ໃນວັນທີ 18 ກັນຍາ 2024 ນີ້, ສູນບໍລິຫານລັດດິຈິຕອນ (ສລດ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມຜ່ານຮ່າງຂໍ້ຕົກລົງມາດຕະຖານເຕັກນິກລະບົບຫ້ອງການທັນສະໄໝ (E-office) ຂຶ້ນທີ່ຫ້ອງປະຊຸມຂອງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ສຕສ). ໂດຍການເປັນປະທານຂອງ ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ, ມີບັນດາກະຊວງ-ພາກລັດອ້ອມຂ້າງ ແລະ ບັນດາກົມ/ສູນ ພາຍໃນ ກຕສ ເຂົ້າຮ່ວມຈໍານວນ 35 ທ່ານ.

            ຈຸດປະສົງຂອງກອງປະຊຸມໃນຄັ້ງນີ້ ກໍເພື່ອເປັນການກໍານົດມາດຕະຖານທາງດ້ານເຕັກນິກ ການພັດທະນາລະບົບຫ້ອງການທັນສະໄໝ ໃຫ້ໄປໃນທິດທາງດຽວກັນ, ສາມາດເຊື່ອມໂຍງບັນດາເອກະສານ ຂອງພາກລັດ ເຂົ້າດ້ວຍກັນໄດ້ຢ່າງມີປະສິດທິພາບ, ປະຢັດເວລາ, ຫຼຸດຜ່ອນຄວາມສັບຊ້ອນ ແລະ ພັດທະນາລະບົບຫ້ອງການທັນສະໄໝ ໃຫ້ໄດ້ຕາມມາດຕະຖານສາກົນ ແລະ ເພີ່ມປະສິດທິພາບໃນການນໍາໃຊ້ລະບົບຂອງພະນັກງານລັດຖະກອນ. ເພື່ອເປັນບ່ອນອີງ ແລະ ອຳນວຍຄວາມສະດວກໃຫ້ແກ່ບັນດາອົງການຈັດຕັ້ງພັກ-ລັດ ທັງສູນກາງ ແລະ ທ້ອງຖິ່ນ ໃນການພັດທະນາລະບົບໂປຣແກຣມລະບົບຫ້ອງການທັນສະໄໝ, ແນໃສ່ການຍົກສູງຄຸນນະພາບການບໍລິຫານວຽກງານ ຂອງອົງການຈັດຕັ້ງພາກລັດໃຫ້ມີຄວາມທັນສະໄໝ ແລະ ວ່ອງໄວຍິ່ງຂຶ້ນ. 

ພາບ ແລະ ຂ່າວ:​ ເລັກເຊ່ຍ ສຸດທິວົງ