ໃນຕອນເຊົ້າຂອງວັນທີ 17 ກັນຍາ 2024, ທີ່ຫ້ອງຮັບແຂກຂອງ ກະຊວງເຕັກໂນໂລຊີ ແລະ ການສື່ສານ, ທ່ານ  ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ສຈ. ຈຸອິຈິ ທາກະດະ, ຄະນະບໍດີ ສະຖາບັນ ສິງແວດລ້ອມ ແລະ ສັງຄົມ, ສະຖາບັນເຕັກໂນໂລຊີໂຕກຽວ, ປະເທດ ຍີ່ປຸ່ນ (ຫົວໜ້າຄະນະ), ພ້ອມດ້ວຍ ທ່ານ ນາງ ມິຢະໂກະ ໂຄະບະຢະຊິ, ຫົວໜ້າອົງການຮ່ວມມືສາກົນຍີ່ປຸ່ນ ປະຈໍາລາວ (Japan International Cooperation Agency (JICA)) ແລະ ທ່ານ ຮສ. ຄໍາປະເສີດ ເທບວົງສາ, ຮອງຄະນະບໍດີ ຄະນະວິສະວະກໍາສາດ, ມະຫາວິທະຍາໄລແຫ່ງຊາດລາວ ເພື່ອລາຍງານພາບລວມກ່ຽວກັບໂຄງການເສີມສ້າງຄວາມເຂັ້ມແຂງໃຫ້ແກ່ການພັດທະນາຊັບພະຍາກອນມະນຸດທາງດ້ານວິສະວະກໍາ ແລະ ເຕັກໂນໂລຊີ ເພື່ອການພັດທະນາອຸດສາຫະກໍາໃນ ສປປ ລາວ (The Project for Strengthening Human Resource Development of Engineering for Industry Development in Lao PDR- HUGETECH), ຄະນະວິສະວະກໍາສາດ ມະຫາວິທະຍາໄລແຫ່ງຊາດ.

ໃນການພົບປະຄັ້ງນີ້ ໄດ້ປຶກສາຫາລື ແລະ ແລກປ່ຽນຂໍ້ມູນ ບົນພື້ນຖານສ້າງໂອກາດ ແລະ ຄວາມເປັນໄປໄດ້ໃນການຮ່ວມມືກັນ ໃນການພັດທະນາ ແລະ ສ້າງຄວາມເຂັ້ມແຂງໃຫ້ແກ່ຊັບພະຍາກອນມະນຸດດ້ານວິສະວະກໍາ ເພື່ອສາມາດຮອງຮັບການຫັນເປັນເຕັກໂນໂລຊີດິຈິຕອນ ຕາມວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນ ແຫ່ງຊາດ ໃຫ້ມີຮູບແບບຫັນຈາກທິດສະດີ ແລະ ການທົດລອງຕົວຈິງ ໃຫ້ກາຍເປັນຜະລິດຕະພັນໃນອຸດສາຫະກໍາທີ່ທັນສະໄໝອອກສູ່ຕະຫຼາດ ແລະ ຮັບໃຊ້ສັງຄົມ. ບົນຈິດໃຈຄວາມອາດສາມາດລິເລີ່ມການພັດທະນາຈາກການຄົ້ນຄວ້າວິໄຈວິທະຍາສາດ, ພັດທະນາຊອບແວ(Software), ຮາດແວ (Hardware) ແລະ ບຸກຄະລະກອນ ໃຫ້ສອດຄ່ອງກັບທິດທາງການຫັນເປັນດິຈິຕອນຢ່າງເປັນຮູບປະທໍາ ກໍ່ໃຫ້ເກີດເປັນລາຍຮັບເພີ່ມເຂົ້າລັດຖະບານ ກໍຄື ສປປ ລາວ ຜ່ານການຮ່ວມມືກັນໃນອະນາຄົດ ລະຫວ່າງ ກະຊວງເຕັກໂນໂລຊີ ແລະ ການສື່ສານ ແລະ ມະຫາວິທະຍາໄລແຫ່ງຊາດລາວ.

ຂ່າວ: ສຕສ

ພາບ: ພຸດດາວອນ ພາສຸວັນ