ຜົນການເຂົ້າຮ່ວມ ກອງປະຊຸມລັດຖະມົນຕີ ດິ​ຈິ​ຕອນ ອາຊຽນ ຄັ້ງທີ 04 ແລະ ກອງ​ປະ​ຊຸມປິ່ນ​ອ້ອມ

12/02/2024

ຜົນການເຂົ້າຮ່ວມ ກອງປະຊຸມລັດຖະມົນຕີ ດິ​ຈິ​ຕອນ ອາຊຽນ ຄັ້ງທີ 04 ແລະ ກອງ​ປະ​ຊຸມປິ່ນ​ອ້ອມ

ໃນວັນທີ 01 - 03 ກຸມພາ 2024, ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ນໍາພາຄະນະຜູ້ແທນກະຊວງເຕັກໂນໂລຊີ ແລະ ການສື່ສານ ສປປ. ລາວ ເຂົ້າຮ່ວມກອງ​ປະ​ຊຸມລັດຖະມົນຕີດິຈິຕອນອາຊຽນ (ADGMIN) ຄັ້ງທີ 04 ແລະ ກອງປະຊຸມປິ່ນອ້ອມ (The 4th ASEAN Digital Ministers Meeting and Related Meetings) ທີ່ປະເທດ ສິງກະໂປ ໂດຍການເປັນປະທານຂອງ ທ່ານ ນາງ ໂຈຊີຟີນ ເທວ, ລັດ​ຖະ​ມົນ​ຕີ ກະຊວງການສື່ສານ ແລະ ຖະແຫຼງຂ່າວ, ສິງກະໂປ​ ແລະ ທ່ານ ປຣະເສີດ ຈັນທະຣວງທອງ, ລັດຖະມົນຕີ ກະ​ຊວງດິຈິຕອນ ເພື່ອເສດຖະກິດ ແລະ ສັງຄົມ, ໄທ ເປັນຮອງປະທານ, ພາຍໃຕ້ຄຳຂວັນ “ການສ້າງລະບົບນິເວດດ້ານດິຈິຕອນ ທີ່ກວມລວມ ແລະ ເຊື່ອຖືໄດ້ (Building Inclusive and Trusted Digital Ecosystem)” ໄດ້ມີບັນດາ​ລັດຖະມົນຕີ, ຮອງລັດຖະມົນຕີ​, ເຈົ້າໜ້າທີ່ອາວຸໂສ, ບັນດາປະເທດ​ຄູ່​ເຈລະຈາຂອງອາຊຽນ​ ແລະ ທ່ານ ຮອງເລຂາທິການໃຫຍ່ອາຊຽນ ເຂົ້າຮ່ວມ.  

