ໃນຕອນແລງຂອງວັນທີ 21 ຕຸລາ 2024, ທີ່ຫ້ອງປະຊຸມໃຫຍ່ຊັ້ນ 3, ກະຊວງສຶກສາທິການ ແລະ ກິລາ (ເຂດສະໜາມກິລາເຈົ້າອານຸວົງ), ໄດ້ມີພິທີມອບ-ຮັບໜ້າທີ່ ປະທານສະຫະພັນກິລາ ກາຣາເຕໂດ ແຫ່ງຊາດລາວ ແລະ ປະກາດການຈັດຕັ້ງຄະນະບໍລິຫານງານສະຫະພັນກິລາ ກາຣາເຕໂດ ແຫ່ງຊາດລາວ ຊຸດໃໝ່ 2024-2028, ໂດຍການເຂົ້າຮ່ວມ ແລະ ເປັນຄະນະປະທານຂອງ ທ່ານ ພົງສະຫວັດ ບຸບຜາ, ອະດີດລັດຖະມົນຕີ ຫ້ອງວ່າການປະທານປະເທດ, ປະທານສະຫະພັນກິລາ ກາຣາເຕໂດ ແຫ່ງຊາດລາວ (ຜູ້ເກົ່າ), ທ່ານ ແກ້ວວີສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ປະທານສະຫະພັນກິ ລາກາຣາເຕໂດ ແຫ່ງຊາດລາວ (ຜູ້ໃໝ່), ແລະ ທ່ານ ແສງພອນ ພົນອາມາດ, ຮອງປະທານ-ເລຂາທິການ ຄະນະກຳມະການໂອແລມປິກແຫ່ງຊາດລາວ.

ໃນພິທີດັ່ງກ່າວ, ທ່ານ ພົງສະຫວັດ ບຸບຜາ, ອະດີດລັດຖະມົນຕີ ຫ້ອງວ່າການປະທານປະເທດ ຕາງໜ້າຄະນະບໍລິຫານງານ ສະຫະພັນກິລາ ກາຣາເຕໂດ ແຫ່ງຊາດ ຊຸດເກົ່າ 2019-2024 ໄດ້ສະເໜີລາຍງານຜົນສໍາເລັດທີ່ຍາດມາໄດ້ໃນໄລຍະຜ່ານມາ, ໂດຍໄດ້ມີຫຼາຍຜົນງານທີ່ພົ້ນເດັ່ນ ເປັນຕົ້ນແມ່ນ ສະຫະພັນໄດ້ຈັດສົ່ງນັກກິລາຈາກບັນດາສະໂມສອນເຂົ້າຮ່ວມແຂ່ງຂັນໃນລະດັບພາກພື້ນ ແລະ ສາກົນ ເຊິ່ງສາມາດຍາດໄດ້ເຖິງ 6 ຫຼຽນເງິນ ແລະ 8 ຫຼຽນທອງແດງ. ພ້ອມກັນນັ້ນ, ສະຫະພັນ ກໍ່ສ້າງໄດ້ບຸກຄະລາກອນລະດັບກໍາມະການຕັດສິນ ແລະ ຄູຝຶກ ຈໍານວນໜຶ່ງ ທີ່ໄດ້ຜ່ານການສອບເສັງ ແລະ ຮັບຮອງ ຢັ້ງຢືນ ຈາກສາກົນ.

