ໃນຕອນເຊົ້າຂອງວັນທີ 21 ຕຸລາ 2024 ຜ່ານມາ, ກົມຈັດຕັ້ງ ແລະ ພະນັກງານ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິທີປາຖະກະຖາວັນສໍາຄັນທາງປະຫວັດສາດ ຂອງພັກຊາດ-ຂອງຊາດ ຂຶ້ນທີ່ຫ້ອງປະຊຸມ ຂອງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ເປັນຕົ້ນແມ່ນ ວັນປະກາດເອກະລາດ ຄົບຮອບ 79 ປີ (12 ຕຸລາ 1945-2024), ລະນຶກວັນສາກົນ ແລະ ວັນສັບປະດາແຫ່ງຊາດ ເພື່ອລົບລ້າງຄວາມທຸກຍາກຂອງ ສປປ ລາວ ຄົບຮອບ 37 ປີ (12 ຕຸລາ 1978-2024). ໃຫ້ກຽດເຂົ້າຮ່ວມເປັນປະທານຂອງ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກຕສ, ມີບັນດາຄະນະປະຈໍາພັກ, ກໍາມະການພັກກະຊວງ, ເລຂາໜ່ວຍພັກ ກົມ/ທຽບເທົ່າ ພ້ອມດ້ວຍສະມາຊິກພັກ-ພະນັກງານ ທົ່ວກະຊວງ ເຂົ້າຮ່ວມ 354 ສະຫາຍ, ຍິງ 58 ສະຫາຍ.

ໃນພິທີໄດ້ຮັບຊົມການສາຍຮູບເງົາວັນປະກາດເອກະລາດຄົບຮອບ 79 ປີ, ລະນຶກວັນສາກົນ ແລະ ສັບປະດາແຫ່ງຊາດເພື່ອລົບລ້າງຄວາມທຸກຍາກ ຂອງ ສປປ ລາວ ຄົບຮອບ 37 ປີ ຊຶ່ງເປັນເຫດການໜຶ່ງທີ່ມີຄວາມໝາຍຄວາມສໍາຄັນໃນການຕໍ່ສູ້ປະຕິວັດຕ້ານການຮຸກຮານຂອງພວກລ່າເມືອງຂຶ້ນທັງແບບເກົ່າ ແລະ ແບບໃໝ່, ເປັນໝາກຜົນແຫ່ງການຕໍ່ສູ້ ຂອງປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກປະຊາຊົນປະຕິວັດລາວ ແລະ ເພື່ອໃຫ້ສະມາຊິກພັກ-ພະນັກງານ ໄດ້ເຊື່ອມຊຶມເຖິງປະຫວັດຄວາມເປັນມາ ເຖິງຄຸນງາມຄວາມດີ ກໍາແໜ້ນກ່ຽວກັບບັນດາຜົນງານຂອງຜູ້ນຳພັກ-ລັດ ຮັບຮູ້ເຖິງມູນເຊື້ອປະຫວັດສາດສໍາຄັນຂອງຊາດ ອັນເປັນວັນແຫ່ງເອກອ້າງທະນົງໃຈ ຂອງປະຊາຊົນລາວ ໃນການຕໍ່ສູ້ອັນພິລະອາດຫານທີ່ບໍ່ຍອມຈໍານົນ ''ບົນຈິດໃຈ'' ຍອມຕາຍດີກ່ອນເປັນຂ້ອຍຂ້າ, ຕາຍເພື່ອເອກະລາດດີກ່ວາຢູ່ພາຍໃຕ້ແອກການປົກຄອງຂອງຕ່າງຊາດ, ຮູ້ໄດ້ເຖີງມູນເຊື້ອແຫ່ງການຕໍ່ສູ້ມີໄຊຂອງຄົນລາວຜູ້ຮັກຊາດພາຍໃຕ້ການນໍາພາຂອງພັກຈົນສາມາດປົດປ່ອຍຊາດໄດ້ຢ່າງສົມບູນ. ພ້ອມນັ້ນ, ກໍເພື່ອໃຫ້ສະມາຊິກພັກ-ພະນັກງານ ຮູ້ເຖິງວັນສາກົນ ແລະ ຄວາມເປັນມາວັນສັບປະດາແຫ່ງຊາດເພື່ອລົບລ້າງຄວາມທຸກຍາກ ຂອງ ສປປ ລາວ ພ້ອມທັງສາເຫດສະພາບຄວາມທຸກຍາກໃນປັດຈຸບັນ ແລະ ການແກ້ໄຂບັນຫາຄວາມທຸກຍາກຂອງໂລກ ລວມເຖິງສະພາບຄວາມທຸກຍາກ ແລະ ໄພເງິນເຟີ້ ໃນ ສປປ ລາວ, ທິດທາງຄາດໝາຍຕົ້ນຕໍ່ໃນການແກ້ໄຂວຽກງານການພັດທະນາໃນເຂດຊົນນະບົດເພື່ອລົບລ້າງຄວາມທຸກຍາກແຕ່ລະໄລຍະ ໃນວິໄສທັດຮອດປີ 2030 ແລະ ຍຸດທະສາດການພັດທະນາເສດຖະກິດ-ສັງຄົມ ໃນໄລຍະ 10 ປີ (2016-2025).

