ໃນຕອນເຊົ້າຂອງວັນທີ 11 ຕຸລາ 2024, ທີ່ຫ້ອງຮັບແຂກຂອງ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ອີມາກາວາ ທາຄຸໂອ (Mr. IMAGAWA Takuo), ຮອງລັດຖະມົນຕີ ຜູ້ຊີ້ນຳວຽກງານນະໂຍບາຍການຮ່ວມມື, ກະຊວງພາຍໃນ ແລະ ການສື່ສານ ປະເທດ ຍີ່ປຸ່ນ ພ້ອມດ້ວຍ ທ່ານ ຮິດະ ຊູໂຍຊິ, ຮອງຫົວໜ້າພະແນກສົ່ງເສີມພື້ນຖານໂຄງລ່າງດິຈິຕອນສາກົນ ໃນໂອກາດທີ່ເດີນທາງມາເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44-45 ທີ່ ສປປ ລາວ ໄດ້ຮັບກຽດເປັນເຈົ້າພາບ.

ໂອກາດນີ້, ທ່ານ ອີມາກາວາ ທາຄຸໂອ ໄດ້ກ່າວສະແດງຄວາມຂອບໃຈຕໍ່ທ່ານລັດຖະມົນຕີ ກຕສ ທີ່ໄດ້ເສຍສະຫຼະເວລາອັນມີຄ່າຕ້ອນຮັບຢ່າງອົບອຸ່ນ. ພ້ອມທັງແຈ້ງຈຸດປະສົງຂອງການເຂົ້າມາຢ້ຽມຂໍ່ານັບໃນຄັ້ງນີ້ ກໍເພື່ອປຶກສາຫາລືການຮ່ວມມືກັນທາງດ້ານວຽກງານ ໄອທີ ເປັນຕົ້ນແມ່ນ ສຶກສາຄວາມເປັນໄປໄດ້ໃນໂຄງການສ້າງລະບົບຢັ້ງຢືນໃບໜ້າ, ລະບົບບັດລະບຸຕົວຕົນ ແລະ ວຽກງານອື່ນໆທີ່ກ່ຽວຂ້ອງ. ທັງນີ້, ກໍເພື່ອເພີ່ມຂະຫຍາຍສາຍພົວພັນ ລາວ-ຢີ່ປຸ່ນ ກໍຄືສອງກະຊວງ ໃຫ້ມີຄວາມແໜ້ນແຟ້ນເພີ່ມຂຶ້ນເລື້ອຍໆ.

ໃນໂອກາດດັ່ງກ່າວ, ທ່ານ ບັນດິດ ສຈ. ບໍ່ວຽງຄໍາ ວົງດາລາ ໄດ້ກ່າວສະແດງຄວາມຕ້ອນຮັບ ແລະ ຕີລາຄາສູງຕໍ່ການເຂົ້າຢ້ຽມຂ່ຳນັບຂອງ ທ່ານ ອີມາກາວາ ທາຄຸໂອ ພ້ອມດ້ວຍ ທ່ານ ຮິດະ ຊູໂຍຊິ ແລະ ຂອບໃຈຕໍ່ ປະເທດຢີ່ປຸ່ນທີ່ໄດ້ໃຫ້ຄວາມຊ່ວຍເຫຼືອ ສປປ ລາວ ໃນຫຼາຍດ້ານ ແລະ ຫວັງຢ່າງຍິ່ງວ່າ ໃນອະນາຄົດ ສອງປະເທດ, ສອງຝ່າຍ ກໍຄື ສອງກະຊວງ ຈະໄດ້ຮ່ວມມືກັນໃນຫຼາຍດ້ານ ບໍ່ວ່າຈະເປັນການພັດທະນາບຸກຄະລາກອນ, ການສ້າງພື້ນຖານໂຄງລ່າງ, ການສ້າງນິຕິກໍາ ແລະ ອື່ນໆ ໃຫ້ແໜ້ນແຟ້ນ ແລະ ປະສົບຜົນສໍາເລັດເທື່ອລະກ້າວ.