ໂອກາດນີ້, ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ໄດ້ກ່າວສະແດງຄວາມຊົມເຊີຍ ສິງກະໂປ ໃນຖານະເປັນປະເທດເຈົ້າພາບ ແລະ ປະທານກອງປະຊຸມ ໂດຍສະເພາະຄວາມເອົາໃຈໃສ່ຢ່າງຕັ້ງຫນ້າ ໃນການຊຸກຍູ້ການຫັນເປັນດິຈິຕອນຂອງບັນດາປະເທດສະມາຊິກອາຊຽນ ກໍຄືການຈັດຕັ້ງປະຕິບັດ ແຜນແມ່ບົດດິຈິຕອນອາຊຽນ 2025 ຢ່າງມີໝາກຜົນ ພ້ອມກັນນັ້ນ, ໃນປີນີ້ ລາວ ແລະ ສິງກະໂປ ກໍພວມສະຫຼອງ 50 ປີ ແຫ່ງການສ້າງສາຍພົວພັນການທູດນຳກັນ. ທ່ານ ຮອງລັດຖະມົນຕີ ຍັງໄດ້ແຈ້ງຕື່ມວ່າ ໃນປີ 2024 ນີ້, ສປປ. ລາວ ໄດ້ຮັບກຽດເປັນປະທານ ແລະ ເປັນເຈົ້າພາບຈັດກອງປະຊຸມສຸດຍອດອາຊຽນໃນທ້າຍປີນີ້ ແລະ ໃນທ້າຍເດືອນ ມັງກອນ ທີ່ຜ່ານມາ ໄດ້ສໍາເລັດກອງປະຊຸມຂອງລັດຖະມົນຕີຕ່າງປະເທດອາຊຽນແບບວົງແຄບ ທີ່ຈັດຂຶ້ນຢູ່ ແຂວງ ຫຼວງພະບາງ, ເຊິ່ງຖືເປັນໜຶ່ງໃນກອງປະຊຸມທຳອິດ ລະດັບຂັ້ນລັດຖະມົນຕີອາຊຽນ ພາຍໃຕ້ການເປັນປະທານອາຊຽນຂອງ ສປປ. ລາວ ໂດຍ ທ່ານ ສະເຫລີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ແຈ້ງໃຫ້ທີ່ປະຊຸມຮັບຊາບ ກ່ຽວກັບ ຄໍາຂັວນ ແລະ 9 ບູລິມະສິດ ສໍາລັບການເປັນປະທານອາຊຽນ ຂອງ ສປປ. ລາວ ໃນປີ 2024 ທີ່ສຸມໃສ່ 2 ອົງປະກອບຫຼັກ ຄື: “ເພີ່ມທະວີການເຊື່ອມຈອດ” ແລະ “ເພີ່ມທະວີຄວາມເຂັ້ມແຂງ”. ພາຍໃຕ້ອົງປະກອບການ “ເພີ່ມທະວີການເຊື່ອມຈອດ” ປະກອບມີ 4 ບູລິມະສິດ, ໃນນັ້ນບຸລິມະສິດທີ 3 ແມ່ນ “ການຫັນປ່ຽນເພື່ອອະນາຄົດດິຈິຕອນ”, ເຊິ່ງກະຊວງເຕັກໂນໂລຊີ ແລະ ການສື່ສານ ກໍໄດ້ມີການເຄື່ອນໄຫວ ເພື່ອໃຫ້ສອດຄ່ອງກັບບຸລິມະສິດດັ່ງກ່າວ ເຊັ່ນ ຈັດງານ ສັບປະດາດິຈິຕອນລາວ ຄັ້ງທີ 02 ພາຍໃຕ້ຄຳຂວັນ “ຫັນເປັນດິຈິຕອນ ເພື່ອຫັນປ່ຽນການພັດທະນາເສດຖະກິດ-ສັງຄົມ ໄປສູ່ຄຸນນະພາບໃໝ່ ແລະ ເພີ່ມທະວີການເຊື່ອມຈອດຢ່າງແຂງແຮງ”; ໄດ້ມີຄະນະກຳມະການຫັນເປັນດິຈິຕອນແຫ່ງຊາດ ໂດຍທ່ານນາຍົກລັດຖະມົນຕີ, ເປັນປະທານ ຊີ້ນຳໂດຍກົງ ເພື່ອບັນລຸເປົ້າໝາຍໃນການຫັນເປັນດິຈິຕອນ; ປູກຈິດສໍານຶກໃຫ້ທົ່ວສັງຄົມສ້າງຂະບວນການ “ລຶບລ້າງການກືກດິຈິຕອນ"  ແລະ ການຝຶກອົບຮົມການຫັນເປັນດິຈິຕອນ; ເຮັດວຽກຮ່ວມກັບຜູ້ປະກອບການ ແລະ ພາກເອກະຊົນ ເພື່ອຈັດຕັ້ງປະຕິບັດວິໄສທັດ ໄລຍະ 20 ປິ, ແຜນຍຸດທະສາດ ໄລຍະ 10 ປີ ແລະ ແຜນການ ໄລຍະ 5 ປີ ການພັດທະນາເສດຖະກິດດິຈິຕອນແຫ່ງຊາດ.

