ກະຊວງເຕັກໂນໂລຊີ ແລະ ການສື່ສານ (ກຕສ) ເຂົ້າຮ່ວມວາງສະແດງຜົນງານການຄົ້ນຄວ້າວິທະຍາສາດ, ຜະລິດຕະພັນ ແລະ ສິນຄ້າ ໃນງານສະເຫຼີມສະຫຼອງ ວັນວິທະຍາສາດແຫ່ງຊາດ ຄົບຮອບ 37 ປີ ແລະ ບຸນວິທະຍາສາດ ເພື່ອສະເຫຼີມສະຫຼອງ ວັນສ້າງຕັ້ງມະຫາວິທະຍາໄລແຫ່ງຊາດ ຄົບຮອບ 28 ປີ ຊຶ່ງຈັດໂດຍ ກະຊວງສຶກສາທິການ ແລະ ກິລາ, ໃນລະຫວ່າງວັນທີ 04-06 ພະຈິກ 2024, ທີ່ ມະຫາວິທະຍາໄລແຫ່ງຊາດ. ຕາງໜ້າໃຫ້ ກະຊວງເຕັກໂນໂລຊີ ແລະ ການສື່ສານ ນໍາພາຄະນະຮັບຜິດຊອບວາງສະແດງ ໂດຍ ທ່ານ ປອ. ນາງ ໃຈມາລີ ພະກະຊຸມ, ຮອງຫົວໜ້າ ສະຖາບັນເຕັກໂນໂລຊີການສື່ສານຂ້ໍມູນຂ່າວສານ (ສຕສ) ພ້ອມດ້ວຍ ຕ່າງສະຖາບັນຄົ້ນຄວ້ານຳໃຊ້ເຕັກໂນໂລຊີອັດສະລິຍະ (ສຕອ) ແລະ ບັນດາກົມກອງຕ່າງໆພາຍໃນ ກຕສ.

ຈຸດປະສົງຂອງການວາງສະແດງ ແມ່ນເພື່ອນໍາສະເໜີບັນດາຜົນງານການຄົ້ນຄວ້າວິທະຍາສາດ, ຜະລິດຕະພັນ ແລະ ສິນຄ້າ ດ້ານໄອຊີທີ (ICT) ຂອງ ສຕສ ແລະ ກົມກອງອື່ນໆ ກໍຄື ກຕສ ໂດຍການນຳເອົາປ້າຍບັນດາຂໍ້ມູນ, ອຸປະກອນ ແລະ ວີດີໂອ ໄປວາງສະແດງໃນງານດັ່ງກ່າວ ເພື່ອໃຫ້ເຫັນເຖິງບູລິມະສິດອັນຮີບດ່ວນຂອງລັດຖະບານໃນການຫັນເປັນທັນສະໄໝ ເປັນຕົ້ນແມ່ນ ການພັດທະນາຊັບພະຍາກອນດິຈິຕອນ ເພື່ອຕອບສະໜອງຕາມຄວາມຕ້ອງການຂອງຕະຫຼາດແຮງງານດ້ານ ICT. ຊຶ່ງວຽກງານຫັນເປັນດິຈິຕອນ ແມ່ນວຽກງານໜຶ່ງທີ່ພັກ ແລະ ລັດຖະບານໄດ້ໃຫ້ຄວາມສໍາຄັນ ໂດຍໄດ້ສະແດງອອກໃນໃນມະຕິກອງປະຊຸມໃຫຍ່ ຄັ້ງທີ XI ຂອງພັກ,  ມະຕິກອງປະຊຸມຂອງສະພາແຫ່ງຊາດ ວ່າດ້ວຍການຮັບຮອງເອົາວິໄສທັດການພັດທະນາເສດຖະກິດດິຈິຕອນ ແຫ່ງຊາດ ໃນໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາເສດຖະກິດດິຈິຕອນ ແຫ່ງຊາດ ໄລຍະ 5 ປີ (2021-2025) ຊຶ່ງວຽກງານການພັດທະນາຊັບພະຍາກອນດິຈິຕອນ ກໍເປັນວຽກໜຶ່ງທີ່ນອນຢູ່ໃນ 8 ແຜນຍຸດທະສາດ ແລະ 14 ແຜນງານຂອງແຜນພັດທະນາດິຈິຕອນແຫ່ງຊາດ.

ການວາງສະແດງໃນຄັ້ງນີ້ ເປັນເວທີສໍາຄັນໃນການແລກປ່ຽນບົດຮຽນ ແລະ ປະສົບການ ການຄົ້ນຄວ້າວິທະຍາສາດ, ຜະລິດຕະພັນ ແລະ ສິນຄ້າ ໃຫ້ມີຄວາມທັນສະໄໝ, ມີຄວາມຫຼາກຫຼາຍ ຂອງຂະແໜງການເຕັກໂນໂລຊີ ແລະ ການສື່ສານ ເວົ້າລວມ, ຊ່ວຍຊຸກຍູ້ສົ່ງເສີມ ແລະ ພັດທະນາ ຂອງສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໃຫ້ມີຄວາມກ້າວໜ້າເທື່ອລະກ້າວ ເວົ້າສະເພາະ.

ບົດຂ່າວໂດຍ: ສຕສ