ໃນລະຫວ່າງວັນທີ 23-26 ຕຸລາ 2024 ຜ່ານມາ, ຄະນະຜູ້ແທນ ກະຊວງເຕັກໂນໂລຊີ ແລະ ການສື່ສານ (ກຕສ) ສປປ ລາວ ນຳໂດຍ ທ່ານ ໄຊລືຊາ ອິນສີຊຽງໃໝ່, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສຸດຍອດສາກົນໃນການນຳໃຊ້ດາວທຽມເປີຍໂຕ ຄັ້ງທີ 3 “The 3rd International Summit on BSD Applications” ທີ່ນະຄອນຈູໂຈ, ແຂວງ ຫູນານ, ສປ ຈີນ. ຊຶ່ງຈັດຂຶ້ນໂດຍ ລັດຖະບານປະຊາຊົນແຂວງຫູນານ ຮ່ວມກັບ ຄະນະພັດທະນາ ແລະ ປະຕິຮູບ ແຫ່ງຊາດ ສປ ຈີນ, ກະຊວງຄົມມະນາຄົມ ແລະ ອົງການອາວະກາດແຫ່ງຊາດຈີນ. ກອງປະຊຸມດັ່ງກ່າວ ມີບັນດາຜູ້ຕາງໜ້າຈາກພາກລັດ ແລະ ເອກະຊົນ, ສະຖາບັນການສຶກສາ, ພາກທຸລະກິດ, ບັນດາຜູ້ຊ່ຽວຊານຈາກ ສປ ຈີນ, ໜ່ວຍງານກ່ຽວຂ້ອງ ແລະ ບັນດາປະເທດຄູ່ຮ່ວມມືເຂົ້າຮ່ວມຫຼາຍກວ່າ 1,000 ຄົນ.

ກອງປະຊຸມຄັ້ງນີ້ ໄດ້ຈັດຂຶ້ນເປັນຄັ້ງທີ 3, ພາຍໃຕ້ຄຳຂວັນທີ່ວ່າ: “One World, BDS with You”, ຈຸດປະສົງກໍເພື່ອປຶກສາຫາລືແລກປ່ຽນກ່ຽວກັບການຂັບເຄື່ອນອຸດສາຫະກຳ ແລະ ການຂະຫຍາຍຕົວຂອງລະບົບດາວທຽມນຳທາງເປີຍໂຕ (Beidou Navigation Satellite System-BDS) ທີ່ມີເປົ້າໝາຍໃນການສ້າງພລັດຟອມທີ່ທັນສະໄໝ ຂອງອຸດສາຫະກຳທີ່ເກີດຂຶ້ນໃໝ່, ເຜີຍແຜ່ບັນດານະໂຍບາຍໃນການສົ່ງເສີມຊຸກຍູ້ການຮ່ວມມືສາກົນ, ການແລກປ່ຽນບົດຮຽນທາງດ້ານເຕັກໂນໂລຊີ ແລະ ການນໍາສະເໜີອຸດສາຫະກໍາແບບປະສົມປະສານ. ພ້ອມດຽວກັນນັ້ນ, ກໍຍັງມີການຈັດສໍາມະນາຫຼາຍຫົວຂໍ້ສະເພາະ ທີ່ເປັນການແລກປ່ຽນຄວາມຮູ້ທາງດ້ານວິຊາການຮ່ວມກັນຂອງບັນດາຜູ້ຊ່ຽວຊານ ແລະ ຜູ້ເຂົ້າຮ່ວມຈາກບັນດາປະເທດຕ່າງໆ ເປັນຕົ້ນແມ່ນ ການສຳມະນາກ່ຽວກັບ ການນຳໃຊ້ດາວທຽມໃນຂົງເຂດການຂົນສົ່ງ, ການສົ່ງເສີມການນຳໃຊ້ດາວທຽມເຕັກໂນໂລຊີທີ່ທັນສະໄໝ, ລະບົບດາວທຽມນຳທາງ ແລະ ເຕັກໂນໂລຊີທີ່ນຳໃຊ້ໃນການຮັບສັນຍານ, ລະບົບວົງໂຄຈອນດາວທຽມທີ່ໃຊ້ໃນການລະບຸຕຳແໜ່ງທີ່ຊັດເຈນ.