ກອງປະຊຸມຄັ້ງນີ້ ໄດ້ຮັບຮອງເອກະສານສໍາຄັນຫຼາຍສະບັບ ເຊັ່ນ: ຮັບຮອງເອົາກິດຈະກຳທີ່ເປັນບູລິມະສິດ ສຳລັບສົກປີ 2023 ເພື່ອນຳໄປສະເໜີລາຍງານຕໍ່ກອງປະຊຸມ ສຸດຍອດ ອາຊຽນ ທີ່ ສປປ. ລາວ ຈະເປັນເຈົ້າພາບໃນເດືອນ ຕຸລາ 2024 ລວມທັງໝົດ 9 ກິດຈະກຳ [ສປປ. ລາວ ໄດ້ຮັບ 2 ກິດຈະກຳຄື (1) ການປະເມີນຄວາມສຳພັນລະຫວ່າງໂຄງສ້າງພື້ນຖານດ້ານໄອຊີທີ ແລະ ທັກສະດ້ານດິຈິຕອນ ແລະ ການລົງທຶນຂອງຕ່າງປະເທດໃນຂະແໜງໄອຊີທີອາຊຽນ ແລະ (2) ການສ້າງມາດຕະຖານເພື່ອແລກປ່ຽນຂໍ້ມູນຂ່າວສານທີ່ຕິດພັນກັບວຽກງານໄພພິບັດໃນພາກພື້ນອາຊຽນ]; ຮັບຮອງເອົາແຜນວຽກ ສືບຕໍ່ ທີ່ເປັນບູລິມະສິດສຳລັບ 2023 - 2024 (ສປປ. ລາວ ໄດ້ຕາງໜ້າດຳເນີນ 1 ກິດຈະກຳ ຄື: ບັດປະຈໍາຕົວດິຈິຕອນ ຫຼື Digital ID) ແລະ ງົບປະມານ ກິດຈະກຳສຳລັບສົກປີ 2024 (ສປປ. ລາວ ໄດ້ຕາງໜ້າດຳເນີນ 1 ກິດຈະກຳ ໃນສົກປີ 2024 ຄື ຄວາມເຂົ້າໃຈກ່ຽວກັບຕົວຂັບເຄື່ອນດິຈິຕອນ ຂອງການລົງທຶນເຂົ້າໃນອຸດສາຫະກຳການຜະລິດ ແລະ ການບໍລິການຂອງອາຊຽນ); ຮັບຮອງເອົາແຜນວຽກບູລິມະສິດປະຈຳສົກປີ 2024; ຮັບຮອງກິດຈະກຳ ແລະ ແຜນວຽກກັບບັນດາປະເທດຄູ່ຮ່ວມເຈລະຈາ, ການຮ່ວມມືໃນຂົງເຂດບູລິມະສິດ ອາຊຽນ - ສະຫະພາບໂທລະຄົມມະນາຄົມສາກົນ 2024 - 2026 (ASEAN - ITU PCA 2024 - 2026); ຂອບການຮ່ວມມື ກ່ຽວກັບການປົກປ້ອງຂໍ້ມູນສ່ວນບຸກຄົນຂອງອາຊຽນ ຄັ້ງທີ 06 ປີ 2023; ຮັບຮອງແຜນງົບປະມານ ASEAN CERT ແລະ ສຳເລັດການສົນທະນາກ່ຽວກັບການຈັດຕັ້ງປະຕິບັດ ASEAN CERT ເປັນສ່ວນຫນຶ່ງຂອງຍຸດທະສາດການຮ່ວມມືດ້ານຄວາມປອດໄພທາງໄຊເບີ ຂອງອາຊຽນ 2021 - 2025; ຮ່າງຖະແຫຼງຂ່າວຮ່ວມ ແລະ ຮ່າງຖະແຫຼງການສິງກະໂປ.

