ເພື່ອຮ່ວມມືກັນໃນການຍົກສູງ ແລະ ພັດທະນາວຽກງານຄວາມປອດໄພໄຊເບີຂອງ ສປປ ລາວ ໃຫ້ມີປະສິດທິພາບ ແລະ ມີບາດກ້າວທີ່ດີຂຶ້ນເລື້ອຍໆ ໂດຍສະເພາະແມ່ນການສົ່ງເສີມໃຫ້ເອື້ອຍນ້ອງແມ່ຍິງລາວ ເວົ້າລວມ, ເວົ້າສະເພາະ ກໍຄື ເອື້ອຍນ້ອງແມ່ຍິງໃນຂະແໜງເຕັກໂນໂລຊີ ແລະ ການສື່ສານ ໄດ້ມີສ່ວນຮ່ວມສຳຄັນໃນການຂັບເຄື່ອນ ແລະ ພັດທະນາວຽກງານຂົງເຂດດັ່ງກ່າວ. ໃນຕອນເຊົ້າຂອງວັນທີ 26 ກັນຍາ 2024 ນີ້, ທີ່ໂຮງແຮມຄຣາວພລາຊາ, ນະຄອນຫຼວງວຽງຈັນ, ກົມຄວາມປອດໄພທາງໄຊເບີ, ກະຊວງເຕັກໂນໂລຊີ ແລະ ການສື່ສານ (ກຕສ) ຮ່ວມກັບ ສະຖານທູດ ອົສຕຣາລີ ປະຈໍາ ສປປ ລາວ ແລະ ສູນກາງສະຫະພັນແມ່ຍິງລາວ ໄດ້ຈັດຝຶກອົບຮົມໃນຫົວຂໍ້ “ສ້າງສະພາບແວດລ້ອມທາງໄຊເບີທີ່ປອດໄພ ແລະ ຢືດຢຸນ ສຳລັບແມ່ຍິງໃນອາຊຽນ”, ໂດຍການເປັນປະທານຮ່ວມຂອງ ທ່ານ ໄຊລືຊາ ອິນສີຊຽງໃໝ່, ຮອງລັດຖະມົນຕີ ກຕສ, ທ່ານ ນາງ ເມເເກັນ ຈອນສ໌, ເອກະອັກຄະລັດຖະທູດ ອົສຕຣາລີ ປະຈຳ ສປປ ລາວ ແລະ ທ່ານ ປອ. ນາງ ຈັນໂສດາ ພອນທິບ, ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ຊຶ່ງມີບັນດາຄະນະກົມ, ຄະນະພະແນກ ພ້ອມດ້ວຍພະນັກງານ-ວິຊາການ ຈາກບັນດາກົມ/ທຽບເທົ່າ ພາຍໃນ ກຕສ, ກະຊວງອ້ອມຂ້າງ ທີ່ເຮັດວຽກຕິດພັນ, ມີຕາງໜ້າຈາກປະເທດໄທ ແລະ ກໍາປູເຈຍ ເຂົ້າຮ່ວມຫຼາຍກວ່າ 50 ທ່ານ ໂດຍມີນັກວິທະຍາກອນທີ່ຊ່ຽວຊານຈາກສິງກະໂປ.

ໂອກາດດັ່ງກ່າວ, ທ່ານ ໄຊລືຊາ ອິນສີຊຽງໃໝ່, ຮອງລັດຖະມົນຕີ ກຕສ ໄດ້ກ່າວວ່າ: ການຝຶກອົບຮົມໃນຄັ້ງນີ້ ກໍເພື່ອແນໃສ່ຍົກສູງຄວາມຮູ້ ແລະ ເສີມສ້າງທັກສະດ້ານເຕັກນິກວິຊາການໃຫ້ກັບແມ່ຍິງໃນການປ້ອງກັນຕົນເອງ ແລະ ຕອບໂຕ້ຕໍ່ການຫຼອກລວງທາງອອນລາຍ, ມີສະຕິຕໍ່ການນຳໃຊ້ອິນເຕີເນັດ ໂດຍສະເພາະຫຼີກລ່ຽງການຖືກຕົວະຍົວະ, ຫຼອກລວງ ແລະ ສະແຫວງຫາຜົນປະໂຫຍດທາງສື່ອອນລາຍ ແລະ ການຖືກຂົ່ມຂູ່ຕ່າງໆທາງອອນລາຍ. ພ້ອມນີ້ ກໍເພື່ອເປີດໂອກາດ ແລະ ສ້າງຄວາມເຂັ້ມແຂງໃຫ້ແມ່ຍິງລາວໄດ້ມີສ່ວນຮ່ວມແລກປ່ຽນປະສົບການ ແລະ ຖອດຖອນບົດຮຽນກັບແມ່ຍິງຕາງໜ້າຈາກປະເທດອາຊຽນ ເພື່ອຮັບປະກັນການກຽມພ້ອມຮັບມື ແລະ ປ້ອງກັນໄພອັນຕະລາຍຕ່າງໆທີ່ອາດຈະເກີດຂຶ້ນ. ໂດຍສະເພາະໃນໄລຍະທີ່ ສປປ ລາວ ເປັນເຈົ້າພາບກອງປະຊຸມສຸດຍອດອາຊຽນ ປີ 2024 ແລະ ນໍາເອົາບົດຮຽນ, ຄວາມຮູ້, ປະສົບການທີ່ໄດ້ຖອດຖອນ ຈາກການເຂົ້າຮ່ວມຝຶກອົບຮົມໃນຄັ້ງນີ້ ໄປນຳໃຊ້ເຂົ້າໃນການດຳລົງຊີວິດໂຕຈິງຂອງຕົນ ພ້ອມທັງສົ່ງຕໍ່ຄວາມຮູ້ດັ່ງກ່າວໃຫ້ຄົນອ້ອມຂ້າງໃຫ້ມີສະຕິລະວັງຕົວ ແລະ ພ້ອມກັນສ້າງສະພາບແວດລ້ອມທາງໄຊເບີທີ່ປອດໄພສຳລັບທຸກຄົນໃນສັງຄົມ. ພ້ອມນັ້ນ, ຍັງເປັນການສົ່ງເສີມການສ້າງທັກສະຄວາມສາມາດ ແລະ ແລກປ່ຽນຄວາມຮູ້ລະຫວ່າງເອື້ອຍນ້ອງແມ່ຍິງລາວ ແລະ ບັນດາປະເທດອ້ອມຂ້າງກັບຊ່ຽວຊານ ແນໃສ່ສ້າງຄວາມຮັບຮູ້ເຂົ້າໃຈອັນລະອຽດ ກ່ຽວກັບໄພຄຸກຄາມຕ່າງໆທາງໄຊເບີ ພ້ອມທັງຫາແນວທາງ ແລະ ມາດຕະການໃນການປົກປ້ອງ, ສ້າງກົນໄກການຮ່ວມມື ແລະ ການເຊື່ອມໂຍງທີ່ບໍ່ມີພົມແດນ.

ພາບ ແລະ ຂ່າວ: ເລັກເຊ່ຍ ສຸດທິວົງ