ອດທ ເຜີຍແຜ່ຂໍ້ຕົກລົງ ວ່າດ້ວຍເລກໝາຍໂທລະສັບພິເສດ

23/04/2024

ອດທ ເຜີຍແຜ່ຂໍ້ຕົກລົງ ວ່າດ້ວຍເລກໝາຍໂທລະສັບພິເສດ

ໃນວັນທີ 10 ເມສາ 2024 ຜ່ານມາ, ອົງການດັດສົມໂທລະຄົມມະນາຄົມ (ອດທ), ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມເຜີຍແຜ່ ຂໍ້ຕົກລົງ ວ່າດ້ວຍເລກໝາຍໂທລະສັບພິເສດ ສະບັບເລກທີ 1073/ກຕສ, ລົງວັນທີ 22 ມີນາ 2023, ເພື່ອເປັນການຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນ ຂອງພັກ ກໍຄື ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ III ຂອງ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ ແລະ ກອງປະຊຸມໃຫຍ່ຂອງ ໜ່ວຍພັກ ອົງການດັດສົມໂທລະຄົມມະນາຄົມ, ໂດຍພາຍໃຕ້ການເປັນປະທານຂອງ ສະຫາຍ ສຸດໃຈ ລໍລອນສີ ເລຂາໜ່ວຍພັກ, ຫົວໜ້າອົງການດັດສົມໂທລະຄົມມະນາຄົມ, ຊຶ່ງມີຕາງໜ້າຜູ້ໃຊ້ເລກໝາຍໂທລະສັບພິເສດ ຈາກອົງການຈັດພາກລັດ, ພາກທຸລະກິດ ແລະ ອົງການຈັດຕັ້ງທີ່ບໍ່ຫວັງຜົນກໍາໄລຕ່າງໆ ພ້ອມດ້ວຍບັນດາກົມ/ທຽບເທົ່າ ພາຍໃນກະຊວງເຂົ້າຮ່ວມ.

ຈຸດປະສົງຂອງກອງປະຊຸມ ແມ່ນເພື່ອເຜີຍແຜ່ເນື້ອໃນ ລະບຽບການ ເປັນຕົ້ນແມ່ນ: ຮູບແບບການຈັດສັນເລກໝາຍໂທລະສັບພິທີ (03 ແລະ 04 ຕົວເລກ), ເງື່ອນໄຂການອອກ ແລະ ຕໍ່ ໃບອະນຸຍາດ, ການປະກອບເອກະສານຂໍອະນຸຍາດ, ການດັດສົມເລກໝາຍໂທລະສັບພິເສດໃຫ້ສອດຄ່ອງກັບແຜນຈັດສັນ ແລະ ຫຼັກການຂອງສາກົນ ຕະຫຼອດຮອດບັນດາສິດ ແລະ ພັນທະຂອງຜູ້ໄດ້ຮັບອະນຸຍາດ ແລະ ຜູ້ໃຊ້ບໍລິການ ລວມທັງບັນດາຂໍ້ຫ້າມ ແລະ ມາດຕະການຕ່າງໆ.

ໃນໂອກາດດັ່ງກ່າວ, ສະຫາຍ ປະທານກອງປະຊຸມ ໄດ້ຍົກໃຫ້ເຫັນເຖິງຄຸນລັກສະນະຄວາມສໍາຄັນຂອງການນໍາໃຊ້ເລກໝາຍໂທລະສັບພິເສດເຂົ້າໃນການບໍລິການຂອງພາກທຸລະກິດ ແລະ ພາກບໍລິການສາທາລະນະ ຄຽງຄູ່ກັບຄວາມຈໍາເປັນທາງດ້ານຊັບພະຍາກອນຂອງເລກໝາຍໂທລະສັບພິເສດ ຈຶ່ງຈໍາເປັນຕ້ອງໄດ້ມີການພິຈາລະນາຢ່າງລະອຽດຖີ່ຖ້ວນ ໃນການອອກ ແລະ ຕໍ່ໃບອະນຸຍາດ ເພື່ອຮັບປະກັນວ່າຜູ້ທີ່ໄດ້ຮັບອະນຸຍາດມີການນໍາໃຊ້ເລກໝາຍດັ່ງກ່າວຢ່າງມີປະສິດທິພາບ ແລະ ປະສິດທິຜົນສູງສຸດ.

ພາຍຫຼັງຮັບຟັງການເຜີຍແຜ່, ບັນດາຜູ້ເຂົ້າຮ່ວມຍັງໄດ້ປະກອບຄໍາເຫັນແລກປ່ຽນປະສົບການໃນການນໍາໃຊ້ເລກໝາຍໂທລະສັບພິເສດຮ່ວມກັນ ພ້ອມທັງຍັກໃຫ້ເຫັນບັນຫາທີ່ພົບພໍ້ຈາກການນໍາໃຊ້ຕົວຈິງ ແລະ ວິທີການແກ້ໄຂຢ່າງມີປະສິດທິພາບຂອງແຕ່ລະພາກສ່ວນ. ກອງປະຊຸມດັ່ງກ່າວໄດ້ດໍາເນີນເປັນເວລາເຄິ່ງວັນ ແລະ ລົງໃນຄາບເຊົ້າຂອງວັນດຽວກັນ.

ພາບ ແລະ ຂ່າວ: ອດທ

 

ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນ ແຫ່ງຊາດ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ຖະແຫຼ່ງການ ສະເຫຼີມສະຫຼອງ ວັນໄປສະນີໂລກ ຄົບຮອບ 149 ປີ
ວີດີໂອແນະນໍາ ການຂຶ້ນທະບຽນເລກໝາຍໂທລະສັບ
ລະ​ບົບ​ຂື້ນ​ທະ​ບຽນ​ປະ​ຊຸມ