ສູນບໍລິຫານລັດດິຈິຕອນ (ສລດ), ກະຊວງເຕັກໂນໂລຊີ ແລະ ການສື່ສານ (ກຕສ) ຮ່ວມກັບ ທີ່ປຶກສາຈາກໂຄງການ World Friends Korea National IT Program Agency (NIPA) Advisor ຂອງ ສ. ເກົາຫຼີ ໄດ້ຈັດກອງປະຊຸມເຜີຍແຜ່ບົດລາຍງານຜົນສໍາເລັດການເຄື່ອນໄຫວຂອງທີ່ປຶກສາຈາກອົງການ NIPA ຂຶ້ນໃນຕອນເຊົ້າຂອງວັນທີ 26 ກໍລະກົດ 2024 ຜ່ານມາ, ທີ່ຫ້ອງປະຊຸມຊັ້ນ 1 ຕຶກສະຖານບັນເຕັກໂນໂລຊີ ແລະ ການສື່ສານ. ໃຫ້ກຽດເປັນປະທານຂອງ ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ,  ມີຄະນະສູນ, ຄະນະພະແນກ ແລະ ວິຊາການ ຈາກ ບັນດາກົມ/ສູນທຽບເທົ່າທີ່ກ່ຽວຂ້ອງ ພາຍໃນກະຊວງ, ຄະນະຊ່ຽວຊານທີ່ປຶກສາຂອງອົງການ NIPA ຈາກ ສ. ເກົາຫຼີ ແລະ ຄະນະຮັບຜິດຊອບ ຈາກ ສລດ ເຂົ້າຮ່ວມທັງຫມົດ ຈຳນວນ 45 ທ່ານ. 

ຈຸດປະສົງຂອງກອງປະຊຸມ ເພື່ອໃຫ້ຜູ້ເຂົ້າຮ່ວມໄດ້ຮັບຟັງບົດລາຍງານຜົນສຳເລັດຂອງທີ່ປຶກສາຈາກອົງການ  NIPA ພາຍໃຕ້ໂຄງການ World Friends Korea National IT Program Agency (NIPA) Advisor, ເຊິ່ງໂຄງການດັ່ງກ່າວ ແມ່ນໄດ້ຮັບການຊ່ວຍເຫຼືອຈາກລັດຖະບານ ສ. ເກົາຫຼີ ພາຍໃຕ້ການສະໜັບສະໜູນຈາກອົງການ KOICA ປະຈໍາ ສປປ ລາວ ແລະ ໄດ້ຈັດຕັ້ງປະຕິບັດທີ່ສູນບໍລິຫານລັດດິຈິຕອນ ເປັນໄລຍະເວລາ 01 ປີ. ໃນໄລຍະຜ່ານມາທາງ ສລດ ກໍໄດ້ຮັບໂຄງການດັ່ງກ່າວ ຈໍານວນ 3 ຄັ້ງຄື: 1) ສົກປີ 2018-2019, 2)​ ສົກປີ 2020-2021 ແລະ 3) ສົກປີ 2023-2024; ໂດຍໃນປີສົກປີ 2023-2024 ນີ້ ແມ່ນເລີ່ມຈັດຕັ້ງປະຕິບັດໃນເດືອນ ກໍລະກົດ 2023 ຫາ ເດືອນ ກໍລະກົດ 2024 ແລະ ໄດ້ສະໜອງທີ່ປຶກສາ ຈໍານວນ 01 ທ່ານ ໃຫ້ແກ່ ສລດ ເພື່ອແນະນໍາ ແລະ ສະເໜີຂໍ້ມູນ, ວິທີທາງໃນການແກ້ໄຂບັນຫາ ແລະ ເພື່ອເພີ່ມທະວີສົ່ງເສີມໃຫ້ມີການບໍລິຫານຈັດການ ແລະ ດໍາເນີນງານຂອງລັດຖະບານດິຈິຕອນ ໂດຍການນໍາໃຊ້ເຕັກໂນໂລຊີເຂົ້າມາຊ່ວຍໃນການສະໜອງນະໂຍບາຍ ແລະ ລະບຽບການ, ການບໍລິການດິຈິຕອນ ຂອງລັດຖະບານ ໃຫ້ແກ່ພາກລັດຖະບານ, ທຸລະກິດ ແລະ ປະຊາຊົນ ໃຫ້ນັບມື້ນັບຫຼາຍ ແລະ ມີປະສິດທິພາບຂຶ້ນເລື້ອຍໆ.