ນອກນັ້ນ, ບັນດາລັດຖະມົນຕີດິຈິຕອນອາຊຽນ ແລະ ສປ. ຈີນ ຍັງໄດ້ລົງນາມໃນບົດບັນທຶກຄວາມເຂົ້າໃຈລະຫວ່າງ ອາຊຽນ ແລະ ສປ. ຈີນ ວ່າດ້ວຍການຮ່ວມມືດ້ານດິຈິຕອນ ແລະ ໄອຊີທີ. ກອງປະຊຸມ ຍັງໄດ້ປຶກສາຫາລືເພີ່ມທະວີການຮ່ວມມື ແລະ ການເຊື່ອມໂຍງໃນອາຊຽນດ້ານຕ່າງໆ ເຊັ່ນ ການຄຸ້ມຄອງປັນຍາປະດິດ, ຂໍ້ມູນຂ້າມຊາດ ແລະ ຄວາມປອດໄພທາງໄຊເບີ ແລະ ປຶກສາຫາລືກັບຄູ່ຮ່ວມເຈລະຈາ ແລະ ຄູ່ຮ່ວມພັດທະນາ ຕໍ່ກັບການສ້າງອະນາຄົດດິຈິຕອນທີ່ຍືນຍົງສຳລັບ ປະຊາຄົມອາຊຽນ.

ໂອກາດດັ່ງກ່າວ, ທ່ານ ຮອງລັດຖະມົນຕີ ພ້ອມດ້ວຍຄະນະ ຍັງໄດ້ພົບປະສອງຝ່າຍກັບບັນດາປະເທດສະມາຊິກໃນອາຊຽນ ແລະ ຄູ່ຮ່ວມເຈລະຈາຂອງອາຊຽນ ເຊັ່ນ:​ ສິງກະໂປ, ໄທ, ສປ. ຈີນ​ ແລະ ສະຫະພາບໂທລະຄົມມະນາຄົມສາກົນ (ITU). ພ້ອມກັບ ການໂອ້ລົມແລກປ່ຽນຄວາມຄືບໜ້າການຮ່ວມມື ກັບ ສສ ຫວຽດນາມ ແລະ ກຳປູເຈຍ. ພ້ອມກັບການໂອ້ລົມປຶກສາຫາລືການຮ່ວມມື ໃນຕໍ່ໜ້າ ໃນລະດັບເຈົ້າໜ້າທີ່ອາວຸໂສ ກັບ ສ. ເກົາຫຼີ,​ ຍີ່ປຸ່ນ, ສ. ອາເມລິກາ ແລະ ອົງການໂທລະຄົມມະນາຄົມອາຊີປາຊີຟິກ (APT). ເຊິ່ງການພົບປະສອງຝ່າຍດັ່ງກ່າວ ໄດ້ສະແດງໃຫ້ເຫັນເຖິງບົດບາດ ແລະ ການຮ່ວມມືຢ່າງໃກ້ຊິດ ລະຫວ່າງ ສປປ. ລາວ ແລະ ອາຊຽນ ກໍຄືບັນດາຄູ່ຮ່ວມເຈລະຈາຕ່າງໆ ໂດຍສະເພາະ ໃນໄລຍະທີ່ ສປປ. ລາວ ຈະເປັນເຈົ້າພາບກອງປະຊຸມສຸດຍອດອາຊຽນ ໃນປີ 2024. ນອກນີ້, ຍັງໄດ້ມີການປະກາດຜົນການແຂ່ງຂັນ ASEAN Digital Awards 2024, ເຊິ່ງໃນປີນີ້ຕົວແທນຈາກ ສປປ. ລາວ ແອັບ M Money X (ບໍລິສັດ ລາວ ໂມບາຍມັນນີ ຈຳກັດຜູ້ດຽວ) ສາມາດຍາດໄດ້ຫຼຽນທອງ ໃນໝວດການສ້າງສ່ວນຮ່ວມດ້ານດິຈິຕອນ.

 

 

ຂ່າວ​ໂດຍ:
ພະ​ແນກ​ອາ​ຊຽນ, ຫ້ອງການກະຊວງ

 

ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນ ແຫ່ງຊາດ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ຖະແຫຼ່ງການ ສະເຫຼີມສະຫຼອງ ວັນໄປສະນີໂລກ ຄົບຮອບ 149 ປີ
ວີດີໂອແນະນໍາ ການຂຶ້ນທະບຽນເລກໝາຍໂທລະສັບ
ລະ​ບົບ​ຂື້ນ​ທະ​ບຽນ​ປະ​ຊຸມ