ຕໍ່ຈາກນັ້ນ, ທ່ານ ອິນທະວົງ ມະນີທອງ, ຮອງຫົວໜ້າກົມຈັດຕັ້ງ ແລະ ພະນັກງານ, ກະຊວງສຶກສາທິການ ແລະ ກິລາ ໄດ້ຂຶ້ນຜ່ານ ຂໍ້ຕົກລົງ ຂອງ ລັດຖະມົນຕີ ກະຊວງສຶກສາທິການ ແລະ ກິລາ, ສະບັບເລກທີ 5555/ສສກ, ລົງວັນທີ 16 ສິງຫາ 2024, ໂດຍໄດ້ແຕ່ງຕັ້ງ ທ່ານ ແກ້ວວີສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ເປັນປະທານສະຫະພັນກິລາ ກາຣາເຕໂດ ແຫ່ງຊາດລາວ ຊຸດໃໝ່ ສົກປີ 2024-2028; ພ້ອມນັ້ນ, ກໍໄດ້ແຕ່ງຕັ້ງ ທ່ານ ພົງສະຫວັດ ບຸບຜາ, ປະທານສະຫະພັນກິລາ ກາຣາເຕໂດ ຊຸດເກົ່າ ຂຶ້ນເປັນປະທານກິດຕິມາສັກ ຂອງສະຫະພັນຊຸດໃໝ່. ຄະນະບໍລິຫານງານສະຫະພັນຊຸດໃໝ່ນີ້ ປະກອບມີ ທີ່ປຶກສາ 2 ທ່ານ, ຮອງປະທານ 4 ທ່ານ, ກໍາມະການ 13 ທ່ານ; ໄດ້ແຕ່ງຕັ້ງ ທ່ານ ມີນາໄຊ ພິລາວົງ, ຫົວໜ້າສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ, ເປັນເລຂາທິການສະຫະພັນ, ປະກອບມີ ຮອງເລຂາທິການ 2 ທ່ານ ແລະ ຜູ້ຊ່ວຍເລຂາທິການ 3 ທ່ານ.

ໂອກາດດັ່ງກ່າວ, ທ່ານ ແສງພອນ ພົນອາມາດ, ຮອງປະທານ-ເລຂາທິການ ຄະນະກຳມະການໂອແລມປິກແຫ່ງຊາດລາວ ໄດ້ມີຄໍາເຫັນຕໍ່ພິທີ ໂດຍໄດ້ສະແດງຄວາມຊົມເຊີຍຕໍ່ຜົນງານທີ່ຜ່ານມາ ແລະ ສະເໜີມາຍັງຄະນະຊຸດໃໝ່ ສືບຕໍ່ພາລະກິດ ແລະ ຜົນງານຕ່າງໆ ທີ່ຄະນະຊຸດເກົ່າຍາດມາໄດ້,​ ພ້ອມກັນນັ້ນ ກໍຕ້ອງປັບປຸງ ແລະ ຜັນຂະຫຍາຍ ເພື່ອໃຫ້ຍາດໄດ້ຜົນສໍາເລັດອັນໃໝ່ໃຫຍ່ຂຶ້ນກວ່າເກົ່າ.

ໃນຕອນທ້າຍ, ທ່ານ ແກ້ວວີສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ປະທານສະຫະພັນກິລາກາຣາເຕໂດແຫ່ງຊາດລາວ ຊຸດໃໝ່ 2024-2028 ໄດ້ມີຄຳເຫັນ ແລະ ສະເໜີວິໄສທັດຕໍ່ການບໍລິຫານງານຂອງຄະນະຊຸດໃໝ່ ເປັນຕົ້ນແມ່ນ ການສືບຕໍ່ພັດທະນາສະຫະພັນ ກໍຄືບັນດາສະໂມສອນທີ່ຂຶ້ນກັບ; ຈັດການແຂ່ງຂັນປະຈໍາປີພາຍໃນປະເທດ ແລະ ສືບຕໍ່ສົ່ງນັກກິລາເຂົ້າຮ່ວມການແຂ່ງຂັນຢູ່ພາກພື້ນ ແລະ ສາກົນ; ຊອກຫາແຫຼ່ງທຶນຕ່າງໆ ເພື່ອປະກອບເຂົ້າເປັນງົບປະມານຂອງສະຫະພັນ, ຊ່ວຍເຫຼືອບັນດານັກກິລາ, ກໍາມະການ ແລະ ຄູຝຶກ; ພົວພັນປະສານງານກັບສະຖານທູດຍີ່ປຸ່ນ ແລະ ອົງການ JICA ປະຈໍາ ສປປ ລາວ ເພື່ອໃຫ້ໄດ້ຮັບການສະໜັບສະໜູນທາງດ້ານງົບປະມານ, ວັດຖຸອຸປະກອນ, ຄູຝຶກ, ອາສາສະຫມັກ ຕ່າງໆ.