ກອງປະຊຸມຄັ້ງນີ້, ທີ່ປຶກສາ ໄດ້ນໍາສະເໜີ ແລະ ລາຍງານຜົນຂອງການຈັດຕັ້ງປະຕິບັດໃນໄລຍະ 01 ປີຜ່ານມາ ທີ່ໄດ້ປະຈໍາການຢູ່ ສູນບໍລິຫານລັດດິຈິຕອນ,​ ທາງທີ່ປຶກສາ ໄດ້ສົມທົບກັບ ພະນັກງານພາຍໃນສູນ ໃນການຄົ້ນຄວ້າ, ການເກັບກຳຂໍ້ມູນ,  ການຍົກລະດັບຄວາມຮູ້ດ້ານວິຊາສະເພາະ ແລະ ສາມາດຈັດຕັ້ງປະຕິບັດຜົນສໍາເລັດ ປະກອບມີ 03 ກິດຈະກຳຫຼັກ ຄື: 1) ໄດ້ຮ່າງບົດໂຄງການ Project Concept Paper (PCP) ກ່ຽວກັບວຽກງານ ການສ້າງ ແລະ ພັດທະນາລະບົບຂໍ້ມູນລັດຖະບານດິຈິຕອນ (Digital Data Government) ແລະ ຂໍ້ມູນລັດຖະບານເປີດ (Open Government Data (OGD)) ; 2) ໄດ້ໃຫ້ຄໍາປຶກສາກ່ຽວກັບແຜນພັດທະນາລະບົບບໍລິການເອເລັກໂຕຣນິກ (e-Service) ຂອງລັດຖະບານດິຈິຕອນຂອງ ສປປ ລາວ; 3) ໄດ້ຈັດຝຶກອົບຮົມສໍາມະນາເພີ່ມຄວາມອາດສາມາດໃຫ້ແກ່ພະນັກງານພາຍໃນກະຊວງເຕັກໂນໂລຊີ ແລະ ການສື່ສານ.

ນອກຈາກນັ້ນ, ທາງສູນບໍລິຫານລັດດິຈິຕອນ ຊຶ່ງຕາງໜ້າໃຫ້ ກຕສ ກໍໄດ້ມອບໃບກຽດຕິຄຸນ ແລະ ຂອງທີ່ລະນຶກ ໃຫ້ແກ່ທີ່ປຶກສາ ເພື່ອເປັນການສະແດງຄວາມຂອບໃຈ ແລະ ຮູ້ບຸນຄຸນຕໍ່ການມາຊ່ວຍຕະຫຼອດໄລຍະ 01 ປີ.

ໃນຕອນທ້າຍ, ທ່ານຫົວໜ້າສູນບໍລິຫານລັດດິຈິຕອນ      ກໍໄດ້ກ່າວເນັ້ນໃຫ້ເຫັນຄວາມສຳຄັນຂອງກອງປະຊຸມ ຊຶ່ງບໍ່ພຽງແຕ່ເປັນການເຜີຍແຜ່ບັນດາຜົນໄດ້ຮັບ ໃນໄລຍະທີ່ທີ່ປຶກສາມາປະຈໍາການຢູ່ ສູນບໍລິຫານລັດດິຈິຕອນເທົ່ານັ້ນ, ແຕ່ເປົ້າໝາຍອີກອັນໜື່ງກໍແມ່ນເພື່ອມາຮັບຟັງຂໍ້ສະເໜີຕ່າງໆຈາກຜູ້ເຂົ້າຮ່ວມ ຕາງໜ້າຈາກບັນດາກົມ/ສູນທຽບເທົ່າ ແລະ ຄະນະທີ່ປຶກສາຈາກອົງການ NIPA ເພື່ອໃຫ້ທີ່ປຶກສາ ແລະ ທາງ ສລດ ນໍາເອົາໄປຄົ້ນຄວ້າປັບປຸງຕື່ມ, ໃນບາງຈຸດທີ່ເຫັນວ່າຍັງບໍ່ທັນຄົບຖ້ວນເໝາະສົມ  ກໍຈະໄດ້ປັບປຸງແກ້ໄຂໃຫ້ສອດຄ່ອງກັບຕົວຈິງ. ພ້ອມນັ້ນ, ກໍຫວັງວ່າຈະໄດ້ສືບຕໍ່ແຜນການຮ່ວມມື ກັບທີ່ປຶກສາຈາກອົງການ NIPA ພາຍໃຕ້ໂຄງການ World Friends Korea National IT Program Agency (NIPA) Advisor ໃນປີຕໍ່ໆໄປອີກ, ຊຶ່ງຍັງມີອີກຫຼາຍກິດຈະກໍາທີ່ຈະໄດ້ຮ່ວມເຮັດວຽກຮ່ວມກັນ ເພື່ອຊ່ວຍຂັບເຄື່ອນ ແລະ ເປັນອີກແຮງໜຶ່ງທີ່ສະໜັບສະໜູນການພັດທະນາວຽກງານການບໍລິຫານລັດ ແລະ ການບໍລິການລັດດິຈິຕອນ ກໍຄື ວຽກງານການຫັນເປັນດິຈິຕອນຂອງ ສປປ ລາວ ໃຫ້ມີຄວາມກ້າວກະໂດດ ແລະ ພັດທະນາຂຶ້ນເລື່ອຍໆ.

ກອງປະຊຸມໄດ້ດຳເນີນໄປເປັນເວລາເຄິ່ງວັນ ແລະ ໄດ້ປິດລົງດ້ວຍຜົນສໍາເລັດຢ່າງຈົບງາມໃນເວລາ 12:00 ຂອງ ວັນດຽວກັນ.

ຂ່າວ: ສູນບໍລິຫານລັດດິຈິຕອນ

ຮູບພາບ: ເລັກເຊ່ຍ ສຸດທິວົງ