ຮອງລັດຖະມົນຕີ ກຕສ ຕ້ອນຮັບການເຂົ້າຢ້ຽມຂໍ່ານັບຂອງ ຫົວໜ້າອົງການໂຄຕຣ້າ ລາວ

01/04/2024

ຮອງລັດຖະມົນຕີ ກຕສ ຕ້ອນຮັບການເຂົ້າຢ້ຽມຂໍ່ານັບຂອງ ຫົວໜ້າອົງການໂຄຕຣ້າ ລາວ

ໃນຕອນເຊົ້າຂອງວັນທີ 28 ມີນາ 2024 ຜ່ານມານີ້, ທີ່ຫ້ອງຮັບແຂກຂອງ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກຕສ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ປັກ ຈຸນກິວ (Mr. Jungwe Park) ຫົວໜ້າອົງການໂຄຕຣ້າ (KOTRA) ລາວ, ອົງການສົ່ງເສີມການຄ້າ ແລະ ການລົງທຶນ ສ. ເກົາຫຼີ, ໜ່ວຍງານເສດຖະກິດ ປະຈໍາສະຖານທູດ ສ. ເກົາຫຼີ ພ້ອມຄະນະ.

ໃນໂອກາດນີ້, ທ່ານ ຮອງລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ການເຂົ້າຢ້ຽມຢາມ ຂອງ ທ່ານ ຫົວໜ້າອົງການໂຄຕຣ້າ ລາວ ພ້ອມດ້ວຍຄະນະ. ຊຶ່ງການເຂົ້າຢ້ຽມຢາມຄັ້ງນີ້ ແມ່ນມີຄວາມໝາຍຄວາມສໍາຄັນ ແລະ ເປັນນິມິດໝາຍອັນດີ ໃນການປຶກສາຫາລື ການພັດທະນາສົ່ງເສີມເຕັກໂນໂລຊີ ໃນ ສປປ ລາວ ເປັນຕົ້ນແມ່ນ: ການຮຽນຮູ້, ຖ່າຍທອດເຕັກໂນໂລຊີໃໝ່ໆ, ການສ້າງເນື້ອຫາດິຈິຕອນ ແລະ ການພັດທະນາຊອບແວຣ໌ (Software) ຈາກ ສ. ເກົາຫຼີ ເພື່ອເຮັດໃຫ້ວຽກງານດິຈິຕອນ ຫຼື ໄອຊີທີ (ICT) ເປັນໜຶ່ງໃນການພັດທະນາ ແລະ ເສີມຂະຫຍາຍເສດຖະກິດຂອງລາວ ໃນອະນາຄົດ. ພ້ອມນີ້, ທ່ານ ຮອງລັດຖະມົນຕີ ໄດ້ສະແດງຄວາມຂອບໃຈ ອົງການໂຄຕຣ້າ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນບັນດາໂຄງການ ຂໍການຊ່ວຍເຫຼືອຈາກ ສປປ ລາວ ເວົ້າລວມ, ເວົ້າສະເພາະແມ່ນການຊ່ວຍເຫຼືອ ກຕສ ໃນໄລຍະທີ່ຜ່ານມາ ເປັນຕົ້ນແມ່ນ ໂຄງການ ຊ່ວຍເຫຼືອສ້າງແຜນແມ່ບົດພັດທະນາ ແລະ ນະໂຍບາຍສົ່ງເສີມ ການນໍາໃຊ້ລາຍເຊັນເອເລັກໂຕຣນິກ (Digital Signature, CA) ຂອງສູນອິນເຕີເນັດ ແຫ່ງຊາດ, ກຕສ ທີ່ຈັດຕັ້ງປະຕິບັດໂດຍ ສະຖາບັນ KDI, ກະຊວງການເງິນ ແລະ ເສດຖະກິດ ຂອງ ສ. ເກົາຫຼີ.

ພ້ອມດຽວກັນ, ທ່ານຫົວໜ້າອົງການໂຄຕຣ້າ ກໍໄດ້ສະແດງຄວາມຂອບໃຈຕໍ່ທ່ານ ຮອງລັດຖະມົນຕີ ທີ່ໄດ້ເສຍສະລະເວລາອັນມີຄ່າ ຕ້ອນຮັບໃນຄັ້ງນີ້ ແລະ ມີຄວາມຍິນດີທີ່ຈະຮ່ວມມື, ໃຫ້ການຊ່ວຍເຫຼືອກ່ຽວກັບການພັດທະນາວຽກງານດັ່ງກ່າວ. ພ້ອມທັງ ຈະຄົ້ນຄວ້າ ແລະ ດຶງດູດ ບໍລິສັດ ໄອຊີທີ ຂອງ ສ. ເກົາຫຼີ ເພື່ອມາສົ່ງເສີມ ແລະ ພັດທະນາ ໄອຊີທີ ຂອງ ສປປ ລາວ ໃຫ້ນັບມືມີການຂະຫຍາຍຕົວຍິ່ງໆຂຶ້ນ.

ບົດຂ່າວ ແລະ ພາບ: ເລັກເຊ່ຍ ສຸດທິວົງ

 

ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນ ແຫ່ງຊາດ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ຖະແຫຼ່ງການ ສະເຫຼີມສະຫຼອງ ວັນໄປສະນີໂລກ ຄົບຮອບ 149 ປີ
ວີດີໂອແນະນໍາ ການຂຶ້ນທະບຽນເລກໝາຍໂທລະສັບ
ລະ​ບົບ​ຂື້ນ​ທະ​ບຽນ​ປະ​ຊຸມ