 

ແຂວງຫູນານ ເປັນແຂວງໜຶ່ງທີ່ສຳຄັນໃນການພັດທະນາລະບົບດາວທຽມນຳທາງ Beidu (BDS), ທີ່ໄດ້ສົ່ງເສີມຄວາມກ້າວໜ້າທາງເຕັກໂນໂລຊີການປ່ຽນແປງໃໝ່ທີ່ປະສົບຜົນສຳເລັດ, ມີການຮ່ວມມືໃນໂຄງການຂະໜາດໃຫຍ່ຂອງປະເທດ ແລະ ການລວມກຸ່ມບັນດາອຸດສາຫະກຳໃນຂົງເຂດເຕັກໂນໂລຊີດາວທຽມເປີຍໂຕ. ຊຶ່ງມີຄວາມມຸ້ງຫວັງທີ່ຈະເປັນຜູ້ນຳລະດັບຊາດທາງດ້ານນະວັດຕະກຳເຕັກໂນໂລຊີເປີຍໂຕ ໂດຍການສ້າງພື້ນທີ່ຈຳລອງສຳລັບການນຳໃຊ້ລະບົບໂປຼແກຼມ Beidu Application ຂະໜາດໃຫຍ່ ແລະ ສ້າງກຸ່ມການພັດທະນາທີ່ມີຄຸນນະພາບສູງສຸດສຳລັບອຸດສາຫະກຳເປີຍໂຕ.

ໃນໂອກາດດຽວກັນນີ້, ທ່ານ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ກໍຍັງໄດ້ພົບປະກັບ ທ່ານ Cao Zhiqiang, ຮອງເຈົ້າແຂວງ ຫູນານ ເພື່ອສົນທະນາແລກປ່ຽນທັດສະນະຕໍ່ກັບການນໍາໃຊ້ ແລະ ແນວທາງການພັດທະນາລະບົບດາວທຽມນຳທາງເປີຍໂຕ. ພ້ອມທັງໄດ້ມີການແລກປ່ຽນຄຳຄິດເຫັນຮ່ວມກັນ ຊຶ່ງທ່ານຮອງລັດຖະມົນຕີ ໄດ້ກ່າວເຖິງໝາກຜົນຂອງການຮ່ວມມືຂອງສອງຝ່າຍໃນໄລຍະຜ່ານມາ ພາຍຫຼັງທີ່ ກະຊວງເຕັກໂນໂລຊີ ແລະ ການສື່ສານ ສປປ ລາວ ໄດ້ມີການລົງນາມສັນຍາການຮ່ວມມືກັບ ອົງການອາວະກາດແຫ່ງຊາດຈີນ ໃນຄັ້ງວັນທີ 20 ຕຸລາ 2023 ທີ່ນະຄອນຫຼວງປັກກິ່ງ, ພາຍໃຕ້ການເປັນສັກຂີພິຍານຂອງສອງທ່ານເລຂາທິການໃຫຍ່ ລາວ ແລະ ຈີນ. ກະຊວງເຕັກໂນໂລຊີ ແລະ ການສື່ສານ ກໍໄດ້ມີການຜັນຂະຫຍາຍໂດຍການລົງສັນຍາຮ່ວມມືກັບ ບໍລິສັດ ດາວທຽມເຕັກໂນໂລຊີ ຈຳກັດ ໃນການສ້າງສູນຄຸ້ມຄອງ ແລະ ບໍລິການຂໍ້ມູນດາວທຽມ ແຫ່ງຊາດ ທີ່ແນໃສ່ພັດທະນາວຽກງານບໍລິການຂໍ້ມູນດາວທຽມໃຫ້ແກ່ສັງຄົມ ທັງພາກລັດ ແລະ ເອກະຊົນ ເຂົ້າໃນການເຊື່ອມໂຍງ ແລະ ເຊື່ອມຈອດເຄືອຂ່າຍທາງດ້ານເຕັກໂນໂລຊີດາວທຽມ ໃຫ້ມີຄວາມສະດວກ, ວ່ອງໄວ, ມີຄຸນນະພາບ, ລວມສູນ ແລະ ເພີ່ມປະສິດທິພາບການຄຸ້ມຄອງລັດ.