ໃນໂອກາດດຽວກັນນີ້, ສະຫາຍ ທົງສັກ ກົມມະເມືອງ, ຮອງຫົວໜ້າກົມຄຸ້ມຄອງພະນັກງານ ຊຶ່ງຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານ ມະຕິຕົກລົງ ສະບັບເລກທີ 521/ນຍ, ລົງວັນທີ 01 ຕຸລາ 2024 ວ່າດ້ວຍການອະນຸມັດໃຫ້ພະນັກງານການນໍາຂັ້ນສູງອອກພັກການ-ຮັບອຸດໜູນບໍານານ ແລະ ສະຫາຍ ມະໂທທອງ ວົງລໍຄໍາ, ຮອງຫົວໜ້າກົມຈັດຕັ້ງ ແລະ ພະນັກງານ ກໍໄດ້ຂຶ້ນຜ່ານມະຕິຕົກລົງ ສະບັບເລກທີ 530/ນຍ, ລົງວັນທີ 03 ຕຸລາ 2024 ວ່າດ້ວຍ ການແຕ່ງຕັ້ງ ທ່ານ ພວງປະເສີດ ແກ້ວສຸວັນ ເປັນຫົວໜ້າຫ້ອງການ ກະຊວງເຕັກໂນໂລຊີ ແລະ ການສື່ສານ ແລະ ຂໍ້ຕົກລົງວ່າດ້ວຍການສັບຊ້ອນ ພະນັກງານນໍາພາ-ຄຸ້ມຄອງ ຂັ້ນຮອງສູນ ຂອງ ກະຊວງເຕັກໂນໂລຊີ ແລະ ການສື່ສານ.

ຕອນທ້າຍຂອງພິທີ, ທ່ານປະທານຍັງໄດ້ໃຫ້ກຽດໂອ້ລົມ ແລະ ສະແດງຄວາມຍ້ອງຍໍຊົມເຊີຍຕໍ່ຜູ້ທີ່ໄດ້ຮັບການແຕ່ງຕັ້ງໃໝ່ ພ້ອມທັງໃຫ້ເອົາໃຈໃສ່ສືບຕໍ່ນໍາພາ-ຊີ້ນໍາວຽກງານ ທີ່ໄດ້ຮັບມອບໝາຍໃຫ້ໄດ້ຮັບຜົນສໍາເລັດເປັນຢ່າງດີ ແລະ ຍົກໃຫ້ເຫັນຜົນສໍາເລັດອັນຍິ່ງໃຫຍ່ຂອງປະຊາຊົນລາວບັນດາເຜົ່າ ໃນການຍາດມາໄດ້ໄຊຊະນະແຫ່ງການປະກາດເອກະລາດ ເປັນເຈົ້າຕົນເອງ ແລະ ຄວາມກະຕັນຍູຮູ້ບຸນຄຸນຕໍ່ຜູ້ນໍາ, ຕໍ່ວິລະຊົນ ແລະ ຜູ້ມີຜົນງານອັນໃຫຍ່ຫຼວງຕໍ່ປະເທດຊາດ ຕະຫຼອດຮອດຄຸນງາມຄວາມດີ. ສະຫາຍຍັງໄດ້ເນັ້ນໃຫ້ເຫັນເຖິງຜົນສໍາເລັດໃນການຊີ້ນໍາ-ນໍາພາ ຂອງການນໍາຂອງພັກ ແລະ ລັດຖະບານລາວ ກາຍເປັນແບບຢ່າງອັນດີງາມໃຫ້ສະມາຊິກພັກ-ພະນັກງານ ໄດ້ສືບຕໍ່ຝືກຝົນຫຼໍ່ຫອມຕົນເອງຮໍ່າຮຽນເອົາເປັນແບບຢ່າງ ແລະ ນໍາມາໝູນໃຊ້ໃນການປະຕິບັດໜ້າທີ່ໃຫ້ເຂັ້ມແຂງຂຶ້ນເລື້ອຍໆ.

ຂ່າວໂດຍ: ສິນທະນູ ພະຜົນໄຊ