນາເສດຖະກິດດິຈິຕ໋ອນ ແຫ່ງຊາດ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ III (2021-2